വാഷിംഗ്ടണ്‍: ഇക്കഴിഞ്ഞ ഫെബ്രുവരിയിൽ ആർട്ടിക് ജയിൽ ക്യാമ്പിൽ വച്ച് റഷ്യന്‍ പ്രതിപക്ഷ നേതാവ് അലക്സി നവാൽനിയെ വധിക്കാൻ റഷ്യൻ പ്രസിഡൻ്റ് വ്‌ളാഡിമിർ പുടിൻ ഉത്തരവിട്ടിട്ടില്ലെന്ന് യുഎസ് രഹസ്യാന്വേഷണ ഏജൻസികൾ സ്ഥിരീകരിച്ചതായി വാൾസ്ട്രീറ്റ് ജേണൽ ശനിയാഴ്ച റിപ്പോർട്ട് ചെയ്തു.
മരിക്കുമ്പോൾ 47 കാരനായ നവൽനി പുടിൻ്റെ ഏറ്റവും കടുത്ത ആഭ്യന്തര വിമർശകനായിരുന്നു. അധികാരികൾ തീവ്രവാദികളായി മുദ്രകുത്തിയ അദ്ദേഹത്തിൻ്റെ സഖ്യകക്ഷികൾ, പുടിനാണ് നവാല്‍നിയെ കൊലപ്പെടുത്തിയതെന്നും, അതിന് തെളിവുകള്‍ നൽകുമെന്നും പറഞ്ഞിരുന്നു.
അതേസമയം, ക്രെംലിൻ ആരോപണം നിഷേധിച്ചു. കഴിഞ്ഞ മാസം, നവാൽനിയുടെ വിയോഗം “ദുഃഖം” എന്ന് വിശേഷിപ്പിച്ച പുടിൻ, നവൽനി റഷ്യയിലേക്ക് മടങ്ങിവരില്ല എന്നുണ്ടെങ്കിൽ തടവിലാക്കപ്പെട്ട അദ്ദേഹത്തെ പടിഞ്ഞാറൻ രാജ്യങ്ങൾക്ക് കൈമാറാൻ തയ്യാറാണെന്ന് പറഞ്ഞിരുന്നു. അത്തരം ചർച്ചകൾ നടന്നുകൊണ്ടിരിക്കുകയാണെന്ന് നവൽനിയുടെ സഖ്യകക്ഷികളും പറഞ്ഞു.
ഫെബ്രുവരിയിൽ നവൽനിയെ കൊല്ലാൻ പുടിൻ ഉത്തരവിട്ടിട്ടില്ലെന്ന് യുഎസ് രഹസ്യാന്വേഷണ ഏജൻസികൾ നിഗമനം ചെയ്തതായി വിഷയവുമായി പരിചയമുള്ള പേര് വെളിപ്പെടുത്താത്ത ആളുകളെ ഉദ്ധരിച്ച് വാള്‍സ്ട്രീറ്റ് ജേണൽ ശനിയാഴ്ച റിപ്പോര്‍ട്ട് ചെയ്തു.
നവൽനിയുടെ മരണത്തിൻ്റെ ഉത്തരവാദിത്തത്തിൽ നിന്ന് റഷ്യൻ നേതാവിനെ വാഷിംഗ്ടൺ ഒഴിവാക്കിയിട്ടില്ലെന്നും, പ്രതിപക്ഷ രാഷ്ട്രീയക്കാരനെ റഷ്യൻ അധികാരികൾ വർഷങ്ങളോളം ടാർഗെറ്റു ചെയ്യുകയും, രാഷ്ട്രീയ പ്രേരിതമാണെന്ന് പാശ്ചാത്യ രാജ്യങ്ങൾ ആരോപിച്ച് ജയിലിൽ അടയ്ക്കുകയും, 2020 ൽ നാഡിയെ തളര്‍ത്തുന്ന വിഷം നൽകുകയും ചെയ്തു എന്നും റിപ്പോര്‍ട്ടില്‍ പറയുന്നു. എന്നാല്‍, വിഷബാധയിൽ ഭരണകൂടത്തിൻ്റെ പങ്കാളിത്തം ക്രെംലിൻ നിഷേധിച്ചു.
ജേണലിലെ റിപ്പോര്‍ട്ട് ‘വെറും കെട്ടുകഥ’ യാണെന്നും, ‘ശൂന്യമായ ഊഹാപോഹങ്ങള്‍’ മാത്രമാണെന്നും ക്രെംലിൻ വക്താവ് ദിമിത്രി പെസ്‌കോവ് ശനിയാഴ്ച പ്രതികരിച്ചു.
ഈ കണ്ടെത്തൽ ഇൻ്റലിജൻസ് സമൂഹത്തിനുള്ളിൽ വ്യാപകമായി അംഗീകരിക്കപ്പെടുകയും കേന്ദ്ര ഇൻ്റലിജൻസ് ഏജൻസി, നാഷണൽ ഇൻ്റലിജൻസ് ഡയറക്ടറുടെ ഓഫീസ്, സ്റ്റേറ്റ് ഡിപ്പാർട്ട്‌മെൻ്റ് എന്നിവയുൾപ്പെടെ നിരവധി ഏജൻസികൾ പങ്കിടുകയും ചെയ്തതായി ഉറവിടങ്ങളെ ഉദ്ധരിച്ച് ജേണൽ റിപ്പോർട്ട് ചെയ്തു. എന്നാല്‍, റിപ്പോര്‍ട്ടില്‍ പറയുന്ന വിവരങ്ങള്‍ സ്ഥിരീകരിച്ചിട്ടില്ല.
ചില രഹസ്യാന്വേഷണ വിവരങ്ങളും നവൽനിയുടെ മരണ സമയവും മാർച്ചിൽ പുടിൻ്റെ വീണ്ടും തിരഞ്ഞെടുപ്പിനെ അത് എങ്ങനെ മറച്ചുവെച്ചു എന്നതുൾപ്പെടെയുള്ള പൊതു വസ്തുതകളുടെ വിശകലനവും അടിസ്ഥാനമാക്കിയുള്ളതാണ്
അമേരിക്കയുടെ വിലയിരുത്തൽ എന്ന് ചില ഉറവിടങ്ങളെ ഉദ്ധരിച്ച് പത്രം പറഞ്ഞു.
