ധാക്ക : സർക്കാർ വിരുദ്ധ പ്രതിഷേധങ്ങൾക്കിടയിൽ ഓഗസ്റ്റ് 5 ന് രാജ്യം വിടുന്നതിന് മുമ്പ് ഷെയ്ഖ് ഹസീന ബംഗ്ലാദേശ് പ്രധാനമന്ത്രിസ്ഥാനം ഔദ്യോഗികമായി രാജിവച്ചില്ലെന്ന് മകൻ സജീബ് വസേദ് ജോയ് ശനിയാഴ്ച ഒരു മാധ്യമത്തോട് പറഞ്ഞു.
“എൻ്റെ അമ്മ ഒരിക്കലും ഔദ്യോഗികമായി രാജിവച്ചിട്ടില്ല. അവര്‍ക്ക് അതിന് സമയം ലഭിച്ചില്ല,”സജീബ് വാസെദ് ജോയ് വാഷിംഗ്ടണിൽ നിന്ന് മാധ്യമങ്ങളോട് പറഞ്ഞു.
“ഒരു പ്രസ്താവന നടത്താനും രാജി സമർപ്പിക്കാനും അവര്‍ പദ്ധതിയിട്ടിരുന്നു. എന്നാൽ, പിന്നീട് പ്രതിഷേധക്കാർ പ്രധാനമന്ത്രിയുടെ വസതിയിലേക്ക് മാർച്ച് ചെയ്യാൻ തുടങ്ങി. പിന്നെ സമയമില്ലായിരുന്നു. എൻ്റെ അമ്മ പാക്ക് പോലും ചെയ്തിരുന്നില്ല. ഭരണഘടനയനുസരിച്ച്, അവർ ഇപ്പോഴും ബംഗ്ലാദേശിൻ്റെ പ്രധാനമന്ത്രിയാണ്, ” അദ്ദേഹം പറഞ്ഞു.
നിയമ നിർവ്വഹണ ഏജൻസികളുമായുള്ള ഏറ്റുമുട്ടലിൽ 200-ലധികം പേർ കൊല്ലപ്പെട്ടതിനെത്തുടർന്ന് വൻതോതിലുള്ള സർക്കാർ വിരുദ്ധ പ്രതിഷേധങ്ങളെത്തുടർന്ന് ഷെയ്ഖ് ഹസീന ഓഗസ്റ്റ് 5 ന് ഇന്ത്യയിലേക്ക് പലായനം ചെയ്തു.
സർക്കാർ ജോലികളിലെ ക്വാട്ടയ്‌ക്കെതിരെ കഴിഞ്ഞ മാസം ആരംഭിച്ച പ്രതിഷേധം പ്രധാനമന്ത്രിയെ പുറത്താക്കാനുള്ള നീക്കമായി രൂപാന്തരപ്പെട്ടു. ഇന്ത്യയിലെത്തിയ ശേഷം ഡൽഹിയിൽ സുരക്ഷിതമായ വീട്ടിലാണ് ഹസീന താമസിക്കുന്നത്.
ധാക്കയിൽ, സൈന്യത്തിൻ്റെ നിയന്ത്രണത്തിൽ, നോബൽ സമ്മാന ജേതാവ് പ്രൊഫ. മൊഹമ്മദ് യൂനസിൻ്റെ നേതൃത്വത്തിലുള്ള ഇടക്കാല സർക്കാർ വ്യാഴാഴ്ച സത്യപ്രതിജ്ഞ ചെയ്തു.
സൈനിക മേധാവികളുമായും പ്രതിപക്ഷ രാഷ്ട്രീയക്കാരുമായും കൂടിയാലോചിച്ച ശേഷം ബംഗ്ലാദേശ് പ്രസിഡൻ്റ് പാർലമെൻ്റ് പിരിച്ചുവിട്ടുവെങ്കിലും പ്രധാനമന്ത്രി ഔപചാരികമായി രാജിവെക്കാതെ ഒരു താൽക്കാലിക സർക്കാർ രൂപീകരിക്കുന്നത് കോടതിയിൽ വെല്ലുവിളിക്കാമെന്ന് ഹസീനയുടെ മകൻ പറഞ്ഞു.
അടുത്ത തെരഞ്ഞെടുപ്പിൽ ഹസീനയുടെ അവാമി ലീഗ് പാർട്ടി മത്സരിക്കുമെന്നും അത് മൂന്ന് മാസത്തിനകം നടത്തണമെന്നും അദ്ദേഹം പറഞ്ഞു.
“അവാമി ലീഗ് അധികാരത്തിൽ വരുമെന്ന് എനിക്ക് ഉറപ്പുണ്ട്. ഇല്ലെങ്കിൽ ഞങ്ങൾ പ്രതിപക്ഷമാകും. എന്തായാലും കൊള്ളാം,” അദ്ദേഹം പറഞ്ഞു.
അവാമി ലീഗിൻ്റെ പ്രധാനമന്ത്രി സ്ഥാനാർത്ഥിയാകുമോ എന്ന ചോദ്യത്തിന് അദ്ദേഹം പറഞ്ഞു: “എന്തായാലും ഈ കാലാവധി കഴിഞ്ഞ് എൻ്റെ അമ്മ വിരമിക്കാൻ പോകുകയാണ്. പാർട്ടിക്ക് എന്നെ വേണമെങ്കിൽ, ഒരുപക്ഷേ. ഞാൻ തീർച്ചയായും അത് പരിഗണിക്കും.”
കലാപത്തിന് നേതൃത്വം നൽകിയ വിദ്യാർഥികൾ ആവശ്യപ്പെട്ടതനുസരിച്ച് ബംഗ്ലാദേശില്‍ വിചാരണ നേരിടാൻ അമ്മ തയ്യാറാണെന്നും അദ്ദേഹം പറഞ്ഞു.
“അറസ്റ്റ് ഭീഷണി എൻ്റെ അമ്മയെ മുമ്പൊരിക്കലും ഭയപ്പെടുത്തിയിട്ടില്ല. എൻ്റെ അമ്മ ഒരു തെറ്റും ചെയ്തിട്ടില്ല. അവരുടെ ഗവൺമെൻ്റിലെ ആളുകൾ നിയമവിരുദ്ധമായ കാര്യങ്ങൾ ചെയ്തു എന്നതുകൊണ്ട് എൻ്റെ അമ്മ ഉത്തരവിട്ടു എന്നല്ല അർത്ഥമാക്കുന്നത്. അതിനർത്ഥം എൻ്റെ അമ്മയാണ് അതിന് ഉത്തരവാദി എന്നല്ല,” അദ്ദേഹം പറഞ്ഞു.
പ്രതിഷേധത്തിനിടെ ആളുകളെ വെടിവച്ചുകൊല്ലാൻ അനുവദിച്ചതിന് സർക്കാരിൽ ആരാണ് ഉത്തരവാദിയെന്ന് അദ്ദേഹം പറഞ്ഞില്ല.
“ഒരു സർക്കാർ ഒരു വലിയ, വലിയ യന്ത്രമാണ്,” ജോയ് പറഞ്ഞു. ‘ഉത്തരവാദികളായവരെ നിയമത്തിന് മുന്നിൽ കൊണ്ടുവരണം. പ്രതിഷേധക്കാർക്കെതിരെ അക്രമം നടത്താൻ എൻ്റെ അമ്മ ആരോടും കൽപിച്ചിട്ടില്ല. പോലീസ് അക്രമം തടയാൻ ശ്രമിക്കുകയായിരുന്നു. എന്നാൽ, ചില പോലീസ് ഉദ്യോഗസ്ഥർ അമിത ബലം പ്രയോഗിച്ചു.
വിദ്യാർത്ഥികൾക്ക് നേരെ വെടിയുതിർത്ത പോലീസ് ഉദ്യോഗസ്ഥരെ ഞങ്ങൾ സസ്പെൻഡ് ചെയ്തു. ഞങ്ങളാൽ കഴിയുന്നതെല്ലാം ഞങ്ങൾ ചെയ്തു എന്നും അദ്ദേഹം പറഞ്ഞു.
