കൊച്ചി: ചങ്ങനാശേരി പുത്തൂർപ്പള്ളി മുസ്‌ലിം ജമാഅത്തിൽ ഒസ്സാൻ (പരമ്പരാഗത മുസ്‌ലിം ബാർബർ സമുദായം), *ലബ്ബ, മുഅദ്ദീൻ (പള്ളിയിലെ ജീവനക്കാർ) എന്നിവരുടെ 237 വർഷത്തെ സാമൂഹിക ബഹിഷ്കരണം ബുധനാഴ്ച (ഒക്‌ടോബർ 23) അവസാനിച്ചു.
കേരള വഖഫ് ബോർഡ് ബുധനാഴ്ച വിളിച്ചു ചേർത്ത അനുരഞ്ജന യോഗം ജമാ-അത്തിൽ ഈ വിഭാഗങ്ങൾക്ക് അംഗത്വവും വോട്ടവകാശവും നൽകാൻ തീരുമാനിച്ചു, അങ്ങനെ രണ്ട് നൂറ്റാണ്ടിലേറെയായി തുടരുന്ന അവകാശ ലംഘനം അവസാനിച്ചു.
ചങ്ങനാശേരി നഗരസഭയിലും പായിപ്പാട്, തൃക്കൊടിത്താനം, വാഴപ്പിള്ളി, മടപ്പിള്ളി പഞ്ചായത്തുകളിലും താമസിക്കുന്ന ഒസ്സാൻ സമുദായാംഗങ്ങൾക്കും ലബ്ബ കുടുംബത്തിനും മുഅദ്ദീനുകൾക്കും അംഗത്വം നൽകാൻ ജമാഅത്ത് കമ്മിറ്റി അംഗങ്ങൾ പങ്കെടുത്ത യോഗം തീരുമാനിച്ചു.
മൂന്ന് മാസത്തിനകം മെമ്പർഷിപ്പ് ഡ്രൈവ് പൂർത്തിയാക്കി കമ്മിറ്റിയിലേക്ക് തിരഞ്ഞെടുപ്പ് നടത്തുമെന്ന് കേരള വഖഫ് ബോർഡ് ചീഫ് എക്‌സിക്യൂട്ടീവ് ഓഫീസർ പുറത്തിറക്കിയ വാർത്താക്കുറിപ്പിൽ അറിയിച്ചു.
പുതിയ അംഗങ്ങളെ ജനറൽ ബോഡി മീറ്റിംഗിൽ പങ്കെടുപ്പിക്കാൻ ജമാഅത്ത് അംഗങ്ങൾ സമ്മതിക്കുകയും ജമാ-അത്തിലെ മറ്റ് അംഗങ്ങൾക്ക് വാഗ്ദാനം ചെയ്ത എല്ലാ ആനുകൂല്യങ്ങളും നൽകാനും തീരുമാനിച്ചു. ഏതാനും അംഗങ്ങൾ വിഷയം ഉന്നയിച്ചതിനെത്തുടർന്ന് അവകാശം നിഷേധിക്കപ്പെട്ട വിഭാഗങ്ങൾക്ക് അംഗത്വവും വോട്ടവകാശവും നൽകാൻ ജമാ-അത്തിനോട് ബോർഡ് നേരത്തെ ആവശ്യപ്പെട്ടിരുന്നു.
പരമ്പരാഗതമായി ക്ഷുരകർത്താക്കളായി ഏർപ്പെട്ടിരുന്ന ഒസ്സാൻ സമുദായാംഗങ്ങളെ സാമൂഹികമായി ബഹിഷ്കരിക്കുകയും വിവേചനം കാണിക്കുകയും ചെയ്തതിന് ജമാ-അത്തിനെതിരെ നിയമനടപടി ആരംഭിക്കാനും ബോർഡ് തീരുമാനിച്ചിരുന്നു. മഹല്ല് കമ്മിറ്റിയുടെ തീരുമാനം ഇസ്‌ലാമിൻ്റെ തത്വങ്ങൾക്കും ഭരണഘടനാ വ്യവസ്ഥകൾക്കും എതിരാണെന്ന് ബോർഡ് വിലയിരുത്തി. മഹല്ല് കമ്മിറ്റിയുടെ തീരുമാനം കമ്മിറ്റി അംഗങ്ങളുടെ അടിസ്ഥാന മനുഷ്യാവകാശ ലംഘനമാണെന്ന് വിമർശിച്ചു.
ബഹിഷ്കരണം, വിവാഹ രജിസ്ട്രേഷൻ, ഖബറടക്കം, മദ്രസ വിദ്യാഭ്യാസം നിഷേധിക്കൽ, മഹല്ല് അംഗത്വം റദ്ദാക്കൽ അല്ലെങ്കിൽ നിഷേധം എന്നിവയ്ക്കെതിരെ മഹല്ല് കമ്മിറ്റികൾക്ക് ബോർഡ് സർക്കുലർ നൽകിയിരുന്നു. ഇത്തരം പ്രവൃത്തികൾ ഭരണഘടനയും വഖഫ് നിയമവും ചട്ടങ്ങളും ഉറപ്പുനൽകുന്ന മൗലികാവകാശങ്ങളുടെ ലംഘനമാണെന്ന നിലപാടാണ് സ്വീകരിച്ചിരുന്നത്.
ബോർഡ് ചെയർമാൻ എം.കെ.സക്കീർ, അംഗങ്ങളായ എം.ഷറഫുദ്ധീൻ, എം.സി.മയീൻ ഹാജി, പി.വി.സൈനുദ്ധീൻ, കെ.എം.എ.റഹീം, റസിയ ഇബ്രാഹിം, വി.എം.രഹന എന്നിവർ പങ്കെടുത്തു.
+++++++++++
* ഇസ്‌ലാമിക സംസ്‌കാരത്തെ രൂപപ്പെടുത്തുന്നതില്‍ പ്രാതിനിത്യം വഹിച്ച ഒട്ടനവധി കുടുംബങ്ങള്‍ കേരളത്തില്‍ നിലനിന്നിരുന്നു. അവയിലധികവും ഇന്ന് വിസ്മരിക്കപ്പെട്ടിരിക്കുന്നു. തെക്കന്‍ കേരളത്തിലെ ഇസ്‌ലാമിക പ്രചരണ മേഖലയില്‍ ധാരാളം സംഭാവനകള്‍ അര്‍പ്പിച്ചതും ഇന്ന് നിലനില്‍ക്കുന്നതുമായ ഒരു പണ്ഡിത കുടുംബമാണ് ലബ്ബ. തെക്കന്‍ കേരളത്തിലെ മക്ക എന്നറിയപ്പെടുന്ന ഈരാറ്റുപേട്ടയില്‍ ഇസ്‌ലാമിക പ്രബോധനാര്‍ത്ഥം എത്തിയ ലബ്ബമാര്‍ അവരുടെ കച്ചവട മാര്‍ഗങ്ങള്‍ വിപുലീകരിക്കുന്നതോടൊപ്പം തന്നെ ഇസ്‌ലാമിക പ്രബോധനവും നടത്തിപ്പോന്നു. അതുവഴി കച്ചവടത്തിനായി എത്തിച്ചേര്‍ന്ന സ്ഥലങ്ങളിലെല്ലാം അവരുടെ പരിശ്രമഫലമായി ഇസ്‌ലാം പ്രചാരം നേടുകയും ചെയ്തു.
ആഗമനവും ചരിത്രവും
ഏഴാം നൂറ്റാണ്ടിന്റെ ആരംഭത്തില്‍ കൊടുങ്ങല്ലൂരില്‍ നിന്നും മാലിക്ബ്‌നു ദീനാറിന്റെ സംഘത്തില്‍ ഒരു വിഭാഗം മാലികിബ്‌നു ഹബീബിന്റെ നേതൃത്വത്തില്‍ തെക്കന്‍ കേരളത്തിലേക്കു വരികയും, തെക്കന്‍ കൊല്ലം കേന്ദ്രീകരിച്ച് പ്രബോധനം നടത്തുകയും ചെയ്തു. അങ്ങനെ മീനച്ചിലാറിന്റെ സംഗമഭൂമിയായ ഈരാറ്റുപേട്ടയിലും ഇവര്‍ എത്തിച്ചേര്‍ന്നു. അന്ന് ഈരാറ്റുപേട്ട വാണിജ്യ വ്യാപാര രംഗത്ത് പ്രശസ്തമായതിനാല്‍ കോട്ടയം, ആലപ്പുഴ എന്നീ സ്ഥലങ്ങളില്‍ നിന്ന് കച്ചവടസംഘങ്ങള്‍ ധാരാളമായി എത്തുകയും പ്രബോധനത്തിലാകൃഷ്ടരായി അവര്‍ ഇസ്‌ലാമിലേക്ക് വരുകയും ചെയ്തു. ശൈഖ് സഈദ് ബാവ(റ) ലക്ഷദ്വീപിലെ ആന്ത്രോത്തില്‍ നിന്നും കടല്‍ മാര്‍ഗത്തിലൂടെ കൊച്ചി വഴി ഹിജ്‌റ 721 ലാണ് ഈരാറ്റുപേട്ടയില്‍ എത്തുന്നത്. ദീനി പണ്ഡിതനും വാഗ്മിയും സല്‍സ്വഭാവിയുമായിരുന്ന ഇദ്ദേഹം, ഈരാറ്റുപേട്ടയില്‍ ഇസ്‌ലാമിക പ്രബോധനാര്‍ത്ഥം സ്ഥിരതാമസമാക്കുകയും ചെയ്തു. ശൈഖ് ബാവയുടെ പിതാവ് ഹസ്‌റത് അലി ജന്മ നാടായ മക്കയില്‍ നിന്നും പ്രബോധനാര്‍ത്ഥമാണ് ലക്ഷദ്വീപിലെ ആന്ത്രോത്തിലെത്തിയത്. അബൂബക്കര്‍ (റ)ന്റെ പരമ്പരയില്‍ പെട്ട ഹസ്‌റത് ഉബൈദുല്ലാ(റ) യിലൂടെ ആന്ത്രോത്ത്, കവരത്തി തുടങ്ങിയ ദ്വീപുകളില്‍ ഇസ്‌ലാം സുസ്ഥാപിതമായ വാര്‍ത്തയറിഞ്ഞ് ധാരാളം സൂഫികളും സാദാത്തുകളും ഇവിടെയെത്തിരുന്നു. ഇതുതന്നെയാണ് ശൈഖ് അലിയുടെ കടന്നുവരവിനും കാരണമായത്. ഇദ്ദേഹം ജനങ്ങള്‍ക്ക് ആത്മീയ വിജ്ഞാനം പകര്‍ന്നുനല്‍കുന്നതില്‍ വ്യാപൃതനായിരുന്നു. ഇതിന്റെ ഫലമായി ശൈഖ് അലി ജനങ്ങളുടെ നേതൃസ്ഥാനത്തേക്ക് തിരഞ്ഞെടുക്കപ്പെടുകയും ചെയ്തു. ഹിജ്‌റ 700 റബീഉല്‍ അവ്വല്‍ 12 ന് സഈദ് ബാവ ആന്ത്രോത്തില്‍ ജനിച്ചു. ഇദ്ദേഹം മാതാപിതാക്കളില്‍ നിന്നും പ്രാരംഭ വിജ്ഞാനം നേടുകയും ആരാധനാ മുറകള്‍ കൈകൊള്ളുകയും ചെയ്തിരുന്നു. ദീനീ വിദ്യഭ്യാസത്തില്‍ ആകൃഷ്ടനായി ബാവ മക്കയിലേക്ക് പുറപ്പെടുകയും അവിടെയുള്ള പ്രഗല്‍ഭ പണ്ഡിതന്മാരില്‍ നിന്നും ഖുര്‍ആന്‍, ഹദീസ്, കര്‍മ്മ ശാസ്ത്രം എന്നീ ഇസ്‌ലാമിക വിജ്ഞാന ശാഖകളില്‍ അവഗാഹം നേടുകയും ചെയ്തു. ഇദ്ദേഹത്തിന്റെ പാണ്ഡിത്യം അറിഞ്ഞ ധാരാളം ആളുകള്‍ പില്‍ക്കാലത്ത് ശിഷ്യത്വം സ്വീകരിച്ചിട്ടുണ്ട്. പഠനം പൂര്‍ത്തിയാക്കിയ ശൈഖ് സഈദ് ബാവ ഹിജ്‌റ 721 ല്‍ ഈരാറ്റുപേട്ടയില്‍ എത്തിയത് ദീനീ വിദ്യഭ്യാസത്തിന്റെ പ്രചരണത്തിനായിരുന്നു. ഇദ്ദേഹത്തിന്റെ സന്താനപരമ്പരയില്‍ ധാരാളം ദീനീ പണ്ഡിതന്മാര്‍ വളര്‍ന്നുവന്നിട്ടുണ്ട്. ഇവര്‍ ലബ്ബ എന്ന പേരിലാണ് പിന്നീട് അറിയപ്പെട്ടത്. ദീനീ കാര്യങ്ങളില്‍ ഇവര്‍ക്കുള്ള അവഗാഹം പരിഗണിച്ച് ജനങ്ങള്‍ വലിയ ആദരവ് നല്‍കുകയും അവരെ ലബ്ബൈക്ക് എന്ന് അഭിവാദ്യം ചെയ്യുകയും ചെയ്തിരുന്നു. ഇതില്‍ നിന്നാണ് ലബ്ബ എന്ന് അവര്‍ അറിയപ്പെടാന്‍ തുടങ്ങിയത്.
