കൊലപാതക്കുറ്റം ചുമത്തപ്പെട്ട് യമനിലെ ജയിലില്‍ വധശിക്ഷ കാത്തു കഴിയുന്ന മലയാളി നഴ്സ് നിമിഷ പ്രിയയുടെ കേസില്‍ നിര്‍ണ്ണായക വഴിത്തിരിവ്. നിമിഷ പ്രിയയുടെ വധശിക്ഷ പ്രസിഡൻഷ്യൽ ലീഡർഷിപ്പ് കൗൺസിൽ ചെയർമാൻ റഷാദ് അൽ-അലിമി അംഗീകരിച്ചിട്ടില്ലെന്ന് ന്യൂഡല്‍ഹിയിലെ യെമൻ എംബസി പ്രസ്താവനയില്‍ പറഞ്ഞു. രാജ്യത്തെ ഹൂതി മിലിഷിയയാണ് നിമിഷ പ്രിയയുടെ “മുഴുവൻ കേസും” കൈകാര്യം ചെയ്തതെന്നും പ്രസ്താവനയില്‍ പറഞ്ഞു. നിമിഷ പ്രിയയുടെ വധശിക്ഷ അലിമി അംഗീകരിച്ചതായി പരക്കെ റിപ്പോർട്ട് ചെയ്യപ്പെട്ട് ദിവസങ്ങൾക്ക് ശേഷമാണ് എംബസിയുടെ പ്രസ്താവന.
മുഴുവൻ കേസും കൈകാര്യം ചെയ്തത് ഹൂതി മിലിഷ്യകളാണെന്നും അതിനാൽ യെമൻ റിപ്പബ്ലിക്കിലെ പ്രസിഡൻഷ്യൽ ലീഡർഷിപ്പ് കൗൺസിൽ ചെയർമാൻ ഹിസ് എക്സലൻസി ഡോ. റഷാദ് അൽ-അലിമി വിധി അംഗീകരിച്ചിട്ടില്ലെന്നും യെമൻ സർക്കാർ ഊന്നിപ്പറയുന്നു. തിങ്കളാഴ്ച കേരളത്തിലെ ഒരു മാധ്യമം പ്രസിദ്ധീകരിച്ച റിപ്പോർട്ടുകളോട് പ്രതികരിക്കവെയാണ് യെമൻ എംബസി ഇക്കാര്യം അറിയിച്ചത്.
ഹൂത്തി മിലിഷ്യയുടെ അധികാരത്തിന് കീഴിലാണ് നിമിഷ പ്രിയ ഇപ്പോൾ സനയിൽ തടവിലായിരിക്കുന്നതെന്നും പ്രസ്താവനയിൽ പറയുന്നു.
നിമിഷ പ്രിയയുടെ കേസ് ഏറ്റെടുക്കുമെന്ന് ഇറാനിയൻ ഉന്നത ഉദ്യോഗസ്ഥൻ പ്രഖ്യാപിച്ചതിന് തൊട്ടുപിന്നാലെയാണ് പ്രസ്താവന. യെമൻ എംബസിയുടെ പ്രഖ്യാപനം കേസിന് പുതിയ മാനം നൽകിയെങ്കിലും എംഇഎയുടെ പ്രസ്താവന കാത്തിരിക്കുകയാണ്.
യെമൻ മൂന്ന് വ്യത്യസ്ത സ്ഥാപനങ്ങളായി വിഭജിക്കപ്പെട്ടിരിക്കുന്ന നിലവിലെ രാഷ്ട്രീയ സാഹചര്യത്തിൻ്റെ അടയാളമാണ് എതിർ പ്രസ്താവനകൾ. ഹൂത്തി മിലിഷ്യകൾ സനയെ നിയന്ത്രിക്കുമ്പോൾ, രാജ്യത്തിൻ്റെ മറ്റ് ഭാഗങ്ങൾ നിയന്ത്രിക്കുന്നത് അന്താരാഷ്ട്ര അംഗീകാരമുള്ള സൗദി പിന്തുണയുള്ള സർക്കാരും യുഎഇ പിന്തുണയുള്ള സതേൺ ട്രാൻസിഷൻ കൗൺസിലുമാണ് (എസ്ടിസി). ഡൽഹിയിലെ യെമൻ എംബസി സൗദി പിന്തുണയുള്ള സർക്കാരിനെ പ്രതിനിധീകരിക്കുന്നു; ഹൂതി മിലിഷ്യയ്ക്ക് ഇന്ത്യയുമായി ഔദ്യോഗിക ബന്ധമില്ല.
തലസ്ഥാനമായ സനയെയും ജനസംഖ്യയുടെ 50 ശതമാനത്തെയും നിയന്ത്രിക്കുന്ന അൻസാർ അള്ളാ ഗ്രൂപ്പിലാണ് യെമനിലെ ഹൂതി തീവ്രവാദികൾ സംഘടിതരായിരിക്കുന്നത്. 2017ൽ തൻ്റെ ബിസിനസ് പങ്കാളി തലാൽ അബ്ദു മഹ്ദിയെ കൊലപ്പെടുത്തിയ കേസിലാണ് സനയിൽ നിമിഷ പ്രിയയ്ക്ക് വധശിക്ഷ വിധിച്ചത്.
കേസ് സ്തംഭനാവസ്ഥയിലാണെന്നും നഴ്‌സിൻ്റെ ഗതിയെ കുറിച്ച് ഇപ്പോൾ വ്യക്തതയില്ലെന്നും കേരളത്തിലെ അഭിഭാഷകരുടെയും പ്രവർത്തകരുടെയും കൂട്ടായ്മയായ സേവ് നിമിഷ പ്രിയ ആക്ഷൻ കൗൺസിൽ അവകാശപ്പെട്ടു. കേസിൻ്റെ നിലവിലെ സ്ഥിതി കണ്ടെത്താൻ വിദേശകാര്യ മന്ത്രാലയത്തോട് മുൻകൈയെടുക്കണമെന്ന് ഗ്രൂപ്പിൻ്റെ വക്താവ് അഭ്യർത്ഥിച്ചു.
യെമനിലെ ക്രിമിനൽ കേസുകൾ തീർപ്പാക്കുന്നതിനുള്ള ഒരു സ്ഥാപിത സമ്പ്രദായമായ “ബ്ലഡ് മണി” വഴി ഒരു പരിഹാരം ക്രമീകരിക്കാൻ കഴിയുമെന്ന് ഉറപ്പാക്കാൻ ഇപ്പോൾ ചർച്ചകൾ നടക്കുന്നതിനാൽ നിമിഷ പ്രിയയുടെ അമ്മ പ്രേമ കുമാരി ഇപ്പോൾ യെമനിലാണ്.
