ഷിക്കാഗോ: ഗാസയിലെ യുദ്ധത്തിനെതിരെ പ്രതിഷേധവുമായി ആയിരക്കണക്കിന് പ്രകടനക്കാര്‍ ഡെമോക്രാറ്റിക് നാഷണൽ കൺവെൻഷൻ്റെ ഉദ്ഘാടന ദിനമായ തിങ്കളാഴ്ച സുരക്ഷാ വേലി തകർത്ത് അകത്തു കടക്കാന്‍ ശ്രമിച്ചു.
ഇസ്രായേൽ-ഹമാസ് യുദ്ധത്തിൽ വെടിനിർത്തലിന് ആഹ്വാനം ചെയ്യുന്നതിനായി സ്‌ട്രോളറുകളിൽ കുഞ്ഞുങ്ങളുമായി കുടുംബങ്ങളും വിദ്യാർത്ഥികളും തിരഞ്ഞെടുക്കപ്പെട്ട നേതാക്കളും മറ്റുള്ളവരും പ്ലക്കാര്‍ഡുകളും ബാനറുകളുമേന്തി കൺവെൻഷൻ നടക്കുന്ന യുണൈറ്റഡ് സെൻ്ററിലേക്ക് മാർച്ച് ചെയ്തു. ഒരു വലിയ സംഘം സമാധാനപരമായി മാർച്ച് ചെയ്തപ്പോൾ, ഏതാനും ഡസൻ പേർ സുരക്ഷാ വേലി തകര്‍ത്ത് അകത്തു കയറാന്‍ ശ്രമിച്ചത് സംഘര്‍ഷത്തിന് കാരണമായി.
വേലിയിലൂടെ നുഴഞ്ഞു കയറിയ നിരവധി പ്രതിഷേധക്കാരെ പോലീസ് കസ്റ്റഡിയിലെടുക്കുകയും കൈകൾ കൂട്ടികെട്ടുകയും ചെയ്തു. ചില പ്രതിഷേധക്കാർ പോലീസിന് മുന്നിൽ സ്ഥാപിച്ച രണ്ടാമത്തെ വേലി തകര്‍ക്കാന്‍ ശ്രമിച്ചപ്പോൾ ഉദ്യോഗസ്ഥർ ഗ്യാസ് മാസ്ക് ധരിച്ച് അവരെ നേരിട്ടു. കൺവെൻഷൻ സ്ഥലത്തിന് ചുറ്റുമുള്ള ആന്തരിക സുരക്ഷാ പരിധി ലംഘിച്ചിട്ടില്ലെന്നും കൺവെൻഷനിൽ പങ്കെടുക്കുന്നവർക്ക് ഒരു ഭീഷണിയുമുണ്ടായിരുന്നില്ലെന്നും അധികൃതർ അറിയിച്ചു.
വേലി തകര്‍ത്ത പ്രതിഷേധക്കാരിൽ ചിലർ വെള്ളക്കുപ്പികളും മറ്റും പോലീസിനുനേരെ എറിഞ്ഞതായി ഷിക്കാഗോ പോലീസ് സൂപ്രണ്ട് ലാറി സ്‌നെല്ലിംഗ് പറഞ്ഞു. ബാറ്റണുകളോ രാസവസ്തുക്കളോ ഉപയോഗിക്കാതെയാണ് പോലീസ് സ്ഥിതിഗതികൾ നിയന്ത്രണവിധേയമാക്കിയതെന്നും അദ്ദേഹം പറഞ്ഞു.
ബൈഡനെതിരെ പ്രതിഷേധക്കാര്‍ മുദ്രാവാക്യം വിളിക്കുകയും “വംശ ഹത്യ ജോ” എന്ന് ആക്രോശിക്കുകയും ചെയ്തു. കമലാ ഹാരിസിനെതിരെയും അവര്‍ മുദ്രാവാക്യം വിളിച്ചു.
ബൈഡന്‍ മത്സരത്തില്‍ നിന്ന് പിന്മാറിയെങ്കിലും തങ്ങളുടെ പദ്ധതികളിൽ മാറ്റമൊന്നും സംഭവിച്ചിട്ടില്ലെന്നും, ഈ ആഴ്ച ഡെമോക്രാറ്റിക് നാമനിർദ്ദേശം ഔപചാരികമായി സ്വീകരിക്കുന്ന കമലാ ഹാരിസിന് പിന്നിൽ പാർട്ടി പെട്ടെന്ന് അണിനിരന്നുവെന്നും പ്രതിഷേധക്കാർ പറഞ്ഞു.
അധികൃതർ നല്ല തയ്യാറെടുപ്പിലായിരുന്നു എന്ന് മേയർ ബ്രാൻഡൻ ജോൺസൺ പറഞ്ഞു. “ഇതുപോലുള്ള സാഹചര്യങ്ങള്‍ കൈകാര്യം ചെയ്യാന്‍ ഷിക്കാഗോ നഗരം ശരിക്കും മികച്ചതാണ്,” അദ്ദേഹം ഒരു വാർത്താ സമ്മേളനത്തിൽ പറഞ്ഞു.
തിങ്കളാഴ്ചത്തെ റാലിയിലും മാർച്ചിലും 20,000 പേരെങ്കിലും പങ്കെടുക്കുമെന്ന് സംഘാടകർ പ്രതീക്ഷിച്ചിരുന്നു. എന്നാൽ, ജനക്കൂട്ടത്തിൻ്റെ കണക്ക് നൽകാൻ നഗര ഉദ്യോഗസ്ഥർ വിസമ്മതിച്ചെങ്കിലും ഏതാനും ആയിരങ്ങൾ മാത്രമേ പങ്കെടുത്തിരുന്നുള്ളൂ.
രാജ്യത്തെ ഏറ്റവും വലിയ പലസ്തീനിയൻ കമ്മ്യൂണിറ്റികളിലൊന്നാണ് ഷിക്കാഗോ പ്രദേശത്തുള്ളത്. കൂടാതെ, രാജ്യത്തുടനീളമുള്ള പ്രവർത്തകരെ ബസ്സുകളില്‍ കൊണ്ടുവരികയായിരുന്നു.
ഫ്രീഡം റോഡ് സോഷ്യലിസ്റ്റ് ഓർഗനൈസേഷൻ്റെ സംഘാടകനായ ടെയ്‌ലർ കുക്ക് അറ്റ്ലാൻ്റയിൽ നിന്ന് പ്രതിഷേധ പ്രകടനത്തില്‍ പങ്കെടുക്കാനെത്തി. ഹാരിസിൽ പ്രത്യേക ശ്രദ്ധ കേന്ദ്രീകരിച്ച് ഇസ്രയേലിനുള്ള സഹായം അവസാനിപ്പിക്കാൻ ആവശ്യപ്പെടാൻ ഗ്രൂപ്പ് എല്ലാ ഡെമോക്രാറ്റുകളെയും പ്രേരിപ്പിക്കുകയാണെന്നും കുക്ക് പറഞ്ഞു.
വാഷിംഗ്ടൺ ഡിസിയിൽ നിന്ന് ഷിക്കാഗോയിലേക്ക് യാത്ര ചെയ്ത മെഡിയ ബെഞ്ചമിൻ, സമാധാനത്തിനായി ആഹ്വാനം ചെയ്യുന്ന സ്ത്രീകളുടെ നേതൃത്വത്തിലുള്ള ഒരു കൂട്ടം പ്രതിഷേധക്കാരുമായി, ഇസ്രായേലിന് 20 ബില്യൺ ഡോളർ അധിക ആയുധ വിൽപ്പനയ്ക്ക് അടുത്തിടെ ബൈഡൻ ഭരണകൂടം അംഗീകാരം നൽകിയതിൽ ഞെട്ടിപ്പോയി എന്ന് പറഞ്ഞു.
“ഈ രാജ്യത്ത് ആളുകൾ എന്താണ് ആവശ്യപ്പെടുന്നത് എന്നതിലും ഭരണകൂടം എന്താണ് ചെയ്യുന്നത് എന്നതിലും അവിശ്വസനീയമായ പൊരുത്തക്കേടുണ്ട്,” യൂണിയൻ പാർക്കിലെ റാലിക്ക് മുന്നോടിയായി അവർ പറഞ്ഞു.
റാലിക്കിടെ 40 ഓളം ഇസ്രായേൽ അനുകൂലികൾ പാർക്കിന് ചുറ്റും നടന്നു. ഇസ്രയേലി പതാകകൾ വീശിയപ്പോൾ നിശബ്ദത പാലിച്ചുകൊണ്ട് സൈക്കിളിൽ 20 ഓളം പോലീസ് ഉദ്യോഗസ്ഥരും അവരെ അനുഗമിച്ചു. ചില സമയങ്ങളിൽ പിരിമുറുക്കം ഉണ്ടായെങ്കിലും മറ്റു അനിഷ്ട സംഭവങ്ങളൊന്നും ഉണ്ടായില്ല.
