ന്യൂഡൽഹി: കോടിക്കണക്കിന് രൂപയുടെ മദ്യ അഴിമതിക്കേസിൽ ഡല്‍ഹി മുഖ്യമന്ത്രി അരവിന്ദ് കെജ്രിവാൾ നിരപരാധിയാണെന്ന് കോടതി പ്രഖ്യാപിച്ചിട്ടില്ലെന്നും, ഇത് ഇടക്കാല ജാമ്യം മാത്രമാണെന്നും ഡൽഹി ബിജെപി അദ്ധ്യക്ഷൻ വീരേന്ദ്ര സച്ച്‌ദേവ.
ലോക്‌സഭാ തെരഞ്ഞെടുപ്പിൽ പ്രചാരണത്തിനായി കേജ്‌രിവാളിന് വെള്ളിയാഴ്ച സുപ്രീം കോടതി ജൂൺ 1 വരെ ഇടക്കാല ജാമ്യം അനുവദിച്ചതിന് പിന്നാലെയാണ് അദ്ദേഹത്തിൻ്റെ പരാമർശം.
“ചിലപ്പോൾ കുറ്റവാളികൾ പോലും പരോളിൽ പുറത്തിറങ്ങുന്നു, ഇത് ഒരു നിയമ നടപടിയാണ്. അതിനാൽ, കോടികളുടെ മദ്യ കുംഭകോണത്തിലെ പ്രധാന പ്രതിയായ കെജ്രിവാൾ നിരപരാധിയാണെന്നല്ല അതിനര്‍ത്ഥം,” അദ്ദേഹം പറഞ്ഞു.
എഎപി നേതാക്കൾ വീണ്ടും ഡൽഹിയിലെ ജനങ്ങളെ തെറ്റിദ്ധരിപ്പിക്കുകയും വഞ്ചിക്കുകയും ചെയ്യുകയാണെന്ന് അദ്ദേഹം ആരോപിച്ചു.
“എഎപിക്ക് തിരഞ്ഞെടുപ്പിൽ പ്രാദേശിക പ്രശ്‌നങ്ങളൊന്നുമില്ല. കാരണം, ഒരു സംസ്ഥാന സർക്കാർ എന്ന നിലയിൽ അവർ കഴിഞ്ഞ 10 വർഷമായി ഒന്നും ചെയ്തിട്ടില്ല. അതിനാൽ, അവർ കെജ്‌രിവാളിനെ ജയിലിലടച്ചതിൻ്റെ പേരിൽ കോളിളക്കം സൃഷ്ടിച്ചു, ഇപ്പോൾ പുറത്തുവരാനുള്ള വഞ്ചനാപരമായ അന്തരീക്ഷം സൃഷ്ടിക്കാൻ ശ്രമിക്കുകയാണ്. വരുന്ന തെരഞ്ഞെടുപ്പിൽ ഏഴ് സീറ്റുകളിലും ബിജെപി സ്ഥാനാർത്ഥികൾ വിജയിക്കുമെന്ന് ബിജെപി നേതാവ് പറഞ്ഞു.
കെജ്രിവാൾ മുഖ്യമന്ത്രിയുടെ ഓഫീസിലേക്കോ ഡൽഹി സെക്രട്ടേറിയറ്റിലേക്കോ പോകരുതെന്ന് കോടതി വ്യക്തമായി മുന്നറിയിപ്പ് നൽകിയിട്ടുണ്ടെന്നും സച്ച്‌ദേവ പറഞ്ഞു. “മുഖ്യമന്ത്രി കെജ്‌രിവാളിനെ കുറ്റവിമുക്തനാക്കിയിട്ടില്ലെന്ന് സുപ്രീം കോടതിയും അംഗീകരിച്ചു എന്നാണ് ഇതിനർത്ഥം. തിരഞ്ഞെടുപ്പ് ആവശ്യങ്ങൾക്കായി മാത്രമാണ് അദ്ദേഹത്തിന് ഇടക്കാല ജാമ്യം അനുവദിച്ചിരിക്കുന്നത്,” അദ്ദേഹം പറഞ്ഞു.
ദക്ഷിണ ഡൽഹി നിയോജക മണ്ഡലത്തിലെ ബിജെപി സ്ഥാനാർത്ഥിയും ഡൽഹി നിയമസഭയിലെ പ്രതിപക്ഷ നേതാവുമായ രാംവീർ സിംഗ് ബിധുരി, കെജ്‌രിവാളിന് തിരഞ്ഞെടുപ്പ് പ്രചാരണത്തിന് ജാമ്യം ലഭിച്ചതിനാൽ പിന്നീട് ജയിലിലേക്ക് മടങ്ങേണ്ടി വരും എന്ന് പറഞ്ഞു.
കോടികളുടെ മദ്യ കുംഭകോണക്കേസിലെ പ്രതിയാണ് അദ്ദേഹം, അതിനാൽ ജൂൺ രണ്ടിന് ജയിലിൽ തിരിച്ചെത്തേണ്ടിവരുമെന്ന് ബിധുരി പറഞ്ഞു.
എക്സൈസ് നയ അഴിമതിയുമായി ബന്ധപ്പെട്ട് കള്ളപ്പണം വെളുപ്പിക്കൽ കേസിൽ അറസ്റ്റിലായ കെജ്രിവാൾ ജൂൺ രണ്ടിന് ജയിലിലേക്ക് മടങ്ങേണ്ടിവരുമെന്ന് ജസ്റ്റിസുമാരായ സഞ്ജീവ് ഖന്നയും ദീപാങ്കർ ദത്തയും അടങ്ങുന്ന സുപ്രീം കോടതി ബെഞ്ച് പറഞ്ഞു.
ഏഴ് ഘട്ടങ്ങളിലായി നടക്കുന്ന ലോക്‌സഭാ തിരഞ്ഞെടുപ്പിൻ്റെ അവസാന ദിവസമാണ് ജൂൺ ഒന്ന്. ജൂൺ നാലിന് വോട്ടെണ്ണും.
ഡൽഹി സർക്കാരിൻ്റെ 2021-22 വർഷത്തേക്കുള്ള എക്സൈസ് നയം രൂപീകരിക്കുന്നതിലും നടപ്പാക്കുന്നതിലും അഴിമതിയും കള്ളപ്പണം വെളുപ്പിക്കലും ആരോപിച്ച് മാർച്ചിലാണ് കെജ്രിവാൾ അറസ്റ്റിലായത്.
