കൊച്ചി: കലൂർ ജവഹർലാൽ നെഹ്‌റു അന്താരാഷ്ട്ര സ്റ്റേഡിയത്തിലെ വിഐപി ഗാലറിയിൽ നിന്ന് വീണ തൃക്കാക്കര എം.എൽ.എ ഉമാ തോമസിന് തലയ്ക്ക് ഗുരുതരമായി പരിക്കേറ്റു. ഞായറാഴ്ച (ഡിസംബർ 29, 2024) വൈകുന്നേരമാണ് സംഭവം.
ഗുരുതരമായി രക്തസ്രാവം ഉണ്ടായ എം എല്‍ എയെ സന്നദ്ധപ്രവർത്തകരും മറ്റുള്ളവരും ചേർന്ന് സ്വകാര്യ ആശുപത്രിയിൽ എത്തിച്ചു. വെൻ്റിലേറ്റർ സപ്പോർട്ടിലാണ് ഇവരെ പ്രവേശിപ്പിച്ചിരിക്കുന്നതെന്ന് ആശുപത്രി വൃത്തങ്ങൾ അറിയിച്ചു.
ഏകദേശം 15 അടി ഉയരത്തിൽ നിന്നുള്ള വീഴ്ചയിൽ കോൺക്രീറ്റ് ഗ്രൗണ്ടിൽ തലയിടിച്ചതായാണ് പ്രാഥമിക റിപ്പോർട്ടുകൾ പറയുന്നത്. പരിപാടി ആരംഭിക്കുന്നതിന് തൊട്ട് മുമ്പാണ് എംഎൽഎ വേദിയിലേക്ക് എത്തിയത്. മന്ത്രി സജി ചെറിയാനെ കണ്ടപ്പോള്‍ സംസാരിക്കാനായി അടുത്ത് ചെന്നപ്പോഴാണ് ഗാലറിയിൽ താത്കാലികമായി കെട്ടിയ ബാരിക്കേഡിൽ തട്ടി താഴേക്ക് മറിഞ്ഞ് വീണത്.
ഏറ്റവും കൂടുതൽ നർത്തകർ (ഏകദേശം 12,000 പേർ) ഗിന്നസ് ബുക്കിൽ ഇടം നേടുകയെന്ന ലക്ഷ്യത്തോടെ നടന്ന ‘മൃദംഗ നാദം’ എന്ന പരിപാടിയിൽ പങ്കെടുക്കാനാണ് ഉമാ തോമസ് സ്റ്റേഡിയത്തിൽ എത്തിയത്. സാംസ്‌കാരിക വകുപ്പ് മന്ത്രി സജി ചെറിയാൻ ഉൾപ്പെടെയുള്ളവർ ചടങ്ങിനെത്തിയിരുന്നു.
വീഴ്‌ചയുടെ ആഘാതത്തില്‍ ഉമാ തോമസിന്‍റെ തലച്ചോറിന് പരിക്കേറ്റിട്ടുണ്ടെന്ന് ആശുപത്രി അധികൃതര്‍ അറിയിച്ചു. വാരിയെല്ല് കുത്തിക്കയറി ശ്വാസ കോശത്തിനും പരിക്കുണ്ട്. നട്ടെല്ലിനും മുഖത്തെ എല്ലുകള്‍ക്കും ചെറിയ പരിക്കുള്ളതായും ഡോക്‌ടര്‍മാര്‍ അറിയിച്ചു. നിലവില്‍ അടിയന്തര ശസ്‌ത്രക്രിയ ആവശ്യമില്ല. 24 മണിക്കൂര്‍ കഴിയാതെ ആരോഗ്യ നില കൃത്യമായി പറയാനാവില്ലെന്നും ഡോക്‌ടര്‍മാര്‍ വ്യക്തമാക്കി.
പ്രമുഖർക്ക് നൃത്ത പരിപാടി കാണുന്നതിനായി സംഘാടകർ താൽക്കാലികമായി സ്ഥാപിച്ച ഗാലറിയിൽ നിന്നാണ് ഉമാ തോമസ് വീണതെന്ന് അന്താരാഷ്ട്ര സ്റ്റേഡിയം ഉടമയായ ജിസിഡിഎ വൃത്തങ്ങൾ പറഞ്ഞു. “ഞങ്ങൾ നിർമ്മിച്ച എല്ലാ ഗാലറികൾക്കും സ്റ്റീൽ റെയിലിംഗുകൾ ഉണ്ട്, അവ സുരക്ഷിതമാണ്,” അവർ കൂട്ടിച്ചേർത്തു.
അബോധാവസ്ഥയിലാണ് തോമസിനെ കാഷ്വാലിറ്റിയിലേക്ക് കൊണ്ടുവന്നതെന്ന് ആശുപത്രി വൃത്തങ്ങൾ അറിയിച്ചു. മസ്തിഷ്‌കാഘാതത്തിന് ശേഷം ഒരു വ്യക്തിയുടെ ബോധനില അളക്കാൻ ഉപയോഗിക്കുന്ന ഗ്ലാസ്‌ഗോ കോമ സ്‌കെയിൽ സ്‌കോർ 8 ആയിരുന്നു, ഇത് ഡോക്ടർമാരുടെ അഭിപ്രായത്തിൽ ഗുരുതരമായ മസ്തിഷ്‌കാഘാതം വെളിപ്പെടുത്തുന്നു.
ചികിത്സാ നടപടികൾ ഏകോപിപ്പിക്കാൻ ആശുപത്രി അധികൃതർ മെഡിക്കൽ ബോർഡും രൂപീകരിച്ചിട്ടുണ്ട്.
