ജെറുസലേം: ഹമാസ് നേതാവ് യഹ്യ സിൻവാറിനെ “ജീവനോടെയോ അല്ലാതെയോ പിടികൂടുകയോ ഇസ്രായേലി ബന്ദികളെ മോചിപ്പിക്കുകയോ ചെയ്യുന്നതുവരെ” ഗാസ മുനമ്പിലെ ഫലസ്തീനികൾക്കെതിരായ ആക്രമണം തുടരണമെന്ന് ഇസ്രായേൽ പ്രസിഡൻ്റ് ഐസക് ഹെർസോഗ് ആഹ്വാനം ചെയ്തു. ഗാസയിൽ “ഉടൻ” വെടിനിർത്തൽ ആവശ്യപ്പെട്ട് യുഎൻ സുരക്ഷാ കൗൺസിൽ തിങ്കളാഴ്ച പ്രമേയം പാസാക്കിയതിനുശേഷം ചൊവ്വാഴ്ചയാണ് യു എന്നിനെ വെല്ലുവിളിച്ച് പ്രസിഡന്റിന്റെ ആഹ്വാനം.
“യാഥാർത്ഥ്യം ഇതാണ് – ലോകവും നാമും ഇതിനെ അഭിമുഖീകരിക്കണം – എല്ലാം ആരംഭിക്കുന്നതും അവസാനിക്കുന്നതും യഹ്യ സിൻവാറിൽ നിന്നാണ്,” ഹെർസോഗ് അധിനിവേശ ജറുസലേമിലെ വലതുപക്ഷ കുടിയേറ്റക്കാരോട് പറഞ്ഞു. “ഒക്ടോബറിലെ കൂട്ടക്കൊലയെക്കുറിച്ച് തീരുമാനിച്ചത് അയാളാണ്, അന്നുമുതൽ നിരപരാധികളുടെ രക്തം ചൊരിയാൻ അയാള്‍ ശ്രമിക്കുന്നു, പ്രാദേശിക സാഹചര്യം വർദ്ധിപ്പിക്കാനും റമദാനിനെ അപകീർത്തിപ്പെടുത്താനും നമ്മുടെ രാജ്യത്തും സഹവർത്തിത്വവും തകർക്കാൻ എല്ലാം ചെയ്യാൻ ലക്ഷ്യമിടുന്നത് അയാളാണ്,” ഹെർസോഗ് പറഞ്ഞു.
സൈനിക അധിനിവേശത്തിനെതിരായ ചെറുത്തുനിൽപ്പ് അന്താരാഷ്ട്ര നിയമത്തിൽ പൂർണ്ണമായും നിയമാനുസൃതമാണെങ്കിലും, ഇസ്രായേലിൻ്റെ ക്രൂരമായ സൈനിക അധിനിവേശത്തിനെതിരായ ഫലസ്തീൻ ചെറുത്തുനിൽപ്പിനെ ഇസ്രായേലും സഖ്യകക്ഷികളും “ഭീകരവാദം” എന്ന് വിശേഷിപ്പിക്കുന്നത് തുടരുന്നു.
1983 നവംബർ 22-ന് അംഗീകരിച്ച യുഎൻ ജനറൽ അസംബ്ലി പ്രമേയം എ/ആർഇഎസ്/38/17-ല്‍ പറയുന്നത് “ജനങ്ങളുടെ സ്വാതന്ത്ര്യത്തിനും പ്രാദേശിക അഖണ്ഡതയ്ക്കും ദേശീയ ഐക്യത്തിനും കൊളോണിയൽ ആധിപത്യത്തിൽ നിന്നും വർണ്ണവിവേചനത്തിൽ നിന്നും എല്ലാവരുടെയും വിദേശ അധിനിവേശത്തിൽ നിന്നുള്ള വിമോചനത്തിനും വേണ്ടിയുള്ള ജനങ്ങളുടെ പോരാട്ടത്തിൻ്റെ നിയമസാധുത വീണ്ടും ഉറപ്പിക്കുന്നു,” എന്നാണ്.
“ഈ നിമിഷത്തിൽ, നമ്മൾ ഐക്യത്തോടെയും ദൃഢനിശ്ചയത്തോടെയും ആയിരിക്കണം. ബന്ദികളെ നാട്ടിലെത്തിക്കാനുള്ള എല്ലാ ശ്രമങ്ങളും ഇസ്രായേൽ നടത്തുന്നുണ്ട്. വിവിധ മേഖലകളിൽ എല്ലാ ശ്രമങ്ങളും നടത്തുന്നു. അവസാനം, മറ്റൊരു വഴിയുമില്ല. നമ്മൾ പോരാട്ടം തുടരണം, ബന്ദികളെ തിരികെ വീട്ടിലെത്തിക്കാൻ നമുക്ക് സിൻവാറിലെത്തണം – ഒന്നുകിൽ മരിച്ചോ ജീവനോടെയോ -,” ഖത്തറിലെ തടവുകാരുടെ കൈമാറ്റ-വെടിനിർത്തൽ ചർച്ചകളിലെ സ്തംഭനാവസ്ഥയെക്കുറിച്ച് ഹെർസോഗ് പറഞ്ഞു.
അതേസമയം, നെതന്യാഹു സർക്കാരും ബൈഡൻ ഭരണകൂടവും തമ്മിലുള്ള ബന്ധത്തിലെ പ്രതിസന്ധിയെക്കുറിച്ച് ഇസ്രായേലിൻ്റെ തീവ്ര വലതുപക്ഷ ധനമന്ത്രി ബെസാലെൽ സ്മോട്രിച്ച് പ്രതികരിച്ചു. ഇത് റഫയെ ആക്രമിക്കുമെന്ന ഇസ്രായേലിൻ്റെ ഭീഷണിയെത്തുടർന്ന് വർദ്ധിച്ചു എന്ന് അദ്ദേഹം പറഞ്ഞു.
“അന്താരാഷ്ട്ര സമ്മർദത്തിന് വഴങ്ങുമെന്ന് ആരെങ്കിലും വിശ്വസിക്കുന്നുവെങ്കിൽ, ഞങ്ങൾ റഫയിൽ പ്രവേശിച്ച് അവിടെയുള്ള ഹമാസ് ബ്രിഗേഡുകളെ തകർക്കുമെന്ന് മനസ്സിലാക്കണം,” സ്മോട്രിച്ച് പറഞ്ഞു.
“യു എസുമായുള്ള സൗഹൃദത്തിന് ഞങ്ങള്‍ വിലമതിക്കുന്നു. അതേസമയം, ഞങ്ങള്‍ക്കും ഞങ്ങളുടേതായ നിലപാടുകളും നിബന്ധനകളുമുണ്ട്. സമ്മർദ്ദത്തിന് കീഴടങ്ങാനും യുദ്ധം മധ്യത്തിൽ നിർത്താനും കഴിയും, പക്ഷെ, അത് ഇസ്രായേൽ രാഷ്ട്രത്തിന് ഭീഷണിയാകും, അദ്ദേഹം കൂട്ടിച്ചേര്‍ത്തു.
സ്മോട്രിച്ചിൻ്റെ തീവ്രവാദ നിലപാടുകൾ കാരണം യുഎസ് ഭരണകൂടം അദ്ദേഹത്തെ തള്ളാനും കൊള്ളാനും പറ്റാത്ത അവസ്ഥയിലായി. കൂടാതെ, സുരക്ഷാ കൗൺസിൽ പ്രമേയങ്ങൾ എല്ലാ യുഎൻ അംഗരാജ്യങ്ങള്‍ക്കും ബാധകമാണെന്ന് യുഎൻ ചാർട്ടർ വ്യക്തമാക്കുന്നുണ്ടെങ്കിലും, യുഎൻ വെടിനിർത്തൽ പ്രമേയം ഇസ്രായേലിനെ “ബാധിക്കുന്നതല്ല” എന്നാണ് അമേരിക്കയുടെ അവകാശവാദം.
