കോഴിക്കോട്: പേരാമ്പ്രയിൽ അനു പ്രജിലിനെ വെട്ടിക്കൊലപ്പെടുത്തിയ കേസിലെ പ്രതി മുജീബ് റഹ്മാനെ പേരാമ്പ്ര ജുഡീഷ്യൽ ഫസ്റ്റ് ക്ലാസ് കോടതി ചൊവ്വാഴ്ച നാല് ദിവസത്തെ പോലീസ് കസ്റ്റഡിയിൽ വിട്ടു. മാർച്ച് 12നാണ് അനു (26)യെ സ്വദേശമായ വാളൂരിലെ കനാലിൽ മരിച്ച നിലയിൽ കണ്ടെത്തിയത്.
മോഷണ വസ്തുക്കളിൽ ചിലത് ഇതിനകം പോലീസ് കണ്ടെടുത്തിട്ടുണ്ട്. കുറ്റകൃത്യം നടക്കുമ്പോൾ ഇയാൾ ധരിച്ചിരുന്ന വസ്ത്രങ്ങളും അന്വേഷണ സംഘം കണ്ടെടുത്തു. ഇയാളെ കസ്റ്റഡിയിലെടുക്കാൻ സംഘം കൊണ്ടോട്ടിയിലെ വീട്ടിലെത്തിയപ്പോഴാണ് ഭാര്യ ഇയാളുടെ വസ്ത്രങ്ങൾ കത്തിക്കാൻ ശ്രമിക്കുന്നത് കണ്ടത്. ഇതോടെ സംശയം തോന്നിയ പോലീസ് വസ്ത്രങ്ങള്‍ കൈക്കലാക്കി. വസ്ത്രങ്ങൾ ശാസ്ത്രീയ പരിശോധനയ്ക്ക് അയക്കുമെന്ന് പോലീസ് പറഞ്ഞു.
മാർച്ച് 11 മുതലാണ് അനുവിനെ കാണാതായത്. തുടര്‍ന്നാണ് വീട്ടുകാർ പേരാമ്പ്ര പോലീസിൽ പരാതി നൽകിയത്. അന്വേഷണത്തിൽ കഴിഞ്ഞ ദിവസം ബൈക്കിലെത്തിയ അപരിചിതനോടൊപ്പം യാത്ര ചെയ്തതായി പോലീസ് കണ്ടെത്തി. സിസിടിവി ദൃശ്യങ്ങൾ കണ്ണൂർ കൂത്തുപറമ്പിൽ നിന്ന് മോഷണം പോയ ബൈക്ക് കണ്ടെത്താൻ അന്വേഷണ സംഘത്തെ സഹായിച്ചു. തുടർന്ന് സ്ഥിരം കുറ്റവാളിയും അൻപതോളം ക്രിമിനൽ കേസുകളിൽ പ്രതിയുമായ നമ്പിലാട്ട് മുജീബ് റഹ്മാനെ (49) പൊലീസ് അറസ്റ്റ് ചെയ്തു. മാതാപിതാക്കളുടെ വീട്ടിലുണ്ടായിരുന്ന ഭർത്താവിനെ ഡോക്ടറുടെ അടുത്തേക്ക് കൊണ്ടുപോകാൻ പോവുകയായിരുന്നു അനു. പൊതുഗതാഗതം കുറവായ ഒരു വിദൂര ഗ്രാമമാണ് വാളൂർ. അതിനാൽ പ്രതി യുവതിക്ക് യാത്രയില്‍ സഹായിയായിരിക്കാമെന്നാണ് പോലീസിന്റെ നിഗമനം.
