അയോദ്ധ്യ: ഉത്തർപ്രദേശിലെ അയോദ്ധ്യയിൽ സ്ഥിതി ചെയ്യുന്ന പ്രശസ്തമായ രാമക്ഷേത്രത്തിന് ബോംബ് ഭീഷണി. രാം മന്ദിർ ട്രസ്റ്റ് ഉൾപ്പെടെ നിരവധി ജില്ലകളിലെ ജില്ലാ മജിസ്‌ട്രേറ്റുമാര്‍ക്ക് ഭീഷണി മെയിൽ ലഭിച്ചു. കഴിഞ്ഞ തിങ്കളാഴ്ച രാമജന്മഭൂമി ട്രസ്റ്റിന് ലഭിച്ച ഇ-മെയിലിൽ, ‘ക്ഷേത്രത്തിന്റെ സുരക്ഷ വർദ്ധിപ്പിക്കുക’ എന്ന് എഴുതിയിരുന്നു. തുടർന്ന് അയോദ്ധ്യയിലെ സൈബർ പോലീസ് സ്റ്റേഷനിൽ എഫ്‌ഐആർ രജിസ്റ്റർ ചെയ്തു. പരാതി ലഭിച്ചയുടൻ സൈബർ സെൽ അന്വേഷണം ആരംഭിച്ചിട്ടുണ്ട്.
രാമക്ഷേത്രം പൊട്ടിത്തെറിക്കുമെന്ന ഭീഷണി ലഭിച്ചയുടനെ, രാമക്ഷേത്രത്തിലും പരിസര പ്രദേശങ്ങളിലും വൻതോതിലുള്ള തിരച്ചിൽ നടത്തി. അയോദ്ധ്യയ്ക്ക് പുറമേ, ബരാബങ്കി, ചന്ദൗലി എന്നിവയുൾപ്പെടെ നിരവധി ജില്ലകളിലെ ജില്ലാ മജിസ്‌ട്രേറ്റുമാർക്കും ഭീഷണി മെയിലുകൾ ലഭിച്ചു.
രാമക്ഷേത്രത്തിൽ ബോംബ് വയ്ക്കുമെന്ന് ഭീഷണിപ്പെടുത്തുന്ന ഇമെയിൽ വന്നത് തമിഴ്‌നാട്ടിൽ നിന്നാണെന്നാണ് വിവരം. ലഭിച്ച എല്ലാ ഇമെയിലുകളും സൈബർ സെൽ അന്വേഷിക്കുന്നുണ്ട്. കുറഞ്ഞത് 10-15 ജില്ലകളിലെ ജില്ലാ മജിസ്‌ട്രേറ്റുമാരുടെ ഔദ്യോഗിക ഇ-മെയിലിലേക്ക് ഭീഷണി ഇമെയിലുകൾ ലഭിച്ചിട്ടുണ്ട്.
രാമക്ഷേത്രത്തിന് പുറമെ അലിഗഡ് കളക്ടറേറ്റും ബോംബ് വെച്ച് തകർക്കുമെന്ന് ഭീഷണി ലഭിച്ചിട്ടുണ്ട്. ഡിഎമ്മിന്റെ ഔദ്യോഗിക ഇമെയിലിലാണ് ഈ ഭീഷണി ലഭിച്ചത്. ഭീഷണിയെത്തുടർന്ന്, പോലീസ് ഭരണകൂടം ജാഗ്രത പാലിക്കുകയും മുൻകരുതൽ നടപടിയായി തീവ്രമായ അന്വേഷണം ആരംഭിക്കുകയും ചെയ്തു.
