ലഖ്നൗ: ഉത്തർപ്രദേശ് ആൻറി ടെററിസം സ്‌ക്വാഡിന് (എടിഎസ്) കനത്ത തിരിച്ചടിയായി, ഗുരുതരമായ തീവ്രവാദ കുറ്റം ചുമത്തി രണ്ട് വ്യത്യസ്ത കേസുകളിൽ അറസ്റ്റിലായ പതിനൊന്ന് മുസ്ലീം യുവാക്കളെ ജാമ്യത്തിൽ വിട്ടയക്കാൻ അലഹബാദ് ഹൈക്കോടതിയുടെ ലഖ്നൗ ബെഞ്ച് ഉത്തരവിട്ടു.
ജസ്റ്റിസ് അത്തൗ റഹ്മാൻ മസൂദി, ജസ്റ്റിസ് മനീഷ് കുമാർ നിഗം എന്നിവരടങ്ങുന്ന ബെഞ്ച് ഈ വിഷയത്തിൽ കഴിഞ്ഞ മാസം തീരുമാനം മാറ്റിവെച്ചിരുന്നു.
തീവ്രവാദ വിരുദ്ധ നിയമം യുഎപിഎയുടെ 43 (ഡി) വകുപ്പ് പ്രകാരം പ്രതികൾക്ക് ജാമ്യം അനുവദിച്ചുകൊണ്ട് ജസ്റ്റിസ് അത്തൗ റഹ്മാൻ മസൂദി ചൊവ്വാഴ്ചയാണ് വിധി പ്രസ്താവിച്ചത്. നിർണായകമായ ഈ വിധിയിൽ, നിശ്ചിത കാലയളവിനുള്ളിൽ കുറ്റപത്രം സമർപ്പിക്കുന്നതിൽ അന്വേഷണ ഏജൻസിയുടെ പരാജയം ബെഞ്ച് എടുത്തു പറഞ്ഞു.
കൂടാതെ, അന്വേഷണത്തിന് കൂടുതൽ സമയം ആവശ്യപ്പെട്ടതിനെക്കുറിച്ച് പ്രതികൾ ഉന്നയിച്ച എതിർപ്പുകൾ പരിഗണിക്കുന്നതിൽ വിചാരണ കോടതി പരാജയപ്പെട്ടു. ഈ നടപടിക്രമത്തിലെ പിഴവ് നിയമ ലംഘനമായി കണക്കാക്കുകയും സാങ്കേതിക കാരണങ്ങളാൽ പ്രതികള്‍ക്ക് ജാമ്യം അനുവദിക്കാൻ കോടതിയെ പ്രേരിപ്പിക്കുകയും ചെയ്തു.
അതേസമയം, കോടതി വിധി ചരിത്രപരമാണെന്ന് ജംഇയ്യത്തുൽ ഉലമ ഹിന്ദ് പ്രസിഡൻ്റ് മൗലാന അർഷാദ് മദനി പറഞ്ഞു. നിശ്ചിത കാലയളവിനുള്ളിൽ കുറ്റപത്രം സമർപ്പിക്കാത്തതിനെ തുടർന്നാണ് ജാമ്യം അനുവദിച്ചതെന്നും അദ്ദേഹം ചൂണ്ടിക്കാട്ടി.
ദീർഘകാലമായി ഔപചാരികമായ കുറ്റപത്രം സമര്‍പ്പിക്കപ്പെടാതെ തടങ്കലിൽ കഴിയുന്ന മുസ്ലീം യുവാക്കൾ ഉൾപ്പെടുന്ന മറ്റ് കേസുകൾക്ക് ഈ വിധി ഒരു മാതൃകയാക്കുമെന്ന് മൗലാന മദനി പ്രത്യാശ പ്രകടിപ്പിച്ചു.
