നോര്‍ത്ത് ഈസ്റ്റ് അമേരിക്കന്‍ ഭദ്രാസനത്തിന്റെ ഈ വര്‍ഷത്തെ ഫാമിലി & യൂത്ത് കോണ്‍ഫറന്‍സ് പ്രമുഖരുടെ സാന്നിധ്യം കൊണ്ട് ശ്രദ്ധേയമാകും.
അഭിവന്ദ്യ സഖറിയ മാര്‍ നിക്കളാവോസ് മെത്രാപ്പോലീത്തയുടെ സാന്നിധ്യത്തിനും ആത്മീയ നേതൃത്വത്തിനും പുറമെ ഫാ. ഡോ. വര്‍ഗീസ് വര്‍ഗീസ് മീനടം, ഫാ. സെറാഫിം മജ് മുദാര്‍, ഫാ. ജോയല്‍ മാത്യു എന്നിവര്‍ കോണ്‍ഫറന്‍സില്‍ പ്രഭാഷകരായിരിക്കും.
കോട്ടയം ഭദ്രാസനത്തിലെ മീനടം സെന്റ് ജോര്‍ജ് ഓര്‍ത്തഡോക്‌സ് ഇടവകാംഗമാണ് ഫാ.ഡോ. വര്‍ഗീസ് വര്‍ഗീസ്. 1992-ല്‍ കോട്ടയം ഓര്‍ത്തഡോക്‌സ് തിയോളജിക്കല്‍ സെമിനാരിയില്‍ നിന്ന് ബിരുദം നേടി. ഇംഗ്ലീഷിലും സുറിയാനിയിലും ബിരുദാനന്തര ബിരുദം നേടിയിട്ടുണ്ട്. ഡോക്ടറല്‍ പഠനത്തിനിടയിലെ അദ്ദേഹത്തിന്റെ വൈജ്ഞാനിക ഗവേഷണം വെസ്റ്റേണ്‍ സുറിയാനി പാരമ്പര്യത്തിലെ എപ്പിഫനി പെരുന്നാളിനെ കേന്ദ്രീകരിച്ചായിരുന്നു. നിലവില്‍ പുതുപ്പള്ളി സെന്റ് ജോര്‍ജ് ഓര്‍ത്തഡോക്‌സ് പള്ളി വികാരിയായും മലങ്കര ഓര്‍ത്തഡോക്‌സ് സഭയുടെ മാനേജിംഗ് കമ്മിറ്റി അംഗമായും ഓര്‍ത്തഡോക്‌സ് സണ്‍ഡേ സ്‌കൂള്‍ അസോസിയേഷന്റെ ഡയറക്ടറായും സേവനമനുഷ്ഠിക്കുന്നു. മലങ്കര സഭയിലെ സുവിശേഷ പ്രാസംഗികരുടെ ശ്രേണിയില്‍ പ്രശസ്തമായ മുഖമാണ് ഫാ.ഡോ.വര്‍ഗീസ് വര്‍ഗീസ്.
അമേരിക്കയിലെ ഗ്രീക്ക് ഓര്‍ത്തഡോക്‌സ് സഭയുടെ സാന്‍ ഫ്രാന്‍സിസ്‌കോ മെട്രോപോളിസില്‍ നിന്നുള്ള ഒരു പുരോഹിതനാണ് സെറാഫിം മജ് മുദാര്‍. അദ്ദേഹം 2008-ല്‍ സെന്റ്. ടിഖോണ്‍സ് ഓര്‍ത്തഡോക്‌സ് തിയോളജിക്കല്‍ സെമിനാരിയില്‍ നിന്ന് ദിവ്യത്വത്തില്‍ ബിരുദം നേടി. ഗുജറാത്തി കുടിയേറ്റ മാതാപിതാക്കളുടെ മകനായ അദ്ദേഹം ഹിന്ദു മതത്തിലാണ് വളര്‍ന്നത്.
സാധാരണ ജനങ്ങള്‍ അവരുടെ ജീവിതത്തില്‍ അനുഭവിക്കുന്ന വേദനകളും കഷ്ടപ്പാടുകളും മനസ്സിലാക്കിയ അദ്ദേഹത്തിന്റെ ഇന്ത്യയിലെ യാത്രകള്‍ ജീവിതം മാറ്റിമറിച്ച അനുഭവമായിരുന്നു. അദ്ദേഹം ക്രിസ്തുവിനെ കണ്ടുമുട്ടുകയും അവന്റെ അസ്തിത്വത്തിന്റെ അര്‍ത്ഥവും ലക്ഷ്യവും മനസ്സിലാക്കുകയും ചെയ്തു. ഓര്‍ത്തഡോക്‌സ് വിശ്വാസത്തിലേക്ക് പരിവര്‍ത്തനം ചെയ്ത അദ്ദേഹം ഒടുവില്‍ ഒരു പുരോഹിതനായി നിയമിക്കപ്പെട്ടു. ഇപ്പോള്‍ കാലിഫോര്‍ണിയയിലെ സെന്റ് ലോറന്‍സ് ഓര്‍ത്തഡോക്‌സ് പള്ളിയിലെ വൈദികനായി ഫാ. സെറാഫിം സേവനം അനുഷ്ഠിക്കുന്നു.
അമേരിക്കയിലെ സൗത്ത് വെസ്റ്റ് ഭദ്രാസനത്തിലെ ഫാര്‍മേഴ്‌സ് ബ്രാഞ്ച് സെന്റ് മേരീസ് ഓര്‍ത്തഡോക്‌സ് വലിയപള്ളിയിലെ അംഗമാണ് ഫാ. ജോയല്‍ മാത്യു. 2011-ല്‍ സെന്റ് ടിഖോണ്‍സ് ഓര്‍ത്തഡോക്‌സ് തിയോളജിക്കല്‍ സെമിനാരിയില്‍ നിന്ന് ദിവ്യത്വത്തില്‍ ബിരുദം നേടി. നിലവില്‍ ടെക്‌സസിലെ ഡാളസ് സെന്റ് ഗ്രിഗോറിയോസ് ഓര്‍ത്തഡോക്‌സ് പള്ളി വികാരിയായി സേവനമനുഷ്ഠിക്കുന്നു. യുവാക്കള്‍ക്കിടയില്‍ നടത്തുന്ന വിശിഷ്ട സേവനം മൂലം ശ്രദ്ധേയമായ വ്യക്തിത്വമാണ് ഫാ. ജോയല്‍ മാത്യു.
2024 ജൂലൈ 10 മുതല്‍ 13 വരെ പെന്‍സില്‍വേനിയ ലാന്‍കസ്റ്ററിലെ വിന്‍ധം റിസോര്‍ട്ടിലാണ് കോണ്‍ഫറന്‍സ് നടക്കുന്നത്. ‘ദൈവിക ആരോഹണത്തിന്റെ ഗോവണി’ എന്ന വിഷയത്തെപ്പറ്റി ”ഭൂമിയിലുള്ള കാര്യങ്ങളിലല്ല, മുകളിലുള്ള കാര്യങ്ങളില്‍ നിങ്ങളുടെ മനസ്സ് സ്ഥാപിക്കുക” (കൊലൊ സ്യര്‍ 3:2) എന്ന വചനത്തെ ആസ്പദമാക്കിയാണ് കോണ്‍ഫറന്‍സിന്റെ ചിന്താവിഷയം. ബൈബിള്‍, വിശ്വാസം, സമകാലിക വിഷയങ്ങള്‍ എന്നിവയെ അടിസ്ഥാനമാക്കി കുട്ടികള്‍ക്കും യുവജനങ്ങള്‍ക്കും മുതിര്‍ന്നവര്‍ക്കും പ്രത്യേകം സംവേദനാത്മക സെഷനുകള്‍ ഉണ്ടായിരിക്കും.
കൂടുതല്‍ വിവരങ്ങള്‍ക്ക്, ഫാ. അബു പീറ്റര്‍, കോണ്‍ഫറന്‍സ് കോര്‍ഡിനേറ്റര്‍ (ഫോണ്‍: 914.806.4595) / ചെറിയാന്‍ പെരുമാള്‍, കോണ്‍ഫറന്‍സ് സെക്രട്ടറി (ഫോണ്‍. 516.439.9087) എന്നിവരുമായി ബന്ധപ്പെടുക.
