ന്യൂഡല്‍ഹി: ‘ദി കശ്മീർ ഫയൽസ്’ എന്ന സിനിമ നുണകളുടെ ഭാണ്ഡക്കെട്ടാണെന്ന് ഒമര്‍ അബ്ദുള്ള വിശേഷിപ്പിച്ചു. വിവേക് അഗ്നിഹോത്രിയുടെ ഈ സിനിമയിൽ ഒരുപാട് നുണകൾ കൂട്ടിക്കെട്ടിയിട്ടുണ്ടെന്ന് അദ്ദേഹം പറഞ്ഞു. ഇതൊരു കൊമേഴ്‌സ്യൽ സിനിമയാണെങ്കിൽ കാര്യമില്ലെന്നും എന്നാൽ, യാഥാർത്ഥ്യമാണ് സിനിമയില്‍ കാണിക്കുന്നതെന്നാണ് അതിന്റെ പ്രവര്‍ത്തകര്‍ അവകാശപ്പെടുന്നതെന്നും അദ്ദേഹം ആരോപിച്ചു.
താഴ്‌വരയിലെ കശ്മീരി പണ്ഡിറ്റുകളെ സംരക്ഷിച്ചില്ലെന്ന ആരോപണത്തിൽ, അക്കാലത്ത് കേന്ദ്രത്തിൽ ബിജെപി പിന്തുണയുള്ള വിപി സിംഗ് സർക്കാരായിരുന്നു ഉണ്ടായിരുന്നതെന്ന് അദ്ദേഹം പറഞ്ഞു. കശ്മീരി പണ്ഡിറ്റുകൾക്ക് കാശ്മീർ വിട്ടുപോകേണ്ടി വന്നപ്പോൾ അന്നവിടെ ഗവർണർ ഭരണം ഏർപ്പെടുത്തി.
കശ്മീരി പണ്ഡിറ്റുകൾ തീവ്രവാദത്തിന്റെ ഇരകളായി മാറിയെന്നും, ഇത് എല്ലാവർക്കും സങ്കടകരമാണെന്നും, എന്നാൽ മുസ്ലീങ്ങളെയും സിഖുകാരെയും തോക്കിന് മുനയിൽ നിർത്തിയിരിക്കുകയാണെന്നും ഒമർ പറഞ്ഞു. അവരുടെ ത്യാഗം മറക്കാൻ പാടില്ല. അവർ ഇനിയും തിരിച്ചുവരാനുണ്ട്. അവർക്ക് തിരിച്ചുവരാൻ സാധിക്കുന്ന തരത്തിൽ അത്തരത്തിലുള്ള ഒരു അന്തരീക്ഷം രാജ്യത്ത് സൃഷ്ടിക്കപ്പെടണമെന്നും, എന്നാൽ ഈ സിനിമ നിർമ്മിച്ചവർ ആരായാലും കശ്മീരി പണ്ഡിറ്റുകൾ തിരിച്ചുവരാൻ ആഗ്രഹിക്കുന്നില്ലെന്നും അദ്ദേഹം പറഞ്ഞു.
കശ്മീരി പണ്ഡിറ്റുകളുടെ പലായനവുമായി ബന്ധപ്പെട്ട വസ്തുതകൾ പുറത്തുകൊണ്ടുവരാൻ സ്വതന്ത്ര അന്വേഷണ കമ്മീഷൻ രൂപീകരിക്കണമെന്ന് ഫാറൂഖ് അബ്ദുള്ള നേരത്തെ ആവശ്യപ്പെട്ടിരുന്നു. അതിനിടെ, കശ്മീരി പണ്ഡിറ്റുകളുടെ അതിക്രമങ്ങളും നിർബന്ധിത കുടിയേറ്റവും കാണിക്കുന്ന ദ കശ്മീർ ഫയൽസ് എന്ന ചിത്രം 100 കോടി ക്ലബ്ബിൽ ചേർന്നു. ഒരു വശത്ത് ആളുകൾ ഇതിനെ പുകഴ്ത്തുമ്പോൾ മറുവശത്ത് വിമർശനമുണ്ട്.
സംഭവം നടക്കുമ്പോൾ ഫാറൂഖ് അബ്ദുള്ള സംസ്ഥാനത്ത് മുഖ്യമന്ത്രിയും മെഹബൂബ മുഫ്തിയുടെ പിതാവ് മുഫ്തി മുഹമ്മദ് സയ്യിദ് കേന്ദ്രത്തിൽ ആഭ്യന്തര മന്ത്രിയുമായിരുന്നു. അന്ന് വിപി സിംഗ് ബിജെപിയുടെയും കമ്മ്യൂണിസ്റ്റിന്റെയും സഹായത്തോടെ കേന്ദ്രത്തിൽ സർക്കാർ രൂപീകരിച്ചു. ചിത്രം മുസ്ലീങ്ങൾക്കെതിരെ വിദ്വേഷം പടർത്തുക മാത്രമാണ് ചെയ്യുന്നതെന്ന് കോൺഗ്രസ് ഉൾപ്പെടെയുള്ള പാർട്ടികൾ ആരോപിച്ചു. സത്യം പുറത്തുകൊണ്ടുവരാന്‍ സിനിമാ പ്രവര്‍ത്തകര്‍ക്ക് കഴിഞ്ഞില്ലെന്നും അവര്‍ ആരോപിച്ചു.
സംവിധായകൻ വിവേക് അഗ്നിഹോത്രിയെ പ്രധാനമന്ത്രി മോദിയും ആഭ്യന്തര മന്ത്രി അമിത് ഷായും പ്രശംസിച്ചു. മാർച്ച് 15ന് നടന്ന ബിജെപി പാർലമെന്ററി പാർട്ടി യോഗത്തിൽ, വർഷങ്ങളായി മറച്ചുവെച്ചിരുന്ന സത്യമാണ് ‘കശ്മീർ ഫയൽസ്’ തുറന്ന് കാട്ടിയതെന്ന് മോദി പറഞ്ഞിരുന്നു.
