ന്യൂയോര്‍ക്ക്: ഇന്ത്യൻ വംശജയായ അമേരിക്കൻ ബഹിരാകാശ സഞ്ചാരി സുനിത വില്യംസ് മെയ് ആറിന് തൻ്റെ മൂന്നാമത്തെ ബഹിരാകാശ യാത്ര നടത്തും. അവര്‍ ബോയിംഗിന്റെ സ്റ്റാർലൈനർ കാലിപ്‌സോ ദൗത്യത്തിൻ്റെ ഭാഗമാകും. അമേരിക്കൻ ബഹിരാകാശ ഏജൻസിയായ നാസയുടെ കണക്കനുസരിച്ച്, രണ്ട് മുതിർന്ന ശാസ്ത്രജ്ഞരായ ബുച്ച് വിൽമോർ, സുനിത വില്യംസ് എന്നിവരെയാണ് ദൗത്യത്തിനായി തിരഞ്ഞെടുത്തിരിക്കുന്നത്.
നിലവിൽ ബോയിംഗിന്റെ സ്റ്റാർലൈനർ ബഹിരാകാശ പേടകത്തിൽ ക്രൂ ഫ്ലൈറ്റ് ടെസ്റ്റ് മിഷൻ പൈലറ്റായി പരിശീലനത്തിലാണ് സുനിത. ബോയിംഗിന്റെ സ്റ്റാർലൈനർ ബഹിരാകാശ പേടകം മെയ് 6 ന് രാത്രി 10:34 ന് അലയൻസ് അറ്റ്‌ലസ് വി റോക്കറ്റിൽ വിക്ഷേപിക്കും. ഈ ദൗത്യത്തിന് നാസയുടെ സഹായം തേടിയിട്ടുണ്ട്.
രണ്ടാഴ്ചത്തേക്ക് ഇന്റര്‍നാഷണല്‍ സ്പേസ് സ്റ്റേഷനില്‍ തുടരുന്ന പേടകത്തെക്കുറിച്ചുള്ള പൂർണ്ണ വിവരങ്ങൾ യുഎസ് ബഹിരാകാശ ഏജൻസി വ്യാഴാഴ്ച പങ്കിടും. ഫ്‌ളോറിഡയിലെ കേപ് കനാവറൽ സ്പേസ് ഫോഴ്‌സ് സ്‌റ്റേഷനിലെ സ്പേസ് ലോഞ്ച് കോംപ്ലക്‌സ്-41ൽ നിന്നാണ് പേടകം വിക്ഷേപിക്കുകയെന്ന് ബഹിരാകാശ ഏജൻസി അറിയിച്ചു. രണ്ട് യാത്രക്കാരും രണ്ടാഴ്ചത്തേക്ക് അന്താരാഷ്ട്ര ബഹിരാകാശ നിലയത്തിൽ (ഐഎസ്എസ്) തങ്ങും. ഇതിനുള്ള ഒരുക്കങ്ങൾ പൂർത്തിയായി.
യഥാർത്ഥത്തിൽ, ഈ ബഹിരാകാശ പേടകം 2022 ജൂലൈയിൽ പുറപ്പെടാൻ നേരത്തെ ഷെഡ്യൂൾ ചെയ്തിരുന്നു. എന്നാൽ, കൊറോണ പകർച്ചവ്യാധി കാരണം ഇത് ഒരു വർഷത്തേക്ക് മാറ്റിവെയ്ക്കുകയായിരുന്നു.
