ഹമാസ് നേതാവ് യഹ്യ സിൻവാറിൻ്റെ മരണത്തിന് ഗാസ മുനമ്പിലെ സംഘർഷം അവസാനിപ്പിക്കാൻ കഴിയുമെന്ന് യുഎസും ജർമ്മനിയും പറയുന്നു.
“യഹ്യ സിൻവാർ ഒരു ക്രൂരനായ കൊലപാതകിയും ഭീകരനുമായിരുന്നു, ഇസ്രായേലിനെയും അവിടുത്തെ ജനങ്ങളെയും ഉന്മൂലനം ചെയ്യാൻ ശ്രമിച്ചുകൊണ്ടിരുന്ന, 2023 ഒക്ടോബർ 7 ലെ ഭീകരാക്രമണത്തിൻ്റെ സൂത്രധാരൻ എന്ന നിലയിൽ അയാള്‍ ആയിരക്കണക്കിന് ആളുകൾക്ക് മരണവും ഒരു പ്രദേശത്തുടനീളം അളക്കാനാവാത്ത ദുരിതവും കൊണ്ടുവന്നു,” വെള്ളിയാഴ്ച ഒരു സംയുക്ത പ്രസ്താവനയിൽ ജർമ്മൻ വിദേശകാര്യ മന്ത്രി അന്നലീന ബെയർബോക്കും യുഎസ് സ്റ്റേറ്റ് സെക്രട്ടറി ആൻ്റണി ബ്ലിങ്കനും പറഞ്ഞു.
“ഗാസയിലെ വെടിനിർത്തലിന് സിൻവാർ ആയിരുന്നു തടസ്സമായി നിന്നത്. അയാളുടെ മരണം സംഘർഷം അവസാനിപ്പിക്കാൻ
വഴി തുറക്കും. എല്ലാ ബന്ദികളേയും മോചിപ്പിക്കണം, ”വെള്ളിയാഴ്ച ബെർലിനിൽ നടന്ന യോഗത്തിന് ശേഷം അവർ പറഞ്ഞു.
ഗാസയിലെ സാധാരണക്കാർക്ക് മാനുഷിക സഹായം വർദ്ധിപ്പിക്കേണ്ടതിൻ്റെ ആവശ്യകതയും ഇരു നേതാക്കളും ഊന്നിപ്പറഞ്ഞു. “ഗാസയിൽ ആവശ്യമുള്ള സാധാരണക്കാർക്ക് മാനുഷിക സഹായം നൽകണം. ജർമ്മനിയും യുണൈറ്റഡ് സ്റ്റേറ്റ്സും പങ്കാളികളോടൊപ്പം ഈ പാതയിൽ ഒരു ശ്രമവും ഒഴിവാക്കില്ല, ”അവർ പറഞ്ഞു.
2023 ഒക്ടോബർ 7 ന് ഇസ്രായേലിൽ 1200 പേർ കൊല്ലപ്പെടുകയും 250 ലധികം പേരെ ബന്ദികളാക്കുകയും ചെയ്ത ഭീകരാക്രമണത്തിൻ്റെ ശില്പിയായ യാഹ്യ സിൻവാറിനെ ഇല്ലാതാക്കിയതായി വ്യാഴാഴ്ച വൈകുന്നേരമാണ് ഇസ്രായേൽ സ്ഥിരീകരിച്ചത്.
“ഒരു വർഷം മുഴുവനും നീണ്ടുനിന്ന ദീർഘവും നിശ്ചയദാർഢ്യവുമായ അന്വേഷണത്തിനൊടുവിൽ, ഹമാസ് ഭീകരസംഘടനയുടെ നേതാവും നിരവധി ഇസ്രായേലികളെ കൂട്ടക്കൊലയ്ക്കും തട്ടിക്കൊണ്ടുപോകലിനും ഉത്തരവാദിയുമായ യഹ്യ സിൻവാറിനെ നമ്മുടെ സൈന്യം ഇല്ലാതാക്കി. ഗാസ മുനമ്പിലെ ഏറ്റുമുട്ടലിൽ ഇന്നലെ അയാളെ ഉന്മൂലനം ചെയ്ത സൈന്യത്തെ ഞാൻ അഭിനന്ദിക്കുന്നു,” വ്യാഴാഴ്ച വൈകുന്നേരം ഇസ്രായേൽ ഡിഫൻസ് ഫോഴ്‌സിൻ്റെ (ഐഡിഎഫ്) ചീഫ് ഓഫ് സ്റ്റാഫ് ലെഫ്റ്റനൻ്റ് കേണൽ ഹെർസി ഹലേവി പറഞ്ഞു.
ഈ വർഷം ജൂലൈയിൽ ഇറാൻ്റെ പുതുതായി തിരഞ്ഞെടുക്കപ്പെട്ട പ്രസിഡൻ്റ് മസൂദ് പെസെഷ്‌കിയാൻ സത്യപ്രതിജ്ഞാ ചടങ്ങിൽ പങ്കെടുക്കവെ ടെഹ്‌റാനിൽ വെച്ച് കൊല്ലപ്പെട്ട ഇസ്മായിൽ ഹനിയയുടെ പിൻഗാമിയായാണ് സിൻവാറിനെ ഹമാസിൻ്റെ പൊളിറ്റിക്കൽ ബ്യൂറോയുടെ തലവനായി നിയമിച്ചത്.
ഒക്ടോബർ ഏഴിലെ ഹമാസ് ആക്രമണത്തിന് തിരിച്ചടി നൽകാൻ ഗാസ മുനമ്പിൽ ഹമാസിനെതിരെ വലിയ തോതിലുള്ള ആക്രമണമാണ് ഇസ്രായേൽ നടത്തുന്നത്.
ഗാസ മുനമ്പിൽ നടന്നുകൊണ്ടിരിക്കുന്ന ഇസ്രായേൽ ആക്രമണങ്ങളിൽ ഫലസ്തീനികളുടെ മരണസംഖ്യ 42,500 ആയി ഉയർന്നതായി ഗാസ ആസ്ഥാനമായുള്ള ആരോഗ്യ അധികൃതർ വെള്ളിയാഴ്ച പ്രസ്താവനയിൽ അറിയിച്ചു.
