1960 ലെ സിന്ധു നദീജല കരാർ ഇന്ത്യ താൽക്കാലികമായി നിർത്തിവച്ചതിന് ശേഷം ഇന്ത്യ ഝലം നദിയിലേക്ക് വെള്ളം തുറന്നുവിട്ടതായി പാക്കിസ്താന് ആരോപിച്ചു. പഹൽഗാമിൽ നടന്ന ഭീകരാക്രമണത്തിന് മറുപടിയായി ഇന്ത്യയുടെ നടപടിയിലാണ് പാക്കിസ്താന്റെ ആരോപണം. ആക്രമണത്തിൽ 26 ഇന്ത്യൻ വിനോദസഞ്ചാരികൾക്ക് ജീവൻ നഷ്ടപ്പെട്ടു. ഇന്ത്യയുടെ നടപടിയുടെ ഫലമായാണ് പാക് അധിനിവേശ കശ്മീരിലെ (പി‌ഒ‌കെ) മുസാഫറാബാദ് പ്രദേശത്ത് പെട്ടെന്ന് വെള്ളപ്പൊക്കമുണ്ടായതെന്ന് പാക് അധികൃതര്‍ പറഞ്ഞു.
1960-ലെ സിന്ധു നദീജല കരാർ ഇന്ത്യ താൽക്കാലികമായി നിർത്തിവച്ചത് പാക്കിസ്താന് വലിയ ആശങ്കയുണ്ടാക്കുന്നു. യാതൊരു മുന്നറിയിപ്പുമില്ലാതെ ഇന്ത്യ ഝലം നദിയിലേക്ക് വെള്ളം തുറന്നുവിട്ടതായും ഇത് നദിയിലെ ജലനിരപ്പ് പെട്ടെന്ന് ഉയരാൻ കാരണമായതായും പാക് ഉദ്യോഗസ്ഥർ ആരോപിച്ചു. അന്താരാഷ്ട്ര ജല കരാറുകളുടെ ലംഘനമാണെന്ന് വിശേഷിപ്പിച്ച പാകിസ്ഥാൻ ഇതിനെ ശക്തമായി അപലപിച്ചു.
ശനിയാഴ്ചയാണ് പാകിസ്ഥാനിലെ മുസാഫറാബാദിന് സമീപം ഝലം നദിയിലെ ജലനിരപ്പിൽ പെട്ടെന്ന് വർദ്ധനവ് ഉണ്ടായത്. ഈ ജലപ്രവാഹത്തിന് ഇന്ത്യയാണ് ഉത്തരവാദിയെന്ന് പാക് മാധ്യമങ്ങള്‍ റിപ്പോർട്ട് ചെയ്തു. മുസാഫറാബാദിൽ നിന്ന് ഏകദേശം 40 കിലോമീറ്റർ അകലെ സ്ഥിതി ചെയ്യുന്ന ഹത്തിയൻ ബാല പ്രദേശത്ത് പാകിസ്ഥാൻ ഭരണകൂടം ജല അടിയന്തരാവസ്ഥ പ്രഖ്യാപിച്ചു. നദീതീരത്തിന് സമീപം പോകരുതെന്ന് പ്രദേശവാസികൾക്ക് മുന്നറിയിപ്പ് നൽകുന്ന അറിയിപ്പുകൾ പള്ളികളിൽ നിന്ന് പുറപ്പെടുവിച്ചു, ഇത് പ്രദേശത്ത് പരിഭ്രാന്തി പരത്തി.
ഇന്ത്യയും പാകിസ്ഥാനും തമ്മിലുള്ള ജലവിതരണം നിയന്ത്രിക്കുന്ന 1960 ലെ സിന്ധു നദീജല കരാർ താൽക്കാലികമായി നിർത്തിവയ്ക്കാൻ ഇന്ത്യ തീരുമാനിച്ചിരുന്നു. പത്താൻകോട്ടിലും പുൽവാമയിലും അടുത്തിടെ പഹൽഗാമിലും പാകിസ്ഥാൻ നടത്തിയ ഭീകരാക്രമണങ്ങൾക്കുള്ള മറുപടിയായാണ് ഈ നടപടിയെന്ന് ഇന്ത്യൻ സർക്കാർ പറയുന്നു. അതിർത്തി കടന്നുള്ള ഭീകരതയെ പിന്തുണയ്ക്കുന്നത് പാകിസ്ഥാൻ “വിശ്വസനീയമായും തിരിച്ചെടുക്കാനാവാത്ത വിധം” അവസാനിപ്പിക്കുന്നതുവരെ കരാർ താൽക്കാലികമായി നിർത്തിവച്ചിരിക്കുമെന്ന് ഇന്ത്യ പറയുന്നു.
ജമ്മു കശ്മീരിലെ ഒരു അണക്കെട്ടിൽ നിന്ന് ഇന്ത്യ വെള്ളം തുറന്നുവിട്ടതിനാൽ ഝലം നദിയിലെ ജലനിരപ്പ് 22,000 ക്യുസെക്‌സ് വർദ്ധിച്ചതായി പാകിസ്ഥാൻ ഉദ്യോഗസ്ഥർ അറിയിച്ചതായി മാധ്യമ റിപ്പോർട്ടുകൾ പറയുന്നു. ഈ നീരൊഴുക്ക് കാരണം വെള്ളപ്പൊക്ക സാധ്യത വർദ്ധിച്ചിട്ടുണ്ട്, അതിനാൽ നദീതീരങ്ങളിൽ നിന്ന് മാറിനിൽക്കാൻ തദ്ദേശ സ്വയംഭരണ സ്ഥാപനങ്ങൾ ആളുകളോട് നിർദ്ദേശിച്ചിട്ടുണ്ട്. സംഭവത്തെ ഗൗരവമുള്ളതായി വിശേഷിപ്പിച്ച ഉദ്യോഗസ്ഥർ, ഈ ജലനിർഗ്ഗമനം വലിയൊരു ജലപ്രതിസന്ധിയിലേക്ക് നയിച്ചേക്കാമെന്ന് പറഞ്ഞു.
ഇന്ത്യയുടെ ഈ നീക്കത്തിനെതിരെ പാകിസ്ഥാന്റെ ദേശീയ സുരക്ഷാ സമിതി ശക്തമായി പ്രതികരിച്ചു. അന്താരാഷ്ട്ര ജല കരാറുകളുടെ ലംഘനമാണിതെന്ന് പാകിസ്ഥാൻ ഉദ്യോഗസ്ഥർ വിശേഷിപ്പിച്ചു, ഇന്ത്യയുടെ നീക്കം ഭാവിയിൽ ജലക്ഷാമത്തിനും പ്രശ്‌നങ്ങൾക്കും കാരണമായേക്കാമെന്ന് പറഞ്ഞു. പാകിസ്ഥാന്റെ ഭീകരവാദ പ്രോത്സാഹനത്തിന് എതിരാണ് ഈ നീക്കമെന്ന് ഇന്ത്യൻ ഉദ്യോഗസ്ഥർ പറയുമ്പോൾ, ഈ വിഷയം അന്താരാഷ്ട്ര തലത്തിൽ ഉന്നയിക്കാൻ പാകിസ്ഥാൻ പദ്ധതിയിടുന്നു.
https://twitter.com/i/status/1916157123450617985
