ദോഹ (ഖത്തര്‍): ആയുധങ്ങൾ വാങ്ങുന്നത് സംബന്ധിച്ച് ഇസ്രായേൽ അമേരിക്കയുമായി ഒരു പുതിയ കരാറിൽ ഏർപ്പെട്ടു. ഈ കരാർ പ്രകാരം, ഗാസയില്‍ പ്രയോഗിക്കാന്‍ ഇസ്രായേലിന് അമേരിക്കയിൽ നിന്ന് 8.8 ബില്യൺ ഡോളറിന്റെ മാരകായുധങ്ങള്‍ ലഭിക്കും.
ഗാസയിലെ നിലവിലുള്ള പ്രതിസന്ധി നേരിടാനാണ് അമേരിക്ക ഇസ്രായേലിന് ഈ ആയുധം നല്‍കുന്നത്. ഇസ്രായേലും ഹമാസും തമ്മിലുള്ള യുദ്ധം 2023 ഒക്ടോബർ മുതൽ തുടരുകയാണ്. അന്നു മുതല്‍ ഏകദേശം 60,000 പലസ്തീൻ മുസ്ലീങ്ങളെയാണ് ഇസ്രായേല്‍ സൈന്യം കൊലപ്പെടുത്തിയത്. ഹമാസിനെ ഉന്മൂലനം ചെയ്യാനാണെന്നാണ് ഇസ്രായേലിന്റെ അവകാശവാദമെങ്കിലും, ഗാസയില്‍ നിന്ന് മുസ്ലീങ്ങളെ കൂട്ടത്തോടെ വംശഹത്യ ചെയ്യുകയാണ് ലക്ഷ്യം. വിവിധ തരം മാരകായുധങ്ങള്‍ ഇസ്രായേലിന് നല്‍കി അമേരിക്കയും അതിന് കൂട്ടു നില്‍ക്കുന്നു.
ഇസ്രായേലിനുള്ള ഈ ആയുധ വിതരണം വളരെക്കാലം തുടരുമെന്ന് ട്രം‌പ് ഭരണകൂടം പറഞ്ഞു. യുഎസ് ആയുധശേഖരത്തിൽ നിന്നാന് ചില ആയുധങ്ങൾ ഇസ്രായേലിന് നൽകുന്നത്. പക്ഷേ അവയിൽ മിക്കതും എത്തിക്കാൻ ഒരു വർഷമോ അതിൽ കൂടുതലോ എടുക്കുമെന്നും പറയുന്നു.
ആക്രമണ ഹെലികോപ്റ്ററുകളിൽ ഉപയോഗിക്കുന്ന 155 എംഎം പീരങ്കി ഷെല്ലുകളും ഹെൽഫയർ എജിഎം 114 മിസൈലുകളുമാണ് അമേരിക്ക ഇസ്രായേലിന് നൽകുന്നത്. ഇതിനുപുറമെ, 250 കിലോഗ്രാം ഭാരമുള്ള മാരക ബോംബുകളും ഇസ്രായേലിന് നൽകും. ഗാസ മുതൽ ലെബനൻ വരെ ഇസ്രായേൽ ഈ ബോംബുകൾ വ്യാപകമായി ഉപയോഗിച്ചിട്ടുണ്ട്.
ഗാസയിലെ ജനസംഖ്യ ഏകദേശം 21 ലക്ഷമാണ്. ഇത്തരമൊരു സാഹചര്യത്തിൽ, ഇസ്രായേൽ അമേരിക്കയിൽ നിന്ന് വാങ്ങിയ ആയുധങ്ങൾ ഗാസയിലെ ജനങ്ങളെ കൊല്ലാൻ ഉപയോഗിക്കുമോ എന്ന ചോദ്യം ഉയർന്നുവരുന്നുണ്ട്. ഗാസയിലെ ആശുപത്രികളെയും സ്കൂളുകളെയും ഇസ്രായേൽ തുടർച്ചയായി ആക്രമിക്കുന്നതായും റിപ്പോര്‍ട്ടുകള്‍ പറയുന്നു.
ഗാസയുടെ പകുതി പിടിച്ചെടുക്കുക എന്നതാണ് തന്റെ ലക്ഷ്യമെന്ന് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു അടുത്തിടെ പറഞ്ഞിരുന്നു. ഇസ്രായേൽ സൈന്യം ഈ പാതയിലൂടെ മുന്നോട്ട് നീങ്ങുകയാണ്. തന്നെയുമല്ല, പലസ്തീനികള്‍ ഗാസ വിട്ട് മറ്റെവിടെയെങ്കിലും പോകണം എന്ന യു എസ് പ്രസിഡന്റ് ട്രം‌പിന്റെ ഉത്തരവും ഏറെ വിവാദം സൃഷ്ടിച്ചിരുന്നു. അറബ് ലോകത്തിന്റെ വിമര്‍ശനവും ട്രം‌പ് നേരിട്ടിരുന്നു.
അതിനിടെ, ഇറാനെ ആക്രമിക്കാനുള്ള തയ്യാറെടുപ്പിലാണ് ഇസ്രായേല്‍. ട്രം‌പ് ഏതു നിമിഷവും ഇറാനില്‍ ബോംബാക്രമണം നടത്തുമെന്ന് പ്രസ്താവിച്ചിരുന്നു. അത്തരമൊരു സാഹചര്യത്തിൽ, ഇറാനെ ആക്രമിക്കാൻ അമേരിക്ക ഇസ്രായേലിന് നല്ലൊരു പങ്ക് ആയുധങ്ങൾ വിറ്റിട്ടുണ്ടാകാമെന്ന് പറയപ്പെടുന്നു.
