രാമനവമി ആഘോഷങ്ങൾ സമാധാനപരമായി നടത്തുന്നതിനും സംഘർഷങ്ങൾ ഒഴിവാക്കുന്നതിനുമായി മഹാരാഷ്ട്ര, ഉത്തർപ്രദേശ്, ബീഹാർ, പശ്ചിമ ബംഗാൾ എന്നിവയുൾപ്പെടെ നിരവധി സംസ്ഥാനങ്ങളിൽ സുരക്ഷ ശക്തമാക്കി. അയോദ്ധ്യയില്‍ ഏകദേശം 10 ലക്ഷം ഭക്തർ എത്തുമെന്ന് പ്രതീക്ഷിക്കുന്നു. മീററ്റ്, മുസാഫർനഗർ, സഹാറൻപൂർ, അലിഗഡ്, മൊറാദാബാദ് തുടങ്ങിയ പടിഞ്ഞാറൻ ജില്ലകളിൽ ഡ്രോണുകളും സിസിടിവി ക്യാമറകളും ഉപയോഗിച്ച് ഘോഷയാത്രകൾ സൂക്ഷ്മമായി നിരീക്ഷിക്കുന്നുണ്ട്. അതേസമയം, ബിഹാറിൽ ഡിജെ ഉപയോഗം പൂർണ്ണമായും നിരോധിച്ചിരിക്കുന്നു. റോഹ്താസ് ജില്ലയിൽ മാത്രം 230-ലധികം ഡിജെകൾ അധികൃതർ പിടിച്ചെടുത്തു.
രാമനവമി പ്രമാണിച്ച് രാജ്യത്തെ പല സംസ്ഥാനങ്ങളിലും സുരക്ഷാ ക്രമീകരണങ്ങൾ വർദ്ധിപ്പിച്ചിട്ടുണ്ട്. കിംവദന്തികളിൽ വിശ്വസിക്കരുതെന്നും സാമുദായിക ഐക്യം നിലനിർത്തണമെന്നും പോലീസ് ജനങ്ങളോട് അഭ്യർത്ഥിച്ചു. ക്രമസമാധാന നിലയെ ബാധിക്കുന്ന തരത്തിലുള്ള കിംവദന്തികൾ പ്രചരിപ്പിക്കുന്നത് തടയാൻ സോഷ്യൽ മീഡിയ പ്ലാറ്റ്‌ഫോമുകളിൽ പ്രത്യേക ശ്രദ്ധ ചെലുത്തും. ഘോഷയാത്രകളിൽ സംസ്ഥാനങ്ങളിൽ നിരീക്ഷണം വർദ്ധിപ്പിക്കുന്നതിന് സിസിടിവികളും ഡ്രോണുകളും ഉപയോഗിക്കും.
രാമനവമി ഉത്സവത്തിന് മുന്നോടിയായി മഹാരാഷ്ട്രയില്‍, പ്രത്യേകിച്ച് സെൻസിറ്റീവ് പ്രദേശങ്ങളിൽ, അതീവ ജാഗ്രത പാലിക്കാൻ പോലീസിനോട് ആവശ്യപ്പെട്ടിട്ടുണ്ടെന്ന് ഉന്നത ഉദ്യോഗസ്ഥര്‍ പറഞ്ഞു. രണ്ട് വർഷം മുമ്പ് ഈ അവസരത്തിൽ നഗരത്തിൽ മതപരമായ ഘോഷയാത്രകൾക്കിടെ സംഘർഷങ്ങൾ ഉണ്ടായത് കണക്കിലെടുത്താണ് ഈ തീരുമാനം എടുത്തിരിക്കുന്നത്. കൂടാതെ, ഛത്രപതി സംഭാജിനഗർ ജില്ലയിൽ മുഗൾ ചക്രവർത്തി ഔറംഗസേബിന്റെ ശവകുടീരം നീക്കം ചെയ്യണമെന്ന് ആവശ്യപ്പെട്ട് മാർച്ചിൽ നടന്ന പ്രതിഷേധത്തെത്തുടർന്ന് നാഗ്പൂരിൽ അടുത്തിടെ അക്രമവും വർഗീയ സംഘർഷവും ഉണ്ടായി.
ക്രമസമാധാന നില നിലനിർത്തുന്നതിന് പോലീസ് സേന ജാഗ്രത പാലിക്കാൻ സിറ്റി പോലീസിലെ എല്ലാ യൂണിറ്റ് കമാൻഡർമാരോടും ജില്ലാ പോലീസ് സൂപ്രണ്ടുമാരോടും ആവശ്യപ്പെട്ടിട്ടുണ്ടെന്ന് പോലീസ് ഉദ്യോഗസ്ഥൻ പറഞ്ഞു. അടുത്തിടെ പോലീസ് ഡയറക്ടർ ജനറൽ രശ്മി ശുക്ല സ്ഥിതിഗതികൾ അവലോകനം ചെയ്തതായി പറഞ്ഞു. സംസ്ഥാനത്ത് സുരക്ഷാ സംവിധാനം പ്രധാനമാണെന്ന് അവര്‍ പറഞ്ഞു. കാരണം മുംബൈയിലെ അന്ധേരി, മലദ്, കാന്തിവാലി, ബോറിവാലി തുടങ്ങിയ പല പ്രദേശങ്ങളിലും, രാമനവമി ഘോഷയാത്രകൾ പള്ളികൾക്ക് സമീപമുള്ള ഇടുങ്ങിയ തെരുവുകളിലൂടെ കടന്നുപോകുന്നു, ഇത് സംഘർഷാവസ്ഥയിലേക്ക് നയിച്ചേക്കാം. പ്രത്യേകിച്ച് സാമുദായിക സംഘർഷത്തിന്റെ ചരിത്രമുള്ള സ്ഥലങ്ങളിൽ കൂടുതൽ പോലീസ് സേനയെ വിന്യസിക്കും. നഗരങ്ങളിലെ രാമനവമി ഘോഷയാത്രകൾ ഡ്രോൺ ക്യാമറകൾ ഉപയോഗിച്ച് നിരീക്ഷിക്കും. ഏപ്രിൽ 12 ന് വരുന്ന ഹനുമാൻ ജയന്തി വരെ പോലീസിന് നൽകിയിട്ടുള്ള ജാഗ്രതാ നിർദ്ദേശം പ്രാബല്യത്തിൽ തുടരുമെന്ന് ഉദ്യോഗസ്ഥർ പറഞ്ഞു.
ഉത്തർപ്രദേശിൽ രാമനവമിക്ക് വിപുലമായ ഒരുക്കങ്ങളാണ് നടത്തിയിട്ടുള്ളത്. പ്രത്യേകിച്ച് അയോധ്യയിൽ, ഏകദേശം 10 ലക്ഷം ഭക്തർ എത്തുമെന്ന് പ്രതീക്ഷിക്കുന്നു. മീററ്റ്, മുസാഫർനഗർ, സഹാറൻപൂർ, അലിഗഡ്, മൊറാദാബാദ് തുടങ്ങിയ പടിഞ്ഞാറൻ ജില്ലകളിൽ ഡ്രോണുകളും സിസിടിവി ക്യാമറകളും ഉപയോഗിച്ച് ഘോഷയാത്രകൾ സൂക്ഷ്മമായി നിരീക്ഷിക്കുന്നുണ്ട്. ലഖ്‌നൗവിലെ മുതിർന്ന ഉദ്യോഗസ്ഥർ വീഡിയോ കോൺഫറൻസിംഗിലൂടെ ഒരുക്കങ്ങൾ നിരീക്ഷിക്കുന്നു.
ബിഹാറിൽ ഡിജെ ഉപയോഗം പൂർണ്ണമായും നിരോധിച്ചിരിക്കുന്നു. റോഹ്താസ് ജില്ലയിൽ മാത്രം 230-ലധികം ഡിജെകൾ അധികൃതർ പിടിച്ചെടുത്തു. തിരഞ്ഞെടുപ്പിനും വഖഫ് ബില്ലിനെതിരെ നടന്നുകൊണ്ടിരിക്കുന്ന പ്രതിഷേധങ്ങൾക്കും ഇടയിൽ എന്തെങ്കിലും അസ്വസ്ഥതകൾ ഉണ്ടാകാതിരിക്കാൻ സമാധാന സമിതി യോഗങ്ങൾ നടക്കുകയും സോഷ്യൽ മീഡിയ അക്കൗണ്ടുകൾ നിരീക്ഷിക്കുകയും ചെയ്യുന്നു.
രാമനവമി ആഘോഷങ്ങളിൽ ക്രമസമാധാന പ്രശ്നങ്ങൾ ഉണ്ടാകാതിരിക്കാൻ പശ്ചിമ ബംഗാളിൽ ഉടനീളം പോലീസ് മുൻകരുതൽ നടപടികൾ സ്വീകരിച്ചിട്ടുണ്ടെന്ന് ഒരു മുതിർന്ന ഉദ്യോഗസ്ഥൻ വെള്ളിയാഴ്ച പറഞ്ഞതായി റിപ്പോർട്ടുകൾ പറയുന്നു. മുൻകാലങ്ങളിൽ അക്രമസംഭവങ്ങൾ ഉണ്ടായതിനാൽ എല്ലാ ജില്ലകളിലും സുരക്ഷ വർദ്ധിപ്പിച്ചിട്ടുണ്ടെന്നും സെൻസിറ്റീവ് പ്രദേശങ്ങളിൽ പ്രത്യേക ശ്രദ്ധ ചെലുത്തുന്നുണ്ടെന്നും ഉദ്യോഗസ്ഥൻ പറഞ്ഞു.
ഇന്റലിജൻസ് വിവരങ്ങളുടെ അടിസ്ഥാനത്തിൽ ഞങ്ങൾ സുരക്ഷാ ക്രമീകരണങ്ങൾ ഏർപ്പെടുത്തിയിട്ടുണ്ടെന്ന് ഉദ്യോഗസ്ഥൻ പറഞ്ഞു. സംസ്ഥാനത്തുടനീളം, പ്രത്യേകിച്ച് സെൻസിറ്റീവ് പ്രദേശങ്ങളിൽ മതിയായ പോലീസ് സേനയെ വിന്യസിച്ചിട്ടുണ്ടെന്ന് ഞങ്ങൾ ഉറപ്പാക്കിയിട്ടുണ്ട്. ബന്ധപ്പെട്ട ജില്ലകളിലെ പോലീസ് ഭരണകൂടം ഇക്കാര്യത്തിൽ ജാഗ്രത പാലിക്കാൻ ആവശ്യപ്പെട്ടിട്ടുണ്ട്. മുൻകരുതൽ നടപടിയായി ഏപ്രിൽ 9 വരെ എല്ലാ പോലീസുകാരുടെയും അവധി റദ്ദാക്കി. ഹൗറ, ഹൂഗ്ലി, നോർത്ത് ദിനാജ്പൂർ, മാൾഡ ജില്ലകളിലെ സെൻസിറ്റീവ് പ്രദേശങ്ങളിൽ മതിയായ പോലീസ് സേനയെ വിന്യസിച്ചിട്ടുണ്ട്.
പോലീസ് ഉദ്യോഗസ്ഥർ പതിവായി പട്രോളിംഗ് നടത്തുമെന്നും, പൊതു അറിയിപ്പ് സംവിധാനത്തിലൂടെ ജനങ്ങളെ പ്രശ്നങ്ങളെക്കുറിച്ച് ബോധവാന്മാരാക്കുമെന്നും ഐപിഎസ് ഉദ്യോഗസ്ഥൻ പറഞ്ഞു. ഞായറാഴ്ചത്തെ രാമനവമി ആഘോഷങ്ങളിൽ ക്രമസമാധാനത്തെ ബാധിക്കുന്ന തരത്തിലുള്ള കിംവദന്തികൾ പ്രചരിക്കുന്നത് തടയാൻ സോഷ്യൽ നെറ്റ്‌വർക്കിംഗ് സൈറ്റുകളും വിവിധ പോർട്ടലുകളും ഞങ്ങൾ സൂക്ഷ്മമായി നിരീക്ഷിക്കുന്നുണ്ട്.
കൊൽക്കത്തയിലെ സെൻസിറ്റീവ് സ്ഥലങ്ങളിൽ ഏകദേശം 5000 പോലീസുകാരെ വിന്യസിക്കുമെന്ന് റിപ്പോർട്ട്. ഇതിനുപുറമെ, സമഗ്ര നിരീക്ഷണത്തിനായി വിവിധ സ്ഥലങ്ങളിൽ സിസിടിവി ക്യാമറകൾ സ്ഥാപിച്ചിട്ടുണ്ട്. ആകാശ നിരീക്ഷണത്തിനായി ഡ്രോണുകളും ഉപയോഗിക്കും. സംസ്ഥാനത്തുടനീളമുള്ള രാമനവമി ഘോഷയാത്രകളുടെ ഫോട്ടോകളും വീഡിയോകളും പോലീസ് ഭരണകൂടം എടുക്കും. ഉത്സവവുമായി ബന്ധപ്പെട്ട നിയന്ത്രണങ്ങളെക്കുറിച്ചും ചെയ്യേണ്ട കാര്യങ്ങളെക്കുറിച്ചും ചെയ്യരുതാത്ത കാര്യങ്ങളെക്കുറിച്ചും മതനേതാക്കളുമായി സംസാരിക്കുമെന്നും അദ്ദേഹം പറഞ്ഞു.
