മോസ്കോ: സംഘർഷം പരിഹരിക്കാനുള്ള ശ്രമങ്ങൾ വൈകുന്നതിന് വാഷിംഗ്ടണിനെയും പാശ്ചാത്യ സഖ്യകക്ഷികളെയും കുറ്റപ്പെടുത്തി, ഉക്രെയ്നിലേക്ക് ആയുധങ്ങളും കൂലിപ്പടയാളികളും അയക്കുന്നത് നിർത്താൻ ഒരു മുതിർന്ന റഷ്യൻ ഉദ്യോഗസ്ഥൻ അമേരിക്കയോടും നേറ്റോയോടും അഭ്യർത്ഥിച്ചു.
ബ്രസൽസിൽ നടന്ന നേറ്റോ പ്രതിരോധ മന്ത്രിമാരുടെ അടിയന്തര യോഗത്തിൽ ഉക്രെയ്നിലേക്ക് ആയുധ വിതരണം തുടരാൻ നേറ്റോ രാജ്യങ്ങൾ തീരുമാനിച്ചതിന് ശേഷം റഷ്യൻ പാർലമെന്റിന്റെ അധോസഭയുടെ ചെയർമാൻ വ്യാസെസ്ലാവ് വോലോഡിൻ ശനിയാഴ്ച തന്റെ ടെലിഗ്രാം ചാനലിലെ ഒരു പോസ്റ്റിലാണ് ഈ പരാമർശം നടത്തിയത്.
“ആയുധങ്ങളും വെടിക്കോപ്പുകളും വിതരണം ചെയ്യുന്നത് നേറ്റോ രാജ്യങ്ങളാണ്. ഉക്രെയ്നിന്റെ ദേശീയ ബറ്റാലിയനുകളുടെ റാങ്കുകളിൽ നിറയുന്ന കൂലിപ്പടയാളികളെ അവരുടെ നേതൃത്വത്തിന്റെ സമ്മതത്തോടെ നോർത്ത് അറ്റ്ലാന്റിക് സഖ്യത്തിന്റെ രാജ്യങ്ങളിൽ റിക്രൂട്ട് ചെയ്യുന്നു,” വോലോഡിൻ പറഞ്ഞു.
“അതിനാൽ, യുഎസ് പ്രസിഡന്റ് ജോ ബൈഡനും അദ്ദേഹത്തിന്റെ നേറ്റോ സഹപ്രവർത്തകരും സമാധാനത്തിനായി വിളിക്കുമ്പോൾ, അത് ആദ്യം അവരിൽ നിന്ന് തന്നെ ആരംഭിക്കണം. ഉക്രെയ്നിലെ സ്ഥിതിഗതികൾ പരിഹരിക്കുന്നത് വൈകാന്‍ കാരണം അവരുടെ തെറ്റാണ്. ഉക്രെയ്ൻ ഒരു സ്വതന്ത്രവും നിഷ്പക്ഷവുമായ രാജ്യമാകാൻ അവർ ആഗ്രഹിക്കുന്നില്ല,” വോലോഡിൻ പറഞ്ഞു.
യുഎസും മറ്റ് പാശ്ചാത്യ രാജ്യങ്ങളും യഥാർത്ഥത്തിൽ സമാധാനം ആഗ്രഹിക്കുന്നുവെങ്കിൽ, സൈനിക സാമഗ്രികൾക്ക് പകരം ജനങ്ങൾക്കുള്ള മാനുഷിക സഹായത്തിനായി പണം ചെലവഴിക്കുന്നതാണ് ശരി എന്നും അദ്ദേഹം പറഞ്ഞു.
സമാധാനം നിലനിൽക്കണമെങ്കിൽ ഐക്യരാഷ്ട്രസഭ പ്രവർത്തിക്കാനും ഇരട്ടത്താപ്പ് ഉപേക്ഷിക്കാനും വോലോഡിൻ ആവശ്യപ്പെട്ടു. “എത്രയും വേഗം സമാധാനം സ്ഥാപിക്കാൻ നിങ്ങൾ ആഗ്രഹിക്കുന്നുവെങ്കിൽ, ഉടനടി തീരുമാനങ്ങൾ എടുക്കുക. യുഎസും നേറ്റോ രാജ്യങ്ങളും ഉക്രെയ്നിലേക്ക് ആയുധങ്ങളും കൂലിപ്പടയാളികളും അയക്കുന്നത് അവസാനിപ്പിക്കണം.”
ഉക്രൈനിലെ സാധാരണക്കാരുടെ മരണത്തിനും അഭയാർഥികളുടെ ഒഴുക്കിനും വാഷിംഗ്ടണും ബ്രസൽസും നേരിട്ട് ഉത്തരവാദികളാണെന്നും അദ്ദേഹം പറഞ്ഞു. ഉക്രേനിയൻ ദേശീയവാദികൾ സാധാരണക്കാരെ മനുഷ്യകവചമായി ഉപയോഗിക്കുന്നുവെന്ന് അദ്ദേഹം ആരോപിച്ചു.
