ന്യൂഡൽഹി: മുഖ്യമന്ത്രി അരവിന്ദ് കെജ്‌രിവാളിൻ്റെ ഔദ്യോഗിക വസതിയിൽ വച്ച് തന്നെ ആക്രമിച്ച സംഭവത്തിൽ ആം ആദ്മി പാർട്ടി (എഎപി) രാജ്യസഭാംഗം സ്വാതി മലിവാൾ ഡൽഹിയിലെ തീസ് ഹസാരി കോടതിയിൽ വെള്ളിയാഴ്ച മൊഴി രേഖപ്പെടുത്തി.
മെട്രോപൊളിറ്റൻ മജിസ്‌ട്രേറ്റ് കാത്യായിനി ശർമ കണ്ട്വാളാണ് തൻ്റെ ചേംബറിൽ മലിവാളിൻ്റെ മൊഴി രേഖപ്പെടുത്തിയത്. സെക്‌ഷന്‍ 164 CrPC പ്രകാരം, ഒരു ജുഡീഷ്യൽ മജിസ്‌ട്രേറ്റിന് അന്വേഷണ വേളയിൽ തൻ്റെ മുമ്പാകെ നടത്തുന്ന ഏതെങ്കിലും മൊഴിയോ കുറ്റസമ്മതമോ രേഖപ്പെടുത്താൻ അധികാരമുണ്ട്.
വ്യാഴാഴ്ച ഡൽഹി പോലീസ് സെക്‌ഷന്‍ 323 (സ്വമേധയാ മുറിവേൽപ്പിക്കുക), 354 (സ്ത്രീയുടെ എളിമയെ പ്രകോപിപ്പിക്കാൻ ഉദ്ദേശിച്ചുള്ള ആക്രമണം അല്ലെങ്കിൽ ക്രിമിനൽ ബലപ്രയോഗം), 506 (ക്രിമിനൽ ഭീഷണിപ്പെടുത്തൽ), 509 (അപമാനപ്പെടുത്തൽ) എന്നിവ പ്രകാരം എഫ്ഐആർ രജിസ്റ്റർ ചെയ്തിരുന്നു. തുടർന്ന് എയിംസിൽ വൈദ്യപരിശോധന നടത്തി.
മുഖ്യമന്ത്രിയുടെ വസതിയിലെ ഡ്രോയിംഗ് റൂമിൽ കാത്തുനിൽക്കുമ്പോൾ പ്രൈവറ്റ് സെക്രട്ടറി ബിഭാവ് കുമാർ വന്ന് യാതൊരു പ്രകോപനവുമില്ലാതെ തന്നെ അടിച്ചെന്നും അടിവയറ്റില്‍ കുത്തുകയും ചെയ്തെന്ന് ഡൽഹി വനിതാ കമ്മീഷൻ മുൻ ചെയർപേഴ്‌സൺ മലിവാൾ പരാതിയിൽ പറയുന്നു.
തിങ്കളാഴ്ച രാവിലെ 9.34 ന് സിവിൽ ലൈൻസ് പോലീസ് സ്റ്റേഷനിൽ ഒരു പിസിആർ കോൾ വന്നതായി ഡിസിപി (നോർത്ത്) മനോജ് കുമാർ മീണ പറഞ്ഞു. മുഖ്യമന്ത്രി കെജ്‌രിവാളിൻ്റെ ഔദ്യോഗിക വസതിയിൽ വച്ച് മുഖ്യമന്ത്രിയുടെ പിഎസ് ബിഭാവ് കുമാർ തന്നെ ആക്രമിച്ചതായി വിളിച്ചയാൾ പറഞ്ഞതായും അദ്ദേഹം പറഞ്ഞു.
