വാഷിംഗ്ടണ്‍: കാനഡ, ചൈന, മെക്സിക്കോ എന്നീ രാജ്യങ്ങളുൾപ്പെടെയുള്ള പ്രധാന യുഎസ് വ്യാപാര പങ്കാളികൾക്ക് പ്രസിഡൻ്റ് ഡൊണാൾഡ് ട്രംപ് ഏര്‍പ്പെടുത്തിയ ആക്രമണാത്മക തീരുവ ശനിയാഴ്ച മുതല്‍ ആരംഭിക്കുമെന്ന് വൈറ്റ് ഹൗസ് വെള്ളിയാഴ്ച സ്ഥിരീകരിച്ചു.
മെക്സിക്കോ, കാനഡ എന്നീ രാജ്യങ്ങള്‍ അമേരിക്കയിലേക്ക് ഇറക്കുമതി ചെയ്യുന്ന ഉല്പന്നങ്ങള്‍ക്ക് 25% തീരുവയും ചൈനയ്‌ക്ക് 10% തീരുവയും ഏർപ്പെടുത്തുമെന്ന് വൈറ്റ് ഹൗസ് പ്രസ് സെക്രട്ടറി കരോലിൻ ലീവിറ്റ് ബ്രീഫിംഗ് റൂമിൽ മാധ്യമപ്രവർത്തകരോട് പറഞ്ഞു.
ചില മാധ്യമങ്ങൾ വിശേഷിപ്പിച്ച മാർച്ച് 1 മുതലുള്ള താരിഫ് റിപ്പോർട്ടുകള്‍ ലീവിറ്റ് തള്ളിക്കളഞ്ഞു, അവ തെറ്റാണെന്നും ഫെബ്രുവരി 1 മുതൽ രാജ്യങ്ങളിൽ അടിച്ചേൽപ്പിക്കാൻ ട്രംപ് പദ്ധതിയിടുകയാണെന്നും പറഞ്ഞു.
ഇവ പ്രസിഡൻ്റ് നൽകിയ വാഗ്ദാനങ്ങളാണെന്ന് ലീവിറ്റ് പറഞ്ഞു. തിരഞ്ഞെടുപ്പ് പ്രചാരണ വേളയിൽ, ഫെബ്രുവരി ഒന്നിന് കാനഡയിൽ നിന്നും മെക്‌സിക്കോയിൽ നിന്നുമുള്ള ഇറക്കുമതി തടയുമെന്ന തൻ്റെ ഭീഷണി പിന്തുടരുമെന്ന് ട്രംപ് ആവർത്തിച്ച് പറഞ്ഞിരുന്നു. ചൈനീസ് നിർമ്മിത ഉൽപ്പന്നങ്ങൾക്ക് 60% വരെ ചുങ്കം ചുമത്തുമെന്നും അദ്ദേഹം പറഞ്ഞിരുന്നു. എന്നാൽ, വൈറ്റ് ഹൗസിൽ തിരിച്ചെത്തിയ ആദ്യ ദിവസം തന്നെ അടിയന്തര നടപടിയെടുക്കുന്നത് നിർത്തി, പകരം വിഷയം പഠിക്കാൻ തൻ്റെ ഭരണകൂടത്തിന് ഉത്തരവിടുകയായിരുന്നു.
നേരത്തെ, കനേഡിയന്‍ പ്രധാനമന്ത്രി ജസ്റ്റിൻ ട്രൂഡോ യുഎസ് താരിഫുകളോടുള്ള അവരുടെ പ്രതികരണം “ശക്തവും എന്നാൽ ന്യായയുക്തവുമായിരിക്കും” എന്ന് പറഞ്ഞിരുന്നു.
പ്രസിഡൻ്റ് കാനഡയ്‌ക്കെതിരെ എന്തെങ്കിലും താരിഫ് നടപ്പിലാക്കാൻ തീരുമാനിച്ചാൽ, ഞങ്ങൾ പ്രതികരിക്കും. ലക്ഷ്യബോധമുള്ളതും ശക്തവും എന്നാൽ ന്യായയുക്തവും ഉടനടിയുള്ളതുമായ പ്രതികരണമായിരിക്കും അതെന്ന് കാനഡ-യുഎസ് ബന്ധങ്ങളെക്കുറിച്ചുള്ള തൻ്റെ ഉപദേശക സമിതിയുമായി വെള്ളിയാഴ്ച നടന്ന യോഗത്തിന് മുമ്പ് ട്രൂഡോ മാധ്യമപ്രവർത്തകരോട് പറഞ്ഞു.
