തിരുവനന്തപുരം: പതിറ്റാണ്ടുകൾക്ക് മുമ്പ് തിരുവനന്തപുരത്തിൻ്റെ കിഴക്കൻ പ്രാന്തപ്രദേശമായ വിതുരയിലും പരിസരത്തുമുള്ള നൂറുകണക്കിന് വിദ്യാർത്ഥികൾക്ക് ഹോം ട്യൂഷനിലൂടെ ഇംഗ്ലീഷ് പഠിപ്പിച്ചിരുന്ന അദ്ധ്യാപകന്‍ കൃഷ്ണ പിള്ളയ്ക്ക് എന്‍ എസ് എസ് വൊളണ്ടിയര്‍മാരായ വിദ്യാര്‍ത്ഥികളുടെ കൈത്താങ്ങ്. 80-നോട് അടുക്കുന്ന ‘പിള്ള സാറിന്’ ഇപ്പോള്‍ തല ചായ്ക്കാന്‍ ഒരു കൂരയോ കുടുംബമോ ഇല്ല. അദ്ദേഹം വെയിറ്റിംഗ് ഷെഡുകളിലും കട വരാന്തകളിലും അഭയം തേടുന്ന കാഴ്ച വിതുരയിലെ ജനങ്ങൾക്ക് പതിവ് കാഴ്ചയാണ്.
വിതുര ഗവൺമെൻ്റ് വൊക്കേഷണൽ ഹയർ സെക്കൻഡറി സ്കൂളിലെ വിഎച്ച്എസ്ഇ-എൻഎസ്എസ് പ്രോഗ്രാം ഓഫീസറായ അരുൺ വിപിയും പിള്ളയെ മിക്കവാറും എല്ലാ ദിവസവും സ്കൂളിലേക്കുള്ള യാത്രാമധ്യേ കാണാറുണ്ടായിരുന്നു.
മുൻ അദ്ധ്യാപകൻ്റെ ദുരവസ്ഥയിൽ മനംനൊന്ത് പിള്ളയുടെ കഥ സ്കൂളിലെ എൻഎസ്എസ് വളണ്ടിയർമാരോട് അരുണ്‍ വിവരിച്ചു.
അങ്ങനെയാണ് അവശ്യവസ്തുക്കളും മരുന്നുകളും വാങ്ങാൻ പിള്ളയെ സഹായിക്കാൻ പെൻഷൻ്റെ രൂപത്തിൽ പ്രതിമാസ സഹായം നൽകാമെന്ന ആശയം അവർ ഒരുമിച്ചെടുത്തത്.
ഒരു കര്‍ഷക കുടുംബത്തിലാണ് കൃഷ്ണ പിള്ള ജനിച്ചത്. അദ്ദേഹം നിരവധി വിദ്യാർത്ഥികളെ പഠിപ്പിച്ചിട്ടുണ്ട്. അവരിൽ ഭൂരിഭാഗവും ഇപ്പോൾ നല്ല നിലയിലെത്തുകയും ചെയ്തിട്ടുണ്ട്. എന്നാല്‍, സർക്കാരിൻ്റെ ക്ഷേമ പെൻഷൻ ക്ലെയിം ചെയ്യാൻ അദ്ദേഹത്തിന് ആധാർ കാർഡ് പോലും ഇല്ല എന്ന് അരുൺ പറഞ്ഞു. അങ്ങനെയാണ് ക്ഷേമ പെൻഷനായി സർക്കാരില്‍ നിന്ന് ലഭിക്കേണ്ട 1600 രൂപ എല്ലാ മാസവും പിള്ളയ്ക്ക് നൽകാൻ എൻഎസ്എസ് യൂണിറ്റ് തീരുമാനിച്ചത്.
വിദ്യാർത്ഥികൾ അവർ നിർമ്മിക്കുന്ന ഉൽപ്പന്നങ്ങളുടെ വിൽപ്പനയിലൂടെ നേടുന്ന ലാഭം വഴിയാണ് ഫണ്ട് കണ്ടെത്തുന്നത്. പിള്ളയ്ക്ക് കഴിഞ്ഞ മാസം ആദ്യ ‘പെൻഷൻ’ കൈമാറി.
സ്കൂളിലെ അദ്ധ്യാപകരിൽ പിള്ളയുടെ പൂർവ വിദ്യാർഥികളും
“ചന്ദനത്തിരി, സോപ്പ്, ഡിഷ് വാഷ് ജെൽ, മൾട്ടി സർഫേസ് ക്ലീനർ തുടങ്ങിയ ഉൽപ്പന്നങ്ങൾ അടങ്ങിയ 200 രൂപ വിലയുള്ള ഒരു പാക്കേജ് എൻഎസ്എസ് വോളൻ്റിയർമാർ പുറത്തിറക്കിയിട്ടുണ്ട്. കൃഷ്ണ പിള്ള സാറിനെ സഹായിക്കാന്‍ അവർക്ക് പ്രതിമാസം 40 യൂണിറ്റുകൾ വിൽക്കേണ്ടതുണ്ട്, ”അരുൺ പറഞ്ഞു.
70-ാം വയസ്സിൽ മാസ്റ്റേഴ്‌സ് അത്‌ലറ്റിക് ഇനങ്ങളിൽ ഏതാനും മെഡലുകളും പിള്ള നേടിയിട്ടുണ്ട്. വിദ്യാർത്ഥി കായിക താരങ്ങൾക്ക് പരിശീലനവും നുറുങ്ങുകളും നൽകുന്നതിനായി അടുത്തിടെ വരെ അദ്ദേഹം സ്കൂൾ സന്ദർശിച്ചിരുന്നു. സ്കൂളിലെ ഇപ്പോഴത്തെ അദ്ധ്യാപകരിൽ കുറച്ചുപേർ പിള്ളയുടെ പൂർവ വിദ്യാർഥികളാണ്.
എൻഎസ്എസ് വൊളൻ്റിയർമാർ തങ്ങളുടെ സാമൂഹിക സേവന സംരംഭങ്ങളിലൂടെ വ്യക്തിമുദ്ര പതിപ്പിക്കുന്നത് ഇതാദ്യമല്ലെന്ന് പ്രിൻസിപ്പൽ മഞ്ജുഷ എആർ പറഞ്ഞു. കഴിഞ്ഞ വർഷം രോഗം ബാധിച്ച് പിതാവിനെ നഷ്ടപ്പെട്ട സഹപാഠിക്ക് 100 ദിവസം കൊണ്ട് വീട് നിർമിക്കാൻ യൂണിറ്റ് 8 ലക്ഷം രൂപ സമാഹരിച്ചിരുന്നു. പഞ്ചായത്തിലെ 25 ഓളം സ്ഥലങ്ങൾ എൻഎസ്എസ് വോളൻ്റിയർമാർ വൃത്തിയാക്കുകയും പരിപാലിക്കുകയും ചെയ്യുന്നു.
