ധാക്ക: ബംഗ്ലാദേശിലെ ജനങ്ങളുടെ അക്രമാസക്തമായ പ്രതിഷേധത്തെ തുടർന്ന് പ്രധാനമന്ത്രി ഷെയ്ഖ് ഹസീനയ്ക്ക് രാജ്യം വിടേണ്ടിവന്നതിനു പിറകെ, ഇപ്പോൾ ബംഗ്ലാദേശ് സുപ്രീം കോടതി ചീഫ് ജസ്റ്റിസ് ഒബൈദുൽ ഹസനെ ലക്ഷ്യമിട്ട് പ്രതിഷേധക്കാര്‍. ഇന്ന് രാവിലെ സുപ്രീം കോടതി പരിസരം വളഞ്ഞ പ്രതിഷേധക്കാർ ചീഫ് ജസ്റ്റിസിനും മറ്റ് ജഡ്ജിമാർക്കും രാജി വെയ്ക്കാന്‍ പ്രാദേശിക സമയം ഉച്ചയ്ക്ക് ഒരു മണി വരെ സമയം നല്‍കിയിരിക്കുകയാണ്.
പ്രസിഡൻ്റ് മുഹമ്മദ് ഷഹാബുദ്ദീനുമായുള്ള ചർച്ചയ്ക്ക് ശേഷം വൈകുന്നേരത്തോടെ ചീഫ് ജസ്റ്റിസ് ഒബൈദുൽ ഹസൻ രാജിവെച്ചേക്കുമെന്നാണ് പുറത്തുവരുന്ന വാര്‍ത്തകള്‍. പ്രതിഷേധക്കാർ സുപ്രീം കോടതി സമുച്ചയം വളഞ്ഞപ്പോഴാണ് അദ്ദേഹം ഇക്കാര്യം അറിയിച്ചത്. ഈ ജഡ്ജിമാർ രാജിവച്ചില്ലെങ്കിൽ അവരുടെ വീടുകൾ വളയുമെന്നും അവരെ പിടികൂടുമെന്നും സമരക്കാർ ഭീഷണിപ്പെടുത്തിയതായി മാധ്യമങ്ങൾ റിപ്പോർട്ട് ചെയ്യുന്നു. ഇന്ന് രാവിലെ 10.30 മുതൽ നൂറുകണക്കിന് പ്രതിഷേധക്കാർ സുപ്രീം കോടതി പരിസരത്ത് തടിച്ചുകൂടാൻ തുടങ്ങി. നിരവധി വിദ്യാർത്ഥികളും അഭിഭാഷകരും ഇതിൽ പങ്കാളികളായി. ചീഫ് ജസ്റ്റിസിൻ്റെയും മറ്റ് ജഡ്ജിമാരുടെയും രാജിയാണ് ഇവര്‍ ആവശ്യപ്പെട്ടത്.
ഇന്ന് രാവിലെയാണ് ഇടക്കാല സർക്കാരിൻ്റെ യുവജന കായിക മന്ത്രി ആസിഫ് മുഹമ്മദ് ചീഫ് ജസ്റ്റിസിൻ്റെ രാജി ആവശ്യപ്പെട്ട് ഫേസ്‌ബുക്ക് പോസ്റ്റ് ഇട്ടത്. ഇതേത്തുടർന്ന് ചീഫ് ജസ്റ്റിസ് എല്ലാ യോഗങ്ങളും റദ്ദാക്കി. കഴിഞ്ഞ വർഷം മാത്രമാണ് അദ്ദേഹം ചീഫ് ജസ്റ്റിസായത്. ഷെയ്ഖ് ഹസീനയുമായി അടുപ്പമുള്ളയാളാണ് അദ്ദേഹം. പ്രതിഷേധ പ്രകടനങ്ങളിൽ നിരവധി പേർക്ക് ജീവൻ നഷ്ടപ്പെടുകയും നിരവധി അക്രമങ്ങൾ ഉണ്ടാകുകയും ചെയ്തിട്ടുണ്ട്. പ്രതിഷേധക്കാർ ബംഗ്ലാദേശ് പ്രധാനമന്ത്രിയുടെ വസതിയിൽ കയറി വൻതോതിൽ കൊള്ളയടിക്കുന്ന കാഴ്ചയാണ് കണ്ടത്.
തുടർച്ചയായ പ്രതിഷേധങ്ങൾക്കും ഈ പ്രകടനങ്ങൾ അക്രമാസക്തമായ രൂപത്തിനും ശേഷം ഷെയ്ഖ് ഹസീന തൻ്റെ സ്ഥാനം രാജിവച്ച് ബംഗ്ലാദേശിൽ നിന്ന് ഇന്ത്യയിലെത്തി. അന്നു മുതല്‍ ഇന്ത്യയില്‍ തന്നെയാണ്. അതേസമയം, മുഹമ്മദ് യൂനസിൻ്റെ നേതൃത്വത്തിൽ ബംഗ്ലാദേശിൽ പുതിയ ഇടക്കാല സർക്കാർ രൂപീകരിച്ചു. തെരഞ്ഞെടുപ്പിന് ശേഷം മാത്രമേ ഷെയ്ഖ് ഹസീന ബംഗ്ലാദേശിലേക്ക് മടങ്ങുകയുള്ളൂവെന്ന് മകൻ പറയുന്നു.
