2017ൽ യെമന്‍ പൗരനെ കൊലപ്പെടുത്തിയ കേസിൽ വധശിക്ഷയ്ക്ക് വിധിക്കപ്പെട്ട മലയാളി നഴ്സ് നിമിഷ പ്രിയയ്ക്ക് മാപ്പ് നൽകുന്നതുൾപ്പെടെയുള്ള എല്ലാ മാർഗങ്ങളും കേന്ദ്രസർക്കാർ അന്വേഷിക്കുകയാണെന്ന് വിദേശകാര്യമന്ത്രി എസ് ജയശങ്കർ പറഞ്ഞു. യെമനിയിലെ ജയിലിൽ കഴിയുന്ന നിമിഷ പ്രിയയെ മോചിപ്പിക്കാൻ കേന്ദ്ര സർക്കാരിന്റെ ഇടപെടൽ ആവശ്യപ്പെട്ട് രാജ്യസഭാംഗം ജോൺ ബ്രിട്ടാസിന് അയച്ച കത്തിലാണ് ജയശങ്കർ ഇക്കാര്യം സൂചിപ്പിച്ചത്.
“വിദേശത്തുള്ള ഇന്ത്യക്കാരുടെ ക്ഷേമത്തിന് ഇന്ത്യാ ഗവൺമെന്റ് ഏറ്റവും മുൻഗണന നൽകുമെന്ന് ഞാൻ ഉറപ്പുനൽകുന്നു, മിസ് നിമിഷപ്രിയയുടെ കേസ് ഞങ്ങളുടെ മുഴുവൻ ശ്രദ്ധയും തുടർന്നും സ്വീകരിക്കും”, ഏപ്രിൽ 27 ലെ കത്തിൽ മന്ത്രി പറഞ്ഞു. ഈ വിഷയത്തിൽ ഇടപെടണമെന്ന് ആവശ്യപ്പെട്ട് മന്ത്രിക്ക് നേരത്തെ ബ്രിട്ടാസ് ഒരു കത്ത് അയച്ചിരുന്നു.
‘സേവ് നിമിഷപ്രിയ ഇന്റർനാഷണൽ ആക്ഷൻ കൗൺസിലും’ മരണപ്പെട്ടയാളുടെ കുടുംബവും തമ്മിൽ ‘ക്രിയാത്മകമായ ചർച്ച’ നടത്തി നിമിഷപ്രിയയ്ക്ക് മാപ്പ് നൽകുന്നതിന് സൗകര്യമൊരുക്കാൻ ‘നടപടികൾക്ക് നേതൃത്വം നൽകണമെന്ന്’ കേരളത്തില്‍ നിന്നുള്ള എംപി തന്റെ കത്തിൽ മന്ത്രിയോട് അഭ്യർത്ഥിച്ചിരുന്നു.
യെമൻ സർക്കാരുമായും ആ മേഖലയിലെ മറ്റ് സ്വാധീനമുള്ള വ്യക്തികളുമായും ആവശ്യമായ ആശയവിനിമയം നടത്തി ബ്ലഡ് മണി നൽകാൻ ആക്ഷൻ കൗൺസിൽ തയ്യാറാണെന്ന് അദ്ദേഹം പറഞ്ഞു.
നിമിഷപ്രിയ 2012 ലാണ് നിമിഷപ്രിയ ജോലിക്കായി യെമനിലേക്ക് പോയത്. 2017 ഓഗസ്റ്റിൽ യെമൻ വ്യവസായിയായ തലാൽ അൽ ഒദൈനിയെ കൊലപ്പെടുത്തിയെന്നാരോപിച്ച് അവിടെ അറസ്റ്റ് ചെയ്യപ്പെടുകയും പ്രോസിക്യൂട്ട് ചെയ്യുകയും ചെയ്തു. തുടർന്ന്, യെമനിലെ വിചാരണ കോടതി 2020 ഓഗസ്റ്റിൽ വധശിക്ഷ വിധിച്ചു. യെമനിലെ അപ്പീൽ കോടതിയിൽ സമർപ്പിച്ച അപ്പീൽ കഴിഞ്ഞ മാസം തള്ളിയിരുന്നു. നിമിഷപ്രിയക്ക് വേണ്ടി ഇന്ത്യൻ സർക്കാർ അഭിഭാഷകനെ നിയോഗിച്ചിരുന്നു.
