ന്യൂഡൽഹി: കഴിഞ്ഞ മാസം ഡൽഹി മുഖ്യമന്ത്രി സ്ഥാനം രാജി വെച്ച അരവിന്ദ് കെജ്‌രിവാൾ മുഖ്യമന്ത്രിയുടെ വസതി ഒഴിഞ്ഞു. രവിശങ്കർ ശുക്ല ലെയ്നിലെ ആം ആദ്മി പാർട്ടി ആസ്ഥാനത്തിന് സമീപമുള്ള ഫിറോസ്ഷാ റോഡിലുള്ള പഞ്ചാബ് രാജ്യസഭാ എംപി അശോക് മിത്തലിൻ്റെ വീട്ടിലാണ് ഇനി കുടുംബത്തോടൊപ്പം താമസിക്കുക. ഇന്ന് രാവിലെയാണ് അദ്ദേഹവും കുടുംബവും വസതി ഒഴിഞ്ഞത്.
ഇതിന് മുമ്പ് മുൻ ഉപമുഖ്യമന്ത്രി മനീഷ് സിസോദിയയും രാജേന്ദ്ര പ്രസാദ് റോഡിലുള്ള ബംഗ്ലാവിലേക്ക് മാറി. എഎപി രാജ്യസഭാ എംപി ഹർഭജൻ സിംഗിൻ്റെ ഔദ്യോഗിക വസതിയാണ് ഈ വസതിയെന്ന് പാർട്ടി നേതാക്കൾ പറഞ്ഞു. മുഖ്യമന്ത്രിയുടെ ഔദ്യോഗിക വസതി വിടാന്‍ തീരുമാനിച്ച ശേഷം, എംപിമാരും എംഎൽഎമാരും കൗൺസിലർമാരും ഉൾപ്പെടെ നിരവധി പാർട്ടി നേതാക്കൾ കെജ്രിവാളിന് അവരുടെ വീടുകളിൽ താമസം വാഗ്ദാനം ചെയ്തിരുന്നു. എഎപി ആസ്ഥാനത്തിന് സമീപമാണ് കെജ്‌രിവാളിൻ്റെ പുതിയ വീട്, അദ്ദേഹം കുടുംബത്തോടൊപ്പം താമസിക്കും.
അരവിന്ദ് കെജ്‌രിവാൾ തൻ്റെ വീട് തിരഞ്ഞെടുത്തതിൽ സന്തോഷമുണ്ടെന്ന് എഎപി എംപി മിത്തൽ പറഞ്ഞു. കെജ്‌രിവാൾ മുഖ്യമന്ത്രി സ്ഥാനം രാജിവെച്ചപ്പോൾ തന്നെ ഡൽഹിയിലെ വസതിയിലേക്ക് ക്ഷണിച്ചിരുന്നുവെന്നും അഭ്യർത്ഥന അദ്ദേഹം അംഗീകരിച്ചുവെന്നറിഞ്ഞതിൽ സന്തോഷമുണ്ടെന്നും അദ്ദേഹം പറഞ്ഞു. തൻ്റെ അസംബ്ലി മണ്ഡലം കൂടിയായ ന്യൂഡൽഹി ഏരിയ ആസ്ഥാനമാക്കി, ഡൽഹിയിലും മറ്റ് സംസ്ഥാനങ്ങളിലും വരാനിരിക്കുന്ന തെരഞ്ഞെടുപ്പുകൾക്കായുള്ള എഎപിയുടെ പ്രചാരണത്തിന് കെജ്‌രിവാൾ മേൽനോട്ടം വഹിക്കുമെന്ന് പാർട്ടി നേതാക്കൾ പറയുന്നു.
സെപ്തംബർ 17 ന് കെജ്‌രിവാൾ ഡൽഹി എൽജി വികെ സക്‌സേനയ്ക്ക് രാജിക്കത്ത് നൽകിയിരുന്നു, അതിനുശേഷം അതിഷി പുതിയ സർക്കാർ രൂപീകരിക്കാൻ അവകാശവാദമുന്നയിച്ചു. 2025 ഫെബ്രുവരിയിൽ നടക്കാൻ സാധ്യതയുള്ള നിയമസഭാ തിരഞ്ഞെടുപ്പിൽ ഡൽഹിയിലെ ജനങ്ങളിൽ നിന്ന് പുതുക്കിയ ജനവിധിയും സത്യസന്ധതയുടെ സർട്ടിഫിക്കറ്റും ലഭിച്ചാൽ മാത്രമേ താൻ ആ സ്ഥാനത്തേക്ക് മടങ്ങുകയുള്ളൂവെന്ന് കെജ്‌രിവാൾ സൂചിപ്പിച്ചു. സെപ്തംബർ 22-ന് എഎപി അധ്യക്ഷൻ അരവിന്ദ് കെജ്‌രിവാൾ തൻ്റെ പിൻഗാമിയായി പ്രഖ്യാപിച്ചതിന് ശേഷം ഡൽഹി മുഖ്യമന്ത്രിയായി അതിഷി സത്യപ്രതിജ്ഞ ചെയ്ത് അധികാരമേറ്റു.
https://twitter.com/AamAadmiParty/status/1842119998015242551?ref_src=twsrc%5Etfw%7Ctwcamp%5Etweetembed%7Ctwterm%5E1842119998015242551%7Ctwgr%5E60ddb33f0d45c05f6d9e3f8dacee058407c4dfcd%7Ctwcon%5Es1_&ref_url=https%3A%2F%2Fenglish.newstracklive.com%2Fnews%2Farvind-kejriwal-begins-transition-from-cm-residence-to-new-bungalow-following-resignation-sc1-nu370-ta370-1329144-1.html
