പാലക്കാട്: പാലക്കാട് കല്ലടിക്കോടിന് സമീപം അയ്യപ്പൻകാവിൽ ദേശീയപാത 966-ൽ ചൊവ്വാഴ്ച (ഒക്‌ടോബർ 22, 2024) രാത്രി കാര്‍ ട്രക്കിൽ ഇടിച്ച് കാറിൽ സഞ്ചരിച്ചിരുന്ന അഞ്ച് പേർ മരിച്ചു. കാർ ട്രക്കിൻ്റെ അടിയിൽ കുടുങ്ങി തകർന്നു. രാത്രി 11 മണിയോടെയാണ് അപകടം
കോങ്ങാട് മണ്ണേത്തറ സ്വദേശി കെ.കെ.വിജേഷ് (35), വീണ്ടപ്പാറ സ്വദേശി രമേഷ് (31) വെള്ളിയന്തോട് സ്വദേശി വിഷ്ണു (30) കോങ്ങാട് സ്വദേശി മുഹമ്മദ് അഫ്സൽ (17) എന്നിവരാണ് കൊല്ലപ്പെട്ടത്. ഒരാളെ കൂടി തിരിച്ചറിയാനുണ്ടെന്ന് പോലീസ് പറഞ്ഞു. വിജേഷും വിഷ്ണുവും കോങ്ങാട് ഓട്ടോറിക്ഷ ഡ്രൈവർമാരായിരുന്നു.
മണ്ണാർക്കാട് ഭാഗത്തേക്ക് പോവുകയായിരുന്നു കാർ. റോഡില്‍ നനവുണ്ടായിരുന്നതിനാൽ നിയന്ത്രണം നഷ്ടപ്പെട്ട കാർ കോയമ്പത്തൂർ ഭാഗത്തേക്ക് പോവുകയായിരുന്ന ട്രക്കുമായി കൂട്ടിയിടിക്കുകയായിരുന്നുവെന്നാണ് പ്രാഥമിക നിഗമനം.
അപകടത്തിൽപ്പെട്ടവരെ പുറത്തെടുക്കാൻ തകർന്ന കാറും ലോറിയുടെ മുൻഭാഗവും വെട്ടിപ്പൊളിക്കേണ്ടി വന്നു. പോലീസും ഫയർഫോഴ്‌സും നാട്ടുകാരും ചേർന്നാണ് രക്ഷാപ്രവർത്തനം നടത്തിയത്.
പരിക്കേറ്റവരിൽ മൂന്ന് പേർ സംഭവസ്ഥലത്തും മറ്റുള്ളവർ ആശുപത്രിയിലേക്കുള്ള യാത്രാമധ്യേയുമാണ് മരിച്ചതെന്ന് പോലീസ് പറഞ്ഞു. പരിക്കേറ്റവരെ പാലക്കാട് സർക്കാർ ജില്ലാ ആശുപത്രിയിൽ പ്രവേശിപ്പിച്ചു.
അപകടത്തെ തുടർന്ന് ദേശീയ പാത 966-ൽ രണ്ട് മണിക്കൂറോളം ഗതാഗതം തടസ്സപ്പെട്ടു.
