ന്യൂഡല്‍ഹി: ഫെബ്രുവരി അഞ്ചിന് ഡൽഹിയിൽ നടക്കുന്ന നിയമസഭാ തിരഞ്ഞെടുപ്പിൽ ഭാരതീയ ജനതാ പാർട്ടി വിജയിച്ചാൽ അഞ്ച് വർഷത്തിനുള്ളിൽ രാജ്യതലസ്ഥാനം ഗതാഗതക്കുരുക്കിൽ നിന്നും വായു മലിനീകരണത്തിൽ നിന്നും മുക്തമാകുമെന്ന് കേന്ദ്രമന്ത്രി നിതിൻ ഗഡ്കരി പറഞ്ഞു. കേന്ദ്രത്തിൽ മോദി സർക്കാരും ഡൽഹിയിൽ ബിജെപി സർക്കാരും ഉണ്ടെങ്കിൽ തലസ്ഥാനത്തിൻ്റെ പുരോഗതി ബുള്ളറ്റ് ട്രെയിൻ പോലെ 10 മടങ്ങ് വേഗത്തിലാകുമെന്നും ഗഡ്കരി പറഞ്ഞു.
നംഗ്ലോയ് ജാട്ടിൽ ഒരു പൊതുയോഗത്തെ അഭിസംബോധന ചെയ്തുകൊണ്ട് മുതിർന്ന ബിജെപി നേതാവ് വായു മലിനീകരണം, ഗതാഗതക്കുരുക്ക്, മാലിന്യ സംസ്കരണം തുടങ്ങിയ പ്രശ്നങ്ങളിൽ നിന്ന് ഡൽഹിയെ മോചിപ്പിക്കുമെന്ന് വാഗ്ദാനം ചെയ്തു. “ഞാൻ നിങ്ങൾക്ക് എൻ്റെ വാക്ക് നൽകുന്നു. നിങ്ങൾ ഡൽഹി സർക്കാരിൽ ബിജെപി എഞ്ചിൻ സ്ഥാപിച്ചാൽ, അഞ്ച് വർഷത്തിനുള്ളിൽ ഞങ്ങൾ ഡൽഹിയെ ഗതാഗതക്കുരുക്കിൽ നിന്നും വായു മലിനീകരണത്തിൽ നിന്നും മോചിപ്പിക്കും. ഞാൻ ഇത് വാഗ്ദാനം ചെയ്യുന്നു,” അദ്ദേഹം പറഞ്ഞു.
ദേശീയ തലസ്ഥാനത്തെ ജല-മലിനീകരണ പ്രതിസന്ധി പരിഹരിക്കുന്നതിൽ ആം ആദ്മി പാർട്ടി (എഎപി) സർക്കാർ പരാജയപ്പെട്ടെന്നും ഗഡ്കരി ആരോപിച്ചു. “നിങ്ങൾ വിശ്വസിച്ചിരുന്ന ആളുകൾ കുടിവെള്ളത്തെക്കുറിച്ചോ യമുനയുടെ ശുദ്ധീകരണത്തെക്കുറിച്ചോ സംസാരിച്ചിട്ടില്ല,” അദ്ദേഹം കൂട്ടിച്ചേര്‍ത്തു.
