മോസ്കോ: മുൻവ്യവസ്ഥകളൊന്നുമില്ലാതെ ഉക്രെയ്നുമായി ചർച്ച നടത്താൻ തയ്യാറാണെന്ന് റഷ്യൻ പ്രസിഡന്റ് വ്‌ളാഡിമിർ പുടിൻ വീണ്ടും വ്യക്തമാക്കി. വെള്ളിയാഴ്ച മോസ്കോയിൽ നടന്ന ഒരു യോഗത്തിൽ പുടിൻ യുഎസ് പ്രതിനിധി സ്റ്റീവ് വിറ്റ്കോഫിനോട് പറഞ്ഞതായി ക്രെംലിൻ ശനിയാഴ്ച പറഞ്ഞതായി വാർത്താ ഏജൻസികള്‍ റിപ്പോര്‍ട്ട് ചെയ്തു.
ട്രംപിന്റെ ദൂതൻ വിറ്റ്കോഫുമായുള്ള ഇന്നലെ നടന്ന ചർച്ചയിൽ, മുൻകൂർ ഉപാധികളില്ലാതെ ഉക്രെയ്നുമായി സംഭാഷണം പുനരാരംഭിക്കാൻ റഷ്യ തയ്യാറാണെന്ന് വ്‌ളാഡിമിർ പുടിൻ ആവർത്തിച്ചതായി ക്രെംലിൻ വക്താവ് ദിമിത്രി പെസ്കോവ് പറഞ്ഞു. പുടിൻ ഇത് മുമ്പ് പലതവണ ആവർത്തിച്ചിട്ടുണ്ടെന്ന് അദ്ദേഹം പറഞ്ഞു.
അതേസമയം, കഴിഞ്ഞ ദിവസങ്ങളിൽ ഉക്രെയ്നിലെ സിവിലിയൻ പ്രദേശങ്ങളിൽ നടന്ന ആക്രമണങ്ങൾക്ക് റഷ്യൻ പ്രസിഡന്റ് വ്‌ളാഡിമിർ പുടിനെ വിമർശിച്ച ട്രംപ്, “ഒരുപക്ഷേ അദ്ദേഹം യുദ്ധം നിർത്താൻ ആഗ്രഹിക്കുന്നില്ലായിരിക്കാം” എന്ന് പറഞ്ഞു. റോമിൽ ഉക്രേനിയൻ പ്രസിഡന്റ് വോളോഡിമർ സെലെൻസ്‌കിയുമായുള്ള ചർച്ചകൾക്ക് ശേഷം ട്രൂത്ത് സോഷ്യലിലെ ഒരു പോസ്റ്റിൽ, പുടിനെ വ്യത്യസ്തമായി കൈകാര്യം ചെയ്യേണ്ടിവരുമെന്ന് ട്രംപ് പറഞ്ഞു.
മോസ്കോയെ ലക്ഷ്യമിട്ടുള്ള കൂടുതൽ ഉപരോധങ്ങളെക്കുറിച്ച് ട്രംപ് സൂചന നൽകുന്നുണ്ടാകാം. കഴിഞ്ഞ കുറച്ച് ദിവസങ്ങളായി സിവിലിയൻ പ്രദേശങ്ങളിലും നഗരങ്ങളിലും പട്ടണങ്ങളിലും മിസൈലുകൾ തൊടുക്കാൻ പുടിന് ഒരു കാരണവുമില്ലെന്ന് ട്രംപ് പോസ്റ്റിൽ പറഞ്ഞു. പുടിന് യുദ്ധം നിർത്താൻ ആഗ്രഹിക്കുന്നില്ലെന്ന് ചിന്തിപ്പിക്കുന്നതായും ട്രംപ് സൂചിപ്പിച്ചു .
