വാഷിംഗ്ടൺ: വിഘടനവാദി ഖലിസ്ഥാൻ ഹർദീപ് സിംഗ് നിജ്ജാറിനെ കൊലപ്പെടുത്തിയതിൽ നാലാമത്തെ ഇന്ത്യൻ പൗരനെ കനേഡിയൻ അധികൃതർ ശനിയാഴ്ച അറസ്റ്റ് ചെയ്തതായി ഔദ്യോഗിക അറിയിപ്പ്.
കാനഡയിലെ ബ്രാംപ്‌ടൺ, സറേ, അബോട്ട്‌സ്‌ഫോർഡ് പ്രദേശങ്ങളിൽ താമസിക്കുന്ന ഇരുപത്തിരണ്ടുകാരനായ അമർദീപ് സിംഗിനെതിരെ ഫസ്റ്റ് ഡിഗ്രി കൊലപാതകം, കൊലപാതകം നടത്താൻ ഗൂഢാലോചന എന്നീ കുറ്റങ്ങളാണ് ചുമത്തിയിരിക്കുന്നത്.
ഹർദീപ് സിംഗ് നിജ്ജാറിനെ കൊലപ്പെടുത്തിയതില്‍ പങ്കുണ്ടെന്ന് സംശയിക്കുന്ന സിംഗിനെ മെയ് 11 ന് അറസ്റ്റ് ചെയ്തതായി ഇൻ്റഗ്രേറ്റഡ് ഹോമിസൈഡ് ഇൻവെസ്റ്റിഗേഷൻ ടീം (ഐഎച്ച്ഐടി) അറിയിച്ചു. ഇതുമായി ബന്ധമില്ലാത്ത കേസില്‍ പീൽ റീജിയണൽ പോലീസിൻ്റെ കസ്റ്റഡിയിലായിരുന്നു അദ്ദേഹമെന്ന് ഔദ്യോഗിക പ്രസ്താവനയിൽ പറയുന്നു.
ഹർദീപ് സിംഗ് നിജ്ജാറിൻ്റെ കൊലപാതകത്തിൽ പങ്കുവഹിച്ചവരെ ഉത്തരവാദികളാക്കാനുള്ള ഞങ്ങളുടെ അന്വേഷണത്തിൻ്റെ സ്വഭാവമാണ് ഈ അറസ്റ്റ് കാണിക്കുന്നതെന്ന് ഐഎച്ച്ഐടിയുടെ ചുമതലയുള്ള ഓഫീസർ സൂപ്രണ്ട് മൻദീപ് മൂക്കർ പറഞ്ഞു.
2023 ജൂൺ 18 നാണ് ബ്രിട്ടീഷ് കൊളംബിയയിലെ സറേയിലെ ഗുരു നാനാക്ക് സിഖ് ഗുരുദ്വാരയ്ക്ക് പുറത്ത് നിജ്ജാർ (45) കൊല്ലപ്പെട്ടത്.
ഹർദീപ് സിംഗ് നിജ്ജാറിനെ കൊലപ്പെടുത്തിയതിന് കരൺ ബ്രാർ (22), കമൽപ്രീത് സിംഗ് (22), 28 കാരനായ കരൺപ്രീത് സിംഗ് എന്നീ മൂന്ന് ഇന്ത്യൻ പൗരന്മാരെ മെയ് 3 ന് IHIT അന്വേഷകർ അറസ്റ്റ് ചെയ്തിരുന്നു.
മൂന്ന് പേരും എഡ്മണ്ടനിൽ താമസിക്കുന്ന ഇന്ത്യൻ പൗരന്മാരാണ്. ഫസ്റ്റ് ഡിഗ്രി കൊലപാതകം, കൊലപാതകം നടത്താനുള്ള ഗൂഢാലോചന എന്നീ കുറ്റങ്ങളാണ് ഇവര്‍ക്കെതിരെ ചുമത്തിയിരിക്കുന്നത്.
