ദോഹ: ഇറാനും അമേരിക്കയും തമ്മിലുള്ള സംഘർഷം വർദ്ധിച്ചുകൊണ്ടിരിക്കുകയാണ്. വൈറ്റ് ഹൗസിൽ തിരിച്ചെത്തിയതിനുശേഷം, പ്രസിഡന്റ് ഡൊണാൾഡ് ട്രംപ് ആണവ കരാറിനായി ഇറാനിൽ സമ്മർദ്ദം ചെലുത്തിവരികയാണ്. തങ്ങളുടെ ആണവ പദ്ധതിയെക്കുറിച്ച് നേരിട്ട് ചർച്ച നടത്തണമെന്നും അല്ലാത്തപക്ഷം ബോംബിട്ട് തകർക്കുമെന്നുമാണ് ട്രംപിന്റെ ഭീഷണി.
അമേരിക്കയുടെ ഭീഷണികളെ ഭയപ്പെടില്ലെന്ന് ഇറാനിയൻ ഉദ്യോഗസ്ഥൻ വ്യക്തമാക്കി. യുഎസ് പ്രസിഡന്റ് ഡൊണാൾഡ് ട്രംപിന്റെ നേരിട്ടുള്ള ചർച്ചകൾക്കുള്ള ആവശ്യം ഇറാൻ നിരസിച്ചതായും എന്നാൽ ഇരു രാജ്യങ്ങൾക്കുമിടയിൽ സന്ദേശങ്ങൾ കൈമാറുന്നതിനുള്ള ഒരു മാർഗമായി ദീർഘകാലമായി പ്രവർത്തിക്കുന്ന ഒമാൻ വഴി പരോക്ഷ ചർച്ചകൾ തുടരാൻ ആഗ്രഹിക്കുന്നതായും പേര് വെളിപ്പെടുത്തരുതെന്ന നിബന്ധനയോടെ ഒരു മാധ്യമത്തോട് സംസാരിച്ച ഉദ്യോഗസ്ഥൻ പറഞ്ഞു. ഇതിനുപുറമെ, ഇറാനെതിരെ അമേരിക്ക നടത്തുന്ന ഏതെങ്കിലും സൈനിക നടപടിയിൽ പങ്കു ചേർന്നാൽ, ആ പങ്കു ചേരുന്നവരും ഇറാന്റെ ലക്ഷ്യങ്ങളായി മാറുമെന്ന് അദ്ദേഹം തന്റെ അയൽക്കാർക്ക് മുന്നറിയിപ്പ് നൽകിയിട്ടുണ്ട്.
ഒരു ആണവ കരാറിൽ എത്തിയില്ലെങ്കിൽ, താൻ ആ രാജ്യത്തെ ബോംബിട്ട് തകർക്കുമെന്ന് ട്രംപ് ഇറാന് കർശന മുന്നറിയിപ്പ് നൽകിയിരിക്കുകയാണ്. ഇറാന്റെ പല അയൽ രാജ്യങ്ങളിലും അമേരിക്കയ്ക്ക് വ്യോമതാവളങ്ങളുണ്ട്. ഈ താവളങ്ങളുടെ സഹായത്തോടെ അമേരിക്ക ഇറാനെ ആക്രമിക്കുമെന്ന് വിദഗ്ധർ വിശ്വസിക്കുന്നു. ഇറാനെ ആക്രമിക്കാൻ അമേരിക്കയെ അനുവദിച്ചാൽ, അമേരിക്കയെ ആക്രമിക്കുന്നതിനു മുമ്പ് ആ രാജ്യങ്ങളായിരിക്കും ഇറാന്റെ ലക്ഷ്യം എന്ന് പറഞ്ഞുകൊണ്ട് ഇറാൻ അയൽ രാജ്യങ്ങളായ ഒമാനെയും ഇറാഖിനെയും ഭീഷണിപ്പെടുത്തി. അമേരിക്കയുമായി പിന്നീട് ഇടപെടുമെന്നും ആദ്യം അവര്‍ക്ക് പിന്തുണ നല്‍കുന്ന രാജ്യങ്ങളായിരിക്കും തിക്തഫലങ്ങള്‍ അനുഭവിക്കുക എന്നും ഇറാൻ വ്യക്തമാക്കിയിട്ടുണ്ട്.
ഗാസ യുദ്ധത്തിന്റെ തുടക്കം മുതൽ ഇറാനും ഇസ്രായേലും തമ്മിലുള്ള സംഘർഷങ്ങൾ വർദ്ധിച്ചു കൊണ്ടിരിക്കുകയാണ്. ഇറാൻ-ഇസ്രായേൽ സംഘർഷങ്ങള്‍ അമേരിക്കയുടെ കോപവും വർദ്ധിപ്പിച്ചു. ഗാസയിൽ ഇസ്രായേൽ നടത്തിയ ബോംബാക്രമണത്തിനെതിരെ ഇറാന്റെ പ്രതിരോധ നടപടികള്‍ ട്രംപിനെ രോഷാകുലനാക്കി. അമേരിക്കയുടെ സഖ്യകക്ഷിയായ ഇസ്രായേലിനെതിരെയുള്ള ആക്രമണം എന്തു വില കൊടുത്തും സം‌രക്ഷിക്കുന്ന നിലപാടാണ് ട്രം‌പിന്റേത്.
