ന്യൂഡൽഹി: ഇന്ത്യയും ബംഗ്ലാദേശും ശനിയാഴ്ച രാജ്ഷാഹിക്കും കൊൽക്കത്തയ്ക്കും ഇടയിൽ പുതിയ ട്രെയിൻ സർവീസും ചിറ്റഗോങ്ങിനും കൊൽക്കത്തയ്ക്കും ഇടയിൽ പുതിയ ബസ് സർവീസും പ്രഖ്യാപിച്ചു. ന്യൂഡൽഹിയിൽ പ്രധാനമന്ത്രി നരേന്ദ്ര മോദിയും ബംഗ്ലാദേശ് പ്രധാനമന്ത്രി ഷെയ്ഖ് ഹസീനയും തമ്മിൽ നടന്ന ഉഭയകക്ഷി ചർച്ചയെ തുടർന്നാണ് പ്രഖ്യാപനം.
മോദി തുടർച്ചയായി മൂന്നാം തവണയും പ്രധാനമന്ത്രിയായ ശേഷം ഇന്ത്യയിലേക്ക് ഉഭയകക്ഷി സന്ദർശനം നടത്തുന്ന ആദ്യ വിദേശ നേതാവായി ഹസീന വെള്ളിയാഴ്ച ഇവിടെയെത്തി. ചർച്ചകൾക്ക് ശേഷം, കണക്റ്റിവിറ്റിയും വ്യാപാരവും വർദ്ധിപ്പിക്കുന്നതിനുള്ള പുതിയ നടപടികളും ഇരുപക്ഷവും പ്രഖ്യാപിച്ചു.
കൊൽക്കത്തയ്ക്കും രാജ്ഷാഹിക്കുമിടയിൽ പാസഞ്ചർ ട്രെയിൻ ഉടൻ സർവീസ് ആരംഭിക്കുമെന്ന് പ്രഖ്യാപിച്ചു. ബംഗ്ലാദേശ് റെയിൽവേയിലെ ഗെഡെ-ദർശന മുതൽ ഹൽദിബാരി-ചിലഹട്ടി ക്രോസ്-ബോർഡർ ഇൻ്റർചേഞ്ച് പോയിൻ്റ് വരെയുള്ള ഒരു ഗുഡ്സ് ട്രെയിൻ അടുത്ത മാസം ട്രയൽ റൺ ആരംഭിക്കും. കൊൽക്കത്തയ്ക്കും ചിറ്റഗോങ്ങിനുമിടയിൽ പുതിയ ബസ് സർവീസും ആരംഭിക്കും.
ബംഗ്ലാദേശിലെ സിറാജ്ഗഞ്ചിൽ ഇൻലാൻഡ് കണ്ടെയ്‌നർ ഡിപ്പോ നിർമ്മിക്കുന്നതിന് ഇന്ത്യ ധനസഹായം നൽകും.
ഇരു രാജ്യങ്ങളും തമ്മിലുള്ള ബന്ധത്തിൻ്റെ അടിത്തറയാണ് ജനങ്ങൾ തമ്മിലുള്ള സമ്പർക്കമെന്ന് മോദി തൻ്റെ പ്രസ്താവനയിൽ പറഞ്ഞു. ബംഗ്ലാദേശിൽ നിന്ന് ഇന്ത്യയിലേക്ക് വൈദ്യചികിത്സയ്ക്കായി വരുന്നവർക്ക് ഇ-മെഡിക്കൽ വിസ സൗകര്യം ഇന്ത്യ ആരംഭിക്കുമെന്ന് അദ്ദേഹം പറഞ്ഞു.
രംഗ്പൂരിൽ പുതിയ അസിസ്റ്റൻ്റ് ഹൈക്കമ്മീഷൻ തുറക്കാനും ഇന്ത്യ തീരുമാനിച്ചു.
ഡിജിറ്റൽ ഡൊമെയ്ൻ, മാരിടൈം സ്‌ഫിയർ, ബ്ലൂ ഇക്കോണമി, റെയിൽവേ, ബഹിരാകാശം, ഹരിത സാങ്കേതികവിദ്യ, ആരോഗ്യം, വൈദ്യശാസ്ത്രം തുടങ്ങിയ നിർണായക മേഖലകളിൽ ബന്ധം ശക്തിപ്പെടുത്തുന്നതിനുള്ള 10 കരാറുകളിൽ ഇരുരാജ്യങ്ങളും ഒപ്പുവച്ചു.
