മനാമ : ഈദുൽ ഫിത്വര്‍ ദിവസം 1,584 തടവുകാർക്ക് മാപ്പ് നൽകാൻ ബഹ്റൈൻ രാജാവ് ഹമദ് ബിൻ ഈസ അൽ ഖലീഫ ഉത്തരവ് പുറപ്പെടുവിച്ചു. വർഷങ്ങളായി രാജ്യത്ത് തടവുകാരെ കൂട്ടത്തോടെ മോചിപ്പിക്കുന്ന ഏറ്റവും വലിയ സംഭവമാണിത്.
മാപ്പ് അനുവദിച്ച തടവുകാരെല്ലാം കലാപത്തിലും ക്രിമിനൽ കേസുകളിലും കുറ്റക്കാരാണെന്ന് ബഹ്റൈൻ വാർത്താ ഏജൻസി (ബിഎൻഎ) റിപ്പോർട്ട് ചെയ്തു.
ബഹ്റൈൻ സമൂഹത്തിൻ്റെ കെട്ടുറപ്പും സുസ്ഥിരതയും നിലനിർത്തുന്നതിനൊപ്പം അതിൻ്റെ സാമൂഹിക ഘടനയെ സംരക്ഷിക്കാനുള്ള ബഹ്റൈൻ രാജാവ് ഹമദിൻ്റെ വ്യഗ്രതയെ ഈ ഉത്തരവ് പ്രതിഫലിപ്പിക്കുന്നു.
രാജാവിൻ്റെ സിംഹാസനാരോഹണത്തിൻ്റെ രജതജൂബിലിയോട് അനുബന്ധിച്ചാണ് പ്രഖ്യാപനം. 2002 ഫെബ്രുവരി 14 മുതൽ ഹമദ് രാജാവ് ബഹ്‌റൈനിൽ അധികാരത്തിലാണ്.
ബഹ്‌റൈനും മറ്റ് ഗൾഫ് കോ-ഓപ്പറേഷൻ കൗൺസിൽ (ജിസിസി) രാജ്യങ്ങളും അറബ് രാജ്യങ്ങളും ചേർന്ന് ഏപ്രിൽ 10 ബുധനാഴ്ച റംസാൻ അവസാനിക്കുന്ന ഈദ് അൽ ഫിത്വറിന്റെ ആദ്യ ദിവസമായി ഔദ്യോഗികമായി പ്രഖ്യാപിച്ചു.
ബഹ്റൈൻ പൗരന്മാർക്ക് ഏപ്രിൽ 10 ബുധനാഴ്ച മുതൽ ഏപ്രിൽ 12 വെള്ളി വരെ മൂന്ന് ദിവസത്തെ അവധിയാണ് ലഭിക്കുന്നത്.
