വാഷിംഗ്ടൺ: വൈറ്റ് ഹൗസിലെ തൻ്റെ ഡെമോക്രാറ്റിക് എതിരാളിക്കെതിരെ വ്യക്തിപരമായ ആക്രമണം നടത്താൻ തനിക്ക് അർഹതയുണ്ടെന്ന് മുൻ യു എസ് പ്രസിഡൻ്റ് ഡൊണാൾഡ് ട്രംപ് വ്യാഴാഴ്ച തറപ്പിച്ചു പറഞ്ഞു. തനിക്ക് അവരോട് ദേഷ്യമുണ്ടെന്നു മാത്രമല്ല, അവര്‍ തന്നെ വ്യക്തിപരമായി ആക്രമിക്കുകയും ചെയ്തു എന്നും ട്രംപ് പറഞ്ഞു.
കമലാ ഹാരിസിൻ്റെ വംശീയതയെ ട്രംപ് ചോദ്യം ചെയ്യുകയും, അവരുടെ പേര് തെറ്റായി ഉച്ചരിക്കുകയും അവരെ “ഭ്രാന്തി” എന്ന് വിളിക്കുകയും ചെയ്തു. മാത്രമല്ല, ഹാരിസിന്റെ ചിരിയെ പരിഹസിക്കുകയും തിരഞ്ഞെടുപ്പ് റാലികളിലും പത്രസമ്മേളനങ്ങളിലും സോഷ്യൽ മീഡിയ പോസ്റ്റിംഗുകളിലും അവരുടെ ബുദ്ധിയെ സംശയിക്കുകയും ചെയ്തു. ഹാരിസിനെ തന്റെ നിബന്ധനകളിൽ നിർവചിക്കാനും മത്സരത്തിൻ്റെ നിയന്ത്രണം വീണ്ടെടുക്കാനും അദ്ദേഹം പാടുപെടുന്നതും പല വേദികളിലും കാണാമായിരുന്നു.
ഹാരിസുമായുള്ള നയപരമായ വ്യത്യാസങ്ങളിലും സമ്പദ്‌വ്യവസ്ഥ, അനധികൃത കുടിയേറ്റം തുടങ്ങിയ വിഷയങ്ങളിലും ശ്രദ്ധ കേന്ദ്രീകരിക്കാൻ ട്രംപിൻ്റെ സഖ്യകക്ഷികളും ഉപദേശകരും അഭ്യർത്ഥിച്ചു. അവിടെയാണ് അദ്ദേഹത്തിന് നേട്ടമുണ്ടാക്കാന്‍ കഴിയുക. അല്ലാതെ, വോട്ടർമാർക്ക് അനുയോജ്യമല്ലാത്ത വ്യക്തിഗത ആക്രമണങ്ങളിൽ തൻ്റെ കഴിവ് പാഴാക്കരുതെന്നും അവര്‍ ഉപദേശിച്ചു.
“എനിക്കും മറ്റ് ആളുകൾക്കുമെതിരെ ഹാരിസ് നീതിന്യായ വ്യവസ്ഥയെ ആയുധമാക്കിയതിൽ എനിക്ക് അവരോട് വളരെ ദേഷ്യമുണ്ട്,” ട്രംപ് ന്യൂജേഴ്‌സിയിലെ തൻ്റെ ബെഡ്മിൻസ്റ്റർ ഗോൾഫ് ക്ലബ്ബിൽ ഒരു വാർത്താ സമ്മേളനത്തിൽ പറഞ്ഞു. അതെന്താണെന്ന് അദ്ദേഹം വ്യക്തമാക്കിയില്ല. എന്നാൽ, ഹാരിസോ പ്രസിഡൻ്റ് ജോ ബൈഡനോ ഈ പ്രോസിക്യൂഷനുകൾക്ക് നിർദ്ദേശം നൽകിയതിന് തെളിവില്ലെങ്കിലും, ബൈഡൻ-ഹാരിസ് ഭരണകൂടത്തിൻ്റെ നീതിന്യായ വകുപ്പ് തനിക്കെതിരെ ചുമത്തിയ ക്രിമിനൽ കുറ്റങ്ങളായിരിക്കാം അദ്ദേഹം പരാമർശിച്ചത്.
“വ്യക്തിപരമായ ആക്രമണങ്ങൾക്ക് ഞാൻ അർഹനാണെന്ന് ഞാൻ കരുതുന്നു. എനിക്ക് അവരോട് അത്ര വലിയ ബഹുമാനമൊന്നുമില്ല. അവരുടെ ബുദ്ധിയോട് എനിക്ക് വലിയ ബഹുമാനമില്ല, അവര്‍ ഭയങ്കര പ്രസിഡൻ്റായിരിക്കുമെന്നും എനിക്ക് അഭിപ്രായമില്ല, ഞങ്ങൾ വിജയിക്കുന്നത് വളരെ പ്രധാനമാണെന്നാണ് ഞാൻ കരുതുന്നത്,” അദ്ദേഹം പറഞ്ഞു.
“വ്യക്തിപരമായ ആക്രമണങ്ങൾ നല്ലതായാലും ചീത്തയായാലും, അവര്‍ തീർച്ചയായും എന്നെ വ്യക്തിപരമായി ആക്രമിക്കും. അവര്‍ എന്നെ ശരിക്കും വിചിത്രമായി ചിത്രീകരിച്ചു,” അദ്ദേഹം കൂട്ടിച്ചേര്‍ത്തു.
ട്രംപിനെയും അദ്ദേഹത്തിൻ്റെ പ്രവർത്തനങ്ങളെയും അദ്ദേഹത്തിൻ്റെ റണ്ണിംഗ് മേറ്റ് സെനറ്റർ ജെ ഡി വാൻസിനേയും ഹാരിസ് “വിചിത്രം” എന്നാണ് വിശേഷിപ്പിച്ചത്. അതാണ് ട്രം‌പിനെ ചൊടിപ്പിച്ചതും.
നയത്തേക്കാൾ വ്യക്തിപരമായി ട്രംപ് കമലാ ഹാരിസിനെ ആക്രമിക്കുമ്പോൾ, സ്വിംഗ് വോട്ടർമാർക്കിടയിൽ ഹാരിസിൻ്റെ പിന്തുണ ഉയരുകയാണ്, പ്രത്യേകിച്ച് സ്ത്രീകൾക്കിടയിൽ എന്ന് മുൻ ട്രംപ് ഉപദേശകനായ പീറ്റർ നവാരോ ഒരു വാർത്താ പ്രസിദ്ധീകരണത്തോട് പറഞ്ഞു.
