കോഴിക്കോട്: കരുവന്നൂർ സഹകരണ ബാങ്ക് തട്ടിപ്പില്‍ സി.പി.ഐ.എമ്മിനെതിരായ ഇ.ഡിയുടെ കണ്ടെത്തലുകളെക്കുറിച്ചുള്ള മാധ്യമ പ്രവർത്തകരുടെ ചോദ്യങ്ങളോട് പ്രതികരിക്കാതെ മുഖ്യമന്ത്രി പിണറായി വിജയൻ. പകരം, കരുവന്നൂർ അഴിമതിയുമായി ബന്ധപ്പെട്ട ചോദ്യങ്ങൾക്ക് മുഖ്യമന്ത്രി മറുപടി നൽകിയില്ലെന്ന് റിപ്പോർട്ട് ചെയ്യാൻ മാധ്യമങ്ങള്‍ക്ക് അവകാശമുണ്ടെന്നായിരുന്നു അദ്ദേഹത്തിന്റെ മറുപടി.
ലോക്‌സഭാ തിരഞ്ഞെടുപ്പ് പ്രചാരണത്തിനിടെ എൽഡിഎഫ് സ്ഥാനാർഥികൾക്ക് വോട്ട് തേടി വാർത്താസമ്മേളനത്തിൽ സംസാരിക്കുകയായിരുന്നു മുഖ്യമന്ത്രി. കേരളത്തിലെ 20 ലോക്‌സഭാ മണ്ഡലങ്ങളിൽ 24 ദിവസത്തെ പര്യടനത്തിനായി മുഖ്യമന്ത്രി പിണറായി വിജയൻ മാർച്ച് 30 ന് തിരഞ്ഞെടുപ്പ് പ്രചാരണം ആരംഭിച്ചു.
കരുവന്നൂർ സഹകരണ ബാങ്കിലെ സി.പി.ഐ.എമ്മിൻ്റെ ‘രഹസ്യ അക്കൗണ്ടുകളുടെ’ വിവരങ്ങൾ ഇ.ഡി തിരഞ്ഞെടുപ്പ് കമ്മിഷന് കൈമാറിയ വിവരം പുറത്ത് വന്നിരുന്നു. സഹകരണ ബാങ്ക് ചട്ടങ്ങൾ ലംഘിച്ച് തുറന്ന ഈ അക്കൗണ്ടുകളുടെ വിവരങ്ങൾ ധനമന്ത്രാലയത്തിനും ആർബിഐക്കും ഇഡി കൈമാറിയിരുന്നു.
ബിനാമി വായ്പകൾ വിതരണം ചെയ്യുന്നതിനായി രഹസ്യ അക്കൗണ്ടുകൾ ഉപയോഗിച്ചതായി ഇഡി റിപ്പോർട്ടിൽ പറയുന്നു. കരുവന്നൂർ സഹകരണ ബാങ്കിലെ 150 കോടിയുടെ തട്ടിപ്പ് ഇഡി അന്വേഷിക്കുമ്പോൾ, പാർട്ടി ഓഫീസിനായി സ്ഥലം വാങ്ങുന്നതിനും പാർട്ടി ഫണ്ടും ലെവിയും ശേഖരിക്കുന്നതിനുമാണ് പ്രധാനമായും സിപിഐ എം കരുവന്നൂർ ബാങ്കിൽ തുറന്ന അഞ്ച് അക്കൗണ്ടുകൾ ഉപയോഗിച്ചതെന്ന് ഇഡിയുടെ ഒരു റിപ്പോർട്ടിൽ പറയുന്നു. .
വാർത്താ സമ്മേളനത്തിൽ മുഖ്യമന്ത്രി പിണറായി വിജയൻ രാഹുൽ ഗാന്ധി വയനാട്ടിൽ മത്സരിക്കുന്നതിന്റെ അനൗചിത്യത്തെക്കുറിച്ച് സംസാരിച്ചു. കേരളത്തിൽ ബിജെപിയെയല്ല, ഇടതുമുന്നണിയെയാണ് രാഹുൽ ഗാന്ധി നേരിടാൻ പോകുന്നതെന്നും അദ്ദേഹം പറഞ്ഞു.
കോൺഗ്രസ് പാർട്ടിയിൽ രാഹുൽ ഗാന്ധിക്ക് ഒരു പ്രധാന പങ്കുണ്ട്. പിന്നെ എന്തിനാണ് ഇവിടെ നിന്ന് മത്സരിക്കുന്നത്? ഇവിടെ എൽഡിഎഫാണ് പ്രധാന ശക്തി. ഇടതുപക്ഷത്തെ നേരിടാൻ അദ്ദേഹം ഇവിടെ എന്തിന് മത്സരിക്കണം, പിണറായി വിജയൻ ചോദിച്ചു.
“ബി.ജെ.പിക്കെതിരെ പോരാടാനല്ലേ ഇന്ത്യാ ബ്ലോക്ക് രൂപീകരിച്ചത്?. എന്നിട്ടും, ഇന്ത്യൻ ബ്ലോക്കിൻ്റെ ഭാഗമായ ഒരു മുതിർന്ന നേതാവ്, സഖ്യത്തിൻ്റെ ഭാഗമായ എൽഡിഎഫിനെ നേരിടാൻ കേരളത്തിലെത്തുന്നു. ഇതിൽ നിന്ന് നമ്മൾ എന്താണ് മനസ്സിലാക്കേണ്ടത്? ” പിണറായി വിജയൻ ചോദിച്ചു.
