അയോദ്ധ്യ: അയോദ്ധ്യയിലെ കുമാർഗഞ്ച് പോലീസ് സ്റ്റേഷൻ പരിധിയിലെ ഒരു ഗ്രാമത്തിൽ നാലു പേരടങ്ങുന്ന ഒരു സംഘം തന്നെ ക്രൂരമായി ബലാത്സംഗം ചെയ്തതായി 69-കാരിയായ സ്ത്രീ ആരോപിച്ചു. സെപ്തംബർ 23 ന് രാത്രിയാണ് സംഭവം നടന്നത്. ബന്ധപ്പെട്ട വകുപ്പുകൾ പ്രകാരം പോലീസ് കേസെടുക്കുകയും നിയമപ്രകാരം ഇരയെ വൈദ്യപരിശോധനയ്ക്ക് അയക്കുകയും ചെയ്തു.
ഉദ്യോഗസ്ഥർ പറയുന്നതനുസരിച്ച്, കുറ്റവാളികളില്‍ മൂന്ന് പേരെ-രണ്ട് കൗമാരക്കാരും ഒരു മധ്യവയസ്കനും-ഇതിനകം അറസ്റ്റ് ചെയ്തിട്ടുണ്ട്. അതേസമയം നാലാമത്തെ വ്യക്തിക്ക് വേണ്ടിയുള്ള തിരച്ചിൽ തുടരുകയാണ്. ആക്രമണത്തിൻ്റെ വീഡിയോ ഓൺലൈനിൽ പ്രത്യക്ഷപ്പെട്ടതോടെയാണ് ഞെട്ടിപ്പിക്കുന്ന സംഭവം പുറത്തറിയുന്നത്. വിദൂര നഗരത്തിൽ താമസിക്കുന്ന സ്ത്രീയുടെ മകനെ വീഡിയോയെക്കുറിച്ച് അറിയിക്കുകയും ഉടൻ തന്നെ അയാള്‍ ഗ്രാമത്തിലേക്ക് കുതിക്കുകയും ചെയ്തു. അമ്മയിൽ നിന്ന് വിവരം അറിഞ്ഞ മകന്‍ പോലീസിൽ ഔപചാരികമായി പരാതി നൽകി.
ആക്രമണം നടന്ന രാത്രിയിൽ, വൃദ്ധ തൻ്റെ ഗ്രാമത്തിലെ ഒരു പുരുഷനൊപ്പം കുഴൽക്കിണറിന് സമീപം മദ്യപിച്ചിരുന്നതായി അധികൃതർ വെളിപ്പെടുത്തി. ഉടൻ തന്നെ മറ്റൊരു മധ്യവയസ്‌കൻ സംഭവസ്ഥലത്തെത്തി, ആദ്യയാൾ പോയതിനുശേഷം സ്ത്രീ ആക്രമിക്കപ്പെട്ടു. പിന്നീട് എത്തിയ രണ്ട് കൗമാരക്കാർ സംഭവം റെക്കോർഡ് ചെയ്യുകയും വീഡിയോ ഷെയർ ചെയ്യുകയും ചെയ്തതോടെയാണ് അവരെ പിടികൂടിയത്. “കുറ്റവാളികളെ അറസ്റ്റ് ചെയ്തു, നിയമ നടപടികൾ നടക്കുന്നു, നാലാമത്തെ ആളെ ഉടൻ പിടികൂടും,”എസ്പി അമിത് കുമാർ ആനന്ദ് സ്ഥിരീകരിച്ചു.
