ചണ്ഡീഗഡ്: ജമ്മു കശ്മീരിലെ പൂഞ്ച് ജില്ലയിൽ ശനിയാഴ്ച നടന്ന ഭീകരാക്രമണം ബിജെപിയുടെ “തിരഞ്ഞെടുപ്പിന് മുമ്പുള്ള സ്റ്റണ്ട്” ആണെന്ന് കോൺഗ്രസ് നേതാവും മുൻ പഞ്ചാബ് മുഖ്യമന്ത്രിയുമായ ചരൺജിത് സിംഗ് ചന്നി ഞായറാഴ്ച പറഞ്ഞു.
പൂഞ്ചിലെ സുരൻകോട്ട് തെഹ്‌സിലിലെ ബക്രബാൽ (സനായി) മേഖലയിൽ രണ്ട് ഐഎഎഫ് വാഹനങ്ങൾക്ക് നേരെയുണ്ടായ ഭീകരാക്രമണത്തിൽ ഇന്ത്യൻ വ്യോമസേനയിലെ കോർപ്പറൽ വിക്കി പഹാഡെ കൊല്ലപ്പെടുകയും മറ്റ് നാല് സൈനികർക്ക് പരിക്കേൽക്കുകയും ചെയ്തു.
“ഇതെല്ലാം സ്റ്റണ്ടുകളാണ്, തീവ്രവാദ ആക്രമണങ്ങളല്ല. അതിൽ സത്യമില്ല. ജനങ്ങളുടേയും ശരീരങ്ങളുടേയും ജീവൻ വെച്ചാണ് ബിജെപി കളിക്കുന്നത്,” പാർലമെൻ്റ് തെരഞ്ഞെടുപ്പിനായി താൻ മത്സരിക്കുന്ന ജലന്ധറിൽ പ്രചാരണത്തിനിടെ ചന്നി പറഞ്ഞു.
“ഈ ആക്രമണങ്ങൾ യഥാർത്ഥത്തിൽ നടക്കുന്നില്ല, മറിച്ച് ഭാരതീയ ജനതാ പാർട്ടിക്ക് നേട്ടമുണ്ടാക്കാൻ വേണ്ടി മാത്രം അവര്‍ കെട്ടിച്ചമച്ചുണ്ടാക്കുന്നതാണ്. തിരഞ്ഞെടുപ്പ് നടക്കുമ്പോഴെല്ലാം അവര്‍ ഇത് ചെയ്യുന്നു. കഴിഞ്ഞ തവണ നടന്നതുപോലെ ഇത്തരം സ്റ്റണ്ടുകൾ കളിച്ച് അവര്‍ വോട്ട് നേടുന്നു,” പുല്‍‌വാമ ആക്രമണത്തെ സൂചിപ്പിച്ചുകൊണ്ട് അദ്ദേഹം പറഞ്ഞു. 2019-ല്‍ നടന്ന പുല്‍‌വാമ ആക്രമണത്തില്‍ നാല്പതോളം സെന്‍‌ട്രല്‍ റിസര്‍‌വ്വ് പോലീസ് (സിആര്‍പി‌എഫ്) ജവാന്മാരാണ് വീരമൃത്യു വരിച്ചത്. അന്ന് അതും ബിജെപി വോട്ട് ബാങ്കാക്കി മാറ്റിയെന്നും അദ്ദേഹം കൂട്ടിച്ചേര്‍ത്തു.
മെയ് 25 ന് നടക്കുന്ന അനന്ത്‌നാഗ്-രജൗരി ലോക്‌സഭാ മണ്ഡലത്തിലെ വോട്ടെടുപ്പിന് ആഴ്ചകൾ മുമ്പാണ് ശനിയാഴ്ച പൂഞ്ച് ആക്രമണം നടന്നത്. ബിജെപിയുടെ ഈ തന്ത്രം ജനങ്ങള്‍ മനസ്സിലാക്കിക്കഴിഞ്ഞു എന്നും ചന്നി പറഞ്ഞു.
