കൊച്ചി: നടനും നിർമ്മാതാവുമായ സൗബിൻ ഷാഹിർ, നിർമ്മാതാവ് ഷോൺ ആൻ്റണി, സൗബിൻ്റെ പിതാവ് ബാബു ഷാഹിർ എന്നിവർക്കെതിരെ എറണാകുളം ജുഡീഷ്യൽ ഫസ്റ്റ് ക്ലാസ് മജിസ്‌ട്രേറ്റ് കോടതിയിൽ നിലനിൽക്കുന്ന വഞ്ചന, വ്യാജരേഖ ചമയ്ക്കൽ കേസിലെ നടപടികൾ കേരള ഹൈക്കോടതി ഒരു മാസത്തേക്ക് സ്റ്റേ ചെയ്തു. മലയാളത്തിലെ ഹിറ്റ് ചിത്രമായ മഞ്ഞുമ്മല്‍ ബോയ്‌സിൻ്റെ നിർമ്മാണവുമായി ബന്ധപ്പെട്ട തർക്കമാണ് കേസ്.
തനിക്കും സിനിമ നിർമ്മിച്ച തൻ്റെ നിർമ്മാണ കമ്പനിയുടെ മറ്റ് പങ്കാളികൾക്കും എതിരായ ക്രിമിനൽ കേസ് റദ്ദാക്കണമെന്ന് ആവശ്യപ്പെട്ട് ബാബു ഷാഹിർ സമർപ്പിച്ച ഹർജിയിലാണ് സ്റ്റേ ഉത്തരവ്. സിനിമയുടെ നിർമ്മാണത്തിന് പണം നിക്ഷേപിച്ചെന്ന് അവകാശപ്പെട്ട് സിറാജ് വലിയത്തറ ഹമീദ് നൽകിയ പരാതിയുടെ അടിസ്ഥാനത്തിലാണ് മരട് പോലീസ് കേസെടുത്തത്. കമ്പനിയുമായി ഉണ്ടാക്കിയ നിക്ഷേപ കരാറിലെ വ്യവസ്ഥകൾ പ്രകാരമുള്ള ലാഭം തനിക്ക് നൽകാൻ ഹർജിക്കാരനും മറ്റുള്ളവരും വിസമ്മതിച്ചതായി അദ്ദേഹം പരാതിയിൽ ആരോപിക്കുന്നു.
ബാബു ഷാഹിർ നൽകിയ കേസ് റദ്ദാക്കണമെന്ന് ആവശ്യപ്പെട്ടുള്ള ഹർജിയിൽ വാദം കേട്ടപ്പോൾ, തർക്കം സിവിൽ സ്വഭാവമുള്ളതാണെന്ന് ഹർജിക്കാരന് വേണ്ടി ഹാജരായ മുതിർന്ന അഭിഭാഷകൻ പി.വിജയഭാനു വാദിച്ചു. സിവിൽ തർക്കം പരിഹരിക്കാൻ ഹരജിക്കാരിൽ സമ്മർദ്ദം ചെലുത്താൻ പോലീസിന് മുമ്പാകെ പരാതി നൽകിയിരുന്നു. സിവിൽ തർക്കങ്ങൾ ക്രിമിനൽ നടപടികളിലൂടെ പരിഹരിക്കാൻ ശ്രമിക്കുന്ന രീതി സുപ്രീം കോടതി പല അവസരങ്ങളിലും നിരാകരിച്ചിരുന്നു. കൂടാതെ, പരാതിക്കാരൻ നേരത്തെ തന്നെ ആർബിട്രേഷൻ നടപടികൾ ആരംഭിച്ചിരുന്നു.
ഇന്ത്യൻ ശിക്ഷാ നിയമം (IPC) 120 ബി (ക്രിമിനൽ ഗൂഢാലോചനയ്‌ക്കുള്ള ശിക്ഷ), 34 (പൊതു ഉദ്ദേശ്യം), 406 (ക്രിമിനൽ വിശ്വാസ ലംഘനത്തിനുള്ള ശിക്ഷ), 420 (വഞ്ചനയും സത്യസന്ധമല്ലാത്ത വസ്തു കൈമാറ്റവും), 468 (വഞ്ചനയ്‌ക്ക് വ്യാജരേഖ ചമയ്ക്കൽ) എന്നീ വകുപ്പുകൾ പ്രകാരമാണ് ഇവർക്കെതിരെ കേസെടുത്തിരിക്കുന്നത്.
