ഗാസ: രണ്ടാം ലോക മഹായുദ്ധത്തിന് ശേഷം കഴിഞ്ഞ ഒരു വർഷത്തിനിടയിൽ ഗാസ ഏറ്റവും തീവ്രമായ സിവിലിയൻ ബോംബാക്രമണം നേരിട്ടതായി നിയർ ഈസ്റ്റിലെ ഫലസ്തീൻ അഭയാർത്ഥികൾക്കായുള്ള യുഎൻ റിലീഫ് ആൻഡ് വർക്ക്സ് ഏജൻസി (യുഎൻആർഡബ്ല്യുഎ) പ്രസ്താവനയില്‍ പറഞ്ഞു.
ഫലസ്തീൻ അഭയാർത്ഥികളുടെ ദുരവസ്ഥ ലോകത്തിലെ ഏറ്റവും ദൈർഘ്യമേറിയ പരിഹരിക്കപ്പെടാത്ത അഭയാർത്ഥി പ്രതിസന്ധിയായി തുടരുകയാണ്. ന്യായവും ശാശ്വതവുമായ പരിഹാരം കണ്ടെത്തുന്നതുവരെ ഫലസ്തീൻ അഭയാർത്ഥികൾക്ക് സഹായവും സംരക്ഷണവും നൽകാനാണ് UNRWA സ്ഥാപിതമായതെന്ന് അവര്‍ പറഞ്ഞു.
എല്ലാ വർഷവും നവംബർ 29 ന് ആചരിക്കുന്ന പലസ്തീൻ ജനതയുമായുള്ള ഐക്യദാർഢ്യത്തിൻ്റെ അന്താരാഷ്ട്ര ദിനത്തെ അനുസ്മരിക്കുന്നതിനാണ് യുഎൻ ഏജൻസി പ്രസ്താവന ഇറക്കിയത്.
2023 ഒക്‌ടോബർ 7 ന് തെക്കൻ ഇസ്രായേൽ അതിർത്തിയിലൂടെ ഹമാസ് നടത്തിയ ആക്രമണത്തിനെതിരെ പ്രതികാരം ചെയ്യുന്നതിനായി ഗാസ മുനമ്പിൽ ഹമാസിനെതിരെ ഇസ്രായേൽ വലിയ തോതിലുള്ള ആക്രമണമാണ് നടത്തുന്നത്. ഹമാസിന്റെ ആക്രമണത്തില്‍ ഇസ്രായേലില്‍ ഏകദേശം 1,200 പേർ കൊല്ലപ്പെടുകയും 250 ഓളം പേരെ ബന്ദികളാക്കുകയും ചെയ്തു.
ഗാസ മുനമ്പിൽ നടന്നുകൊണ്ടിരിക്കുന്ന ഇസ്രായേൽ ആക്രമണങ്ങളിൽ പലസ്തീൻകാരുടെ മരണസംഖ്യ 44,363 ആയി ഉയർന്നതായി ഗാസ ആസ്ഥാനമായുള്ള ആരോഗ്യ അധികൃതർ വെള്ളിയാഴ്ച പ്രസ്താവനയിൽ അറിയിച്ചു.
