ഏകദേശം 10 വർഷത്തോളം കാനഡയുടെ പ്രധാനമന്ത്രിയായിരുന്ന ജസ്റ്റിന്‍ ട്രൂഡോ തിങ്കളാഴ്ച രാജി വെച്ചതോടെ കനേഡിയന്‍ രാഷ്ട്രീയ വൃത്തങ്ങളിൽ അങ്കലാപ്പ് രൂക്ഷമായിരിക്കുകയാണ്. അദ്ദേഹത്തിൻ്റെ പിൻഗാമിയെക്കുറിച്ചുള്ള ചർച്ചകൾ ഇപ്പോള്‍ ശക്തമായിരിക്കുകയാണ്. ഇന്ത്യൻ വംശജയായ അനിത ആനന്ദ്, പിയറി പൗളിവ്രെ, ക്രിസ്റ്റിയ ഫ്രീലാൻഡ്, മാർക്ക് കോർണി തുടങ്ങിയ പ്രമുഖർ കാനഡയുടെ അടുത്ത പ്രധാനമന്ത്രി സ്ഥാനത്തേക്കുള്ള മത്സരത്തില്‍ മാറ്റുരയ്ക്കാന്‍ തയ്യാറെടുത്തിരിക്കുകയാണ്.
ഇവരിൽ അനിതാ ആനന്ദ് തൻ്റെ കാര്യക്ഷമമായ ഭരണവും പൊതുസേവനത്തിൻ്റെ മികച്ച റെക്കോർഡും കാരണം ഏറ്റവും ശക്തമായ മത്സരാർത്ഥികളിൽ ഒരാളായി കണക്കാക്കപ്പെടുന്നു. അനിതാ ആനന്ദ് കാനഡയുടെ പ്രധാനമന്ത്രിയായാൽ, ട്രൂഡോയുടെ കാലത്ത് ഏറ്റവും താഴ്ന്ന നിലയിലെത്തിയ കാനഡയുടെ ഇന്ത്യയുമായുള്ള ബന്ധം വീണ്ടും മികച്ചതാക്കാൻ കഴിയുമെന്ന് പ്രതീക്ഷിക്കാം.
കാനഡയിൽ ഇന്ത്യൻ വംശജരുടെ ഗണ്യമായ എണ്ണം ഉണ്ട്. ഇക്കാരണത്താൽ, ഇന്ത്യൻ വംശജനായ ഒരാൾ പ്രധാനമന്ത്രിയാകുന്നത് ഇന്ത്യക്ക് ഗുണം ചെയ്യും. നേരത്തെ, ട്രൂഡോയുടെ ഭരണകാലത്ത്, ഹർദീപ് സിംഗ് നിജ്ജാറിൻ്റെ കൊലപാതകത്തിൽ ഇന്ത്യക്കെതിരെ തെറ്റായ ആരോപണങ്ങൾ ഉയർന്നിരുന്നു, അതിനുശേഷം ഇരു രാജ്യങ്ങളും തമ്മിലുള്ള ബന്ധം വഷളായി. കനേഡിയൻ സർക്കാർ ഇക്കാര്യത്തിൽ വ്യക്തമായ തെളിവുകൾ പോലും ഹാജരാക്കിയിട്ടില്ല. പാർട്ടിക്കുള്ളിലെ മറ്റ് നേതാക്കളുമായുള്ള ട്രൂഡോയുടെ ബന്ധം വഷളായതാണ് ഫലം. പലരും അദ്ദേഹത്തിൻ്റെ രാജി ആവശ്യപ്പെട്ടിരുന്നു.
ഒരു ദശാബ്ദത്തോളം കാനഡയുടെ പ്രധാനമന്ത്രിയായി സേവനമനുഷ്ഠിച്ച ശേഷം, ജസ്റ്റിൻ ട്രൂഡോ തിങ്കളാഴ്ചയാണ് തൻ്റെ സ്ഥാനമൊഴിയുന്നതായി പ്രഖ്യാപിച്ചത്. വോട്ടർമാരുടെ പിന്തുണ നഷ്‌ടപ്പെട്ടതും ലിബറൽ പാർട്ടിയിലെ ആഭ്യന്തര സംഘട്ടനങ്ങളുമാണ് രാജിക്ക് പിന്നിലെ പ്രധാന കാരണങ്ങളായി അദ്ദേഹം ചൂണ്ടിക്കാട്ടുന്നത്. പാർട്ടിയുടെ പുതിയ നേതാവിനെ തിരഞ്ഞെടുക്കുന്നത് വരെ താൻ പ്രധാനമന്ത്രിയായി തുടരുമെന്ന് ട്രൂഡോ വ്യക്തമാക്കി. “ഞാൻ ഒരു പോരാട്ടത്തിൽ നിന്ന് പിന്നോട്ട് പോകുന്നില്ല, പ്രത്യേകിച്ചും അത് നമ്മുടെ രാജ്യത്തിനും പാർട്ടിക്കും പ്രധാനമാണ്. എന്നാൽ കാനഡക്കാരുടെ താൽപ്പര്യങ്ങളും ജനാധിപത്യത്തിൻ്റെ ക്ഷേമവുമാണ് എനിക്ക് പ്രധാനം,”അദ്ദേഹം പറഞ്ഞു.
അതിനിടെ, ലിബറൽ പാർട്ടിക്കുള്ളിൽ അടുത്ത പ്രധാനമന്ത്രിയെ കണ്ടെത്താനുള്ള മൽസരം ശക്തമായി. ഇത് മനസ്സിൽ വെച്ചുകൊണ്ട്, പാർലമെൻ്റ് സമ്മേളനം ജനുവരി 27 മുതൽ മാർച്ച് 24 വരെ നിർത്തിവച്ചിരിക്കുകയാണ്. അതിനാൽ ലിബറൽ പാർട്ടിക്ക് പുതിയ നേതാവിനെ തിരഞ്ഞെടുക്കാൻ സമയം ലഭിക്കും. ഈ സമയത്ത്, പ്രതിപക്ഷ പാർട്ടികളും ലിബറൽ പാർട്ടിയെ വെല്ലുവിളിക്കാനുള്ള ഒരുക്കങ്ങൾ ആരംഭിച്ചിട്ടുണ്ട്, അതിനാൽ പുതിയ നേതാവിനെ തിരഞ്ഞെടുത്തതിന് ശേഷം വസന്തകാല തിരഞ്ഞെടുപ്പിന് സാധ്യതയുണ്ട്. ഇതിനെല്ലാം ഇടയിൽ ജസ്റ്റിൻ ട്രൂഡോയ്ക്ക് പകരക്കാരനാകാവുന്ന അഞ്ച് സ്ഥാനാർത്ഥികളിൽ ഇന്ത്യൻ വംശജയായ നേതാവ് അനിത ആനന്ദിനെയും പരിഗണിക്കുന്നുണ്ട്.
ജസ്റ്റിൻ ട്രൂഡോയ്ക്ക് പകരക്കാരനാകാൻ സാധ്യതയുള്ള ആദ്യ അഞ്ച് സ്ഥാനാർത്ഥികളിൽ ഇന്ത്യൻ വംശജയായ അനിത ആനന്ദിനെ ബിബിസി കണക്കാക്കിയിട്ടുണ്ട്.. 57 കാരിയായ അനിത ആനന്ദ് ഇപ്പോൾ രാജ്യത്തിൻ്റെ ഗതാഗത, ആഭ്യന്തര മന്ത്രിയായി സേവനമനുഷ്ഠിക്കുകയാണ്. വിദ്യാഭ്യാസപരവും രാഷ്ട്രീയവുമായ പശ്ചാത്തലം കാരണം, അവര്‍ ഒരു പ്രധാന രാഷ്ട്രീയ വ്യക്തിയായി ഉയർന്നു. അനിത ആനന്ദിന് ക്വീൻസ് യൂണിവേഴ്‌സിറ്റിയിൽ നിന്ന് പൊളിറ്റിക്കൽ സ്റ്റഡീസ് ബിരുദം, ഓക്‌സ്‌ഫോർഡ് യൂണിവേഴ്‌സിറ്റിയിൽ നിന്ന് ജൂറിസ്‌പ്രൂഡൻസ് ബിരുദം, ഡൽഹൗസി യൂണിവേഴ്‌സിറ്റിയിൽ നിന്ന് നിയമ ബിരുദം, ടൊറൻ്റോ യൂണിവേഴ്‌സിറ്റിയിൽ നിന്ന് നിയമ ബിരുദവും കൂടാതെ, യേൽ, ക്വീൻസ് യൂണിവേഴ്സിറ്റി, വെസ്റ്റേൺ യൂണിവേഴ്സിറ്റി തുടങ്ങിയ പ്രശസ്ത സ്ഥാപനങ്ങളിൽ അദ്ധ്യാപനവും നടത്തിയിട്ടുണ്ട്. രാഷ്ട്രീയത്തിൽ പ്രവേശിക്കുന്നതിന് മുമ്പ് അവർ ടൊറൻ്റോ സർവകലാശാലയിൽ നിയമ പ്രൊഫസറായിരുന്നു.
നോവ സ്കോട്ടിയയിലെ കെൻ്റ്‌വില്ലിലാണ് അനിത ആനന്ദ് ജനിച്ചത്. മാതാപിതാക്കളായ സരോജ് ഡി റാം, എസ്.വി. (ആൻഡി) ആനന്ദും ഡോക്ടര്‍മാരായിരുന്നു. രണ്ട് സഹോദരിമാരായ ഗീതയും സോണിയ ആനന്ദും അവരവരുടെ മേഖലകളിൽ കര്‍മ്മനിരതരാണ്. അനിത ആനന്ദ് 2019 ലാണ് രാഷ്ട്രീയത്തിൽ പ്രവേശിച്ചത്. അതിനുശേഷം ലിബറൽ പാർട്ടിയുടെ ഏറ്റവും അഭിലഷണീയമായ അംഗങ്ങളിൽ ഒരാളായി മാറി. COVID-19 പാൻഡെമിക് സമയത്ത് പൊതു സേവനങ്ങളുടെയും സംഭരണത്തിൻ്റെയും മന്ത്രി എന്ന നിലയിൽ അവര്‍ ഒരു പ്രധാന പങ്ക് വഹിച്ചു. വാക്സിനുകൾ വാങ്ങുന്നതിനുള്ള അവരുടെ ശ്രമങ്ങള്‍ ശ്ലാഖനീയമായിരുന്നു. 2021-ൽ അവർ കാനഡയുടെ പ്രതിരോധ മന്ത്രിയായി തിരഞ്ഞെടുക്കപ്പെട്ടു, അവിടെ റഷ്യ-ഉക്രെയ്ൻ യുദ്ധത്തിൽ ഉക്രെയ്നെ സഹായിക്കുന്നതിൽ അവർ ഒരു പ്രധാന പങ്ക് വഹിച്ചു.
