ഫ്ലോറിഡ: മിൽട്ടൺ ചുഴലിക്കാറ്റ് ബുധനാഴ്ച രാത്രി സൗത്ത്, സെൻട്രൽ ഫ്‌ളോറിഡയെ പിടിച്ചുലച്ചു. ചുഴലിക്കാറ്റ് എത്തിയതിന് പിന്നാലെ സംസ്ഥാനത്ത് ശക്തമായ കാറ്റിനൊപ്പം പേമാരിയുമുണ്ടായി. കൊടുങ്കാറ്റ് ഉപദ്വീപിൻ്റെ പടിഞ്ഞാറൻ ഭാഗത്ത് നിന്ന് കിഴക്കോട്ട് നീങ്ങാൻ തുടങ്ങി. കൊടുങ്കാറ്റിനെ കാറ്റഗറി 2 കൊടുങ്കാറ്റായി തരംതിരിച്ചിട്ടുണ്ട്, എന്നാൽ ഇതൊക്കെയാണെങ്കിലും, കൊടുങ്കാറ്റ് സംസ്ഥാനത്ത് ജീവന് ഭീഷണിയായ കാലാവസ്ഥാ പ്രശ്നങ്ങൾ കൊണ്ടുവരുന്നത് തുടരുമെന്ന് എമർജൻസി മാനേജ്‌മെൻ്റിൻ്റെ ഫ്ലോറിഡ വിഭാഗം മുന്നറിയിപ്പ് നൽകി.
നൂറ്റാണ്ടു കണ്ട ഏറ്റവും വിനാശകാരിയായ ചുഴലിക്കാറ്റായിരിക്കും മിൽട്ടനെന്ന് പ്രസിഡന്റ് ജോ ബൈഡൻ മുന്നറിയിപ്പ് നൽകിയിരുന്നു. കരതൊടുമ്പോള്‍ 120 മൈല്‍ വേഗത്തിലേക്ക് മില്‍ട്ടന്‍റെ ശക്തി കുറഞ്ഞിരുന്നു. നാളെയോടെ അറ്റ്ലാന്‍റിക് സമുദ്രത്തിലേക്ക് കടന്ന് ഉഷ്‌ണമേഖലാ വാതമായി തീര്‍ത്തും ദുര്‍ബലമാകുമെന്നാണ് വിലയിരുത്തല്‍.
ഫ്ലോറിഡയിലും പരിസര പ്രദേശങ്ങളിലും കനത്ത നാശം വിതച്ച ഹെലീൻ ചുഴലിക്കൊടുങ്കാറ്റിന് പിന്നാലെയാണ് മിൽട്ടണ്‍ എത്തിയത്. അമേരിക്കയിലെ തെക്കുകിഴക്കൻ സംസ്ഥാനങ്ങളിൽ ആഞ്ഞടിച്ച ഹെലീൻ 160 ലധികം മനുഷ്യ ജീവൻ കവർന്നിരുന്നു. നോർത്ത് കരോലിനയിൽ മാത്രം 73 പേരുടെ ജീവനാണ് പൊലിഞ്ഞത്. സൗത്ത് കരോലിനയിൽ 36 പേർക്ക് ജീവൻ നഷ്‌ടമായിരുന്നു. ജോർജിയയിൽ 25 പേരും ഫ്ലോറിഡയിൽ 17 പേരും ടെന്നേസിയിൽ ഒൻപത് പേരും മരിച്ചു.
ഇതിനിടെ ഫ്ലോറിഡയിലെ വാതക കേന്ദ്രങ്ങളില്‍ ഇന്ധനം പൂര്‍ണമായും തീര്‍ന്ന നിലയിലാണ്. താമ്പ ബേ, സെന്‍റ് പീറ്റേഴ്‌സ് ബര്‍ഗ്, തുടങ്ങിയ സ്ഥലങ്ങളില്‍ കനത്ത ഇന്ധന ക്ഷാമം അനുഭവപ്പെടുന്നുണ്ട്. 51 കൗണ്ടികളില്‍ സുരക്ഷ മുന്നറിയിപ്പ് നല്‍കിയിട്ടുണ്ട്. വൈദ്യുതി നിലയ്ക്കാന്‍ സാധ്യതയുള്ളതിനാല്‍ വേണ്ട മുന്‍ കരുതലുകള്‍ കൈക്കൊള്ളണമെന്നും നിര്‍ദ്ദേശിച്ചിരുന്നു. ഒരാഴ്‌ചത്തെക്കുള്ള ഭക്ഷണവും വെള്ളവും കരുതണമെന്നും ആവശ്യമെങ്കില്‍ വീടുകള്‍ മാറാന്‍ തയാറായിരിക്കണമെന്നും അധികൃതര്‍ നിര്‍ദ്ദേശിച്ചിരുന്നു.
അമേരിക്കയിൽ ഇതുവരെ ഉണ്ടായിട്ടുള്ളതിൽ വച്ച് ഏറ്റവും വിനാശകരമായ ചുഴലിക്കാറ്റ് സംഭവിച്ചത് 1900-ലാണ്. ആ സമയത്ത്, ഗ്രേറ്റ് ഗാൽവെസ്റ്റൺ ചുഴലിക്കാറ്റ് ടെക്സസിനെ തകർത്തു, കുറഞ്ഞത് 8,000 പേരെ കൊന്നു. ഇതിന് ശേഷം, 2005 ൽ കത്രീന ചുഴലിക്കാറ്റ് തെക്കൻ യുണൈറ്റഡ് സ്റ്റേറ്റ്സിൽ 1,395 പേരുടെ ജീവൻ അപഹരിച്ചു. കൊടുങ്കാറ്റിൻ്റെ തീവ്രത ന്യൂ ഓർലിയാൻസിന് ചുറ്റുമുള്ള പുലിമുട്ടുകൾ പൊട്ടി മാരകമായ വെള്ളപ്പൊക്കത്തിന് കാരണമായി.
