ഹ്യൂസ്റ്റണ്‍: നേപ്പാളിൽ നിന്നുള്ള 21 കാരിയായ കോളേജ് വിദ്യാർത്ഥിനിയായ മുന പാണ്ഡെയെ ആഗസ്റ്റ് 26 തിങ്കളാഴ്ച ഹൂസ്റ്റൺ അപ്പാർട്ട്മെൻ്റിൽ ഒന്നിലധികം വെടിയേറ്റ് മരിച്ച നിലയിൽ കണ്ടെത്തി. അജ്ഞാത സൂചനയെത്തുടർന്ന് വൈകുന്നേരം 5:35 ഓടെ പാണ്ഡെയുടെ മൃതദേഹം കണ്ടെത്തിയതായി ഹൂസ്റ്റൺ പോലീസ് അറിയിച്ചു.
വെടിവെപ്പുമായി ബന്ധപ്പെട്ട് കൊലക്കുറ്റത്തിന് കുറ്റവാളിയെന്ന് സംശയിക്കുന്ന ബോബി സിംഗ് ഷായെ (51) അറസ്റ്റ് ചെയ്തു. എച്ച്‌പിഡി സ്വാറ്റ് ഓഫീസർമാർ, ക്രൈം റിഡക്‌ഷന്‍ യൂണിറ്റ്, ടെക്‌സസ് ഡിപ്പാർട്ട്മെൻ്റ് ഓഫ് പബ്ലിക് സേഫ്റ്റി എന്നിവർ ഉൾപ്പെട്ട സം‌യുക്ത അന്വേഷണത്തില്‍ ട്രാഫിക് സ്റ്റോപ്പിൽ വെച്ച് പോലീസ് ഷായെ പിടികൂടി.
പാണ്ഡെയുടെ മൃതദേഹം കണ്ടെത്തുന്നതിന് രണ്ട് ദിവസം മുമ്പ് ഷാ പാണ്ഡെയുടെ അപ്പാർട്ട്മെൻ്റിൽ നിന്ന് പുറത്തുപോകുന്നത് സിസിടിവി ക്യാമറയില്‍ പതിഞ്ഞിരുന്നു. ഇത് ഷായെ തിരിച്ചറിയുന്നതിനും അറസ്റ്റുചെയ്യുന്നതിനും കാരണമായി. അറസ്റ്റിനെ തുടർന്ന് ഇയാളെ ഹാരിസ് കൗണ്ടി ജയിലിൽ അടച്ചു.
ഹൂസ്റ്റൺ കമ്മ്യൂണിറ്റി കോളേജിലെ വിദ്യാർത്ഥിയായ പാണ്ഡെ, 2021-ലാണ് നേപ്പാളിൽ നിന്ന് ഹൂസ്റ്റണിലേക്ക് താമസം മാറ്റിയത്.
പാണ്ഡെയുടെ അമ്മ അനിതയെ പിന്തുണയ്ക്കുന്നതിനായി ഒരു GoFundMe പേജ് ആരംഭിച്ചിട്ടുണ്ട്. ഹൂസ്റ്റണിലേക്കുള്ള അവരുടെ യാത്രാ ചെലവുകളും ശവസംസ്കാരച്ചെലവും വഹിക്കാൻ സഹായിക്കാനാണ് ധനസമാഹരണം. ഹൂസ്റ്റണിലെ നേപ്പാൾ അസോസിയേഷൻ ഓഫ് ഹൂസ്റ്റണിലെ ദ്രോണ ഗൗതം പറയുന്നതനുസരിച്ച്, അനിത മകളുടെ മരണ വാര്‍ത്ത അറിയുന്നതിനു മുമ്പ് നിരവധി ദിവസങ്ങളായി മകളെ ബന്ധപ്പെടാൻ ശ്രമിച്ചിരുന്നു.
ഒന്നിലധികം വെടിയേറ്റ മുറിവുകളോടെയാണ് പാണ്ഡെയെ കണ്ടെത്തിയതെന്നും കണ്ടെത്തുമ്പോൾ കട്ടിലിൽ കിടക്കുകയായിരുന്നുവെന്നും ഗൗതം പറഞ്ഞു. അന്വേഷണം പുരോഗമിക്കുകയാണ്, സംഭവത്തെക്കുറിച്ചുള്ള കൂടുതൽ വിവരങ്ങൾ പുറത്തുവരുമെന്ന് അധികൃതർ പ്രതീക്ഷിക്കുന്നു.
