കാസര്‍ഗോഡ്: സാമൂഹിക പരിവര്‍ ത്തനത്തിനുള്ള ഏറ്റവും നല്ല ആയുധം വിദ്യാഭ്യാസമാണെന്ന് പശ്ചിമ ബംഗാള്‍ ഗവര്‍ണ്ണര്‍ ഡോ. സി.വി. ആനന്ദ ബോസ് പറഞ്ഞു. കേരള കേന്ദ്ര സർവകലാശാലയുടെ ഏഴാമത് ബിരുദദാന ചടങ്ങിൽ മുഖ്യാതിഥിയായി സംസാരിക്കുകയായിരുന്നു അദ്ദേഹം. ശരിയായ സമയത്ത് ശരിയായ കാര്യം ചെയ്യാൻ വിദ്യാഭ്യാസം ഒരാളെ പ്രാപ്തനാക്കണം. സ്വാതന്ത്ര്യവും ശാക്തീകരണവും സമ്പന്നതയുമാണ് വിദ്യാഭ്യാസം. ഇവിടെ നിന്നുള്ള ഓരോ ബിരുദധാരിയും സമൂഹത്തിൽ മാറ്റങ്ങൾ കൊണ്ടുവരാനുള്ള ഭാവിയുടെ ഏജൻ്റാണ്. സ്ത്രീ വിദ്യാഭ്യാസം വളരെ പ്രധാനപ്പെട്ടതാണെന്നും ഗവർണർ ചൂണ്ടിക്കാട്ടി.
സ്ത്രീകളുടെ വിദ്യാഭ്യാസത്തിലൂടെ സമൂഹത്തിനും രാജ്യത്തിനും വിദ്യാഭ്യാസം പകരുന്നു. നാരിശക്തിയാണ് രാജ്യത്തെ നയിക്കാൻ പോകുന്നതെന്നും അദ്ദേഹം കൂട്ടിച്ചേർത്തു.
വൈസ് ചാൻസലർ ഇൻ ചാർജ് പ്രൊഫ.കെ.സി.ബൈജു സ്വാഗത പ്രസംഗത്തിൽ സർവകലാശാലയുടെ അക്കാദമിക രംഗത്തെ പുരോഗതിയും വികസന പ്രവർത്തനങ്ങളും വിവരിച്ചു.
കാമ്പസിലെ വിവേകാനന്ദ സർക്കിളിന് സമീപം പ്രത്യേകം തയ്യാറാക്കിയ വേദിയിൽ നടന്ന പ്രൗഢഗംഭീരമായ ചടങ്ങിന് 1500-ലധികം പേർ സാക്ഷികളായി. 2023-ൽ പഠനം പൂർത്തിയാക്കിയ 957 വിദ്യാർത്ഥികൾക്ക് ബിരുദം നൽകി. 40 പേർക്ക് ബിരുദവും 843 മാസ്റ്റർ ബിരുദവും 58 പിഎച്ച്ഡി ബിരുദവും 16 പിജി ഡിപ്ലോമ ബിരുദവും നൽകി. തിരഞ്ഞെടുത്ത വിദ്യാർത്ഥികൾക്ക് വേദിയിൽ വെച്ച് ഗവർണർ നേരിട്ട് ബിരുദ സർട്ടിഫിക്കറ്റുകൾ വിതരണം ചെയ്തു. വിശിഷ്ടാതിഥികളും വിദ്യാർത്ഥികളും അധ്യാപകരും പരമ്പരാഗത വേഷത്തിൽ പരിപാടിയിൽ പങ്കെടുത്തു. വെള്ള വസ്ത്രത്തിന് പുറമെ വിവിധ നിറങ്ങളിലുള്ള ഷാളുകളും ചടങ്ങിന് മിഴിവേകി.
ബിരുദദാനച്ചടങ്ങിൽ ഗവർണർ ഡോ.സി.വി.ആനന്ദ ബോസ് സർവകലാശാലയ്ക്ക് സർപ്രൈസ് സമ്മാനമായി അവാർഡുകൾ പ്രഖ്യാപിച്ചു. മികച്ച വിദ്യാർത്ഥി, മികച്ച അദ്ധ്യാപകൻ, മികച്ച സ്റ്റാഫ് എന്നീ വിഭാഗങ്ങളിൽ ബംഗാൾ രാജ്ഭവൻ്റെ നാല് അവാർഡുകൾ ഗവർണർ പ്രഖ്യാപിച്ചു. സർവകലാശാലയുടെ പ്രഥമ വൈസ് ചാൻസലർ പ്രൊഫ. ജാൻസി ജെയിംസിന് പ്രഥമ വൈസ് ചാൻസലർക്ക് 50000 രൂപയും ഫലകവും പ്രശസ്തി പത്രവും നല്‍കും. 25000 രൂപയും മറ്റുള്ളവർക്ക് ഫലകവും പ്രശസ്തി പത്രവും. ആരാണ് അവാർഡിന് അർഹരായതെന്ന് ജൂറി തീരുമാനിക്കും.
