വാഷിംഗ്ടണ്‍: കഴിഞ്ഞ മാസം കോൺഗ്രസ് അംഗീകരിച്ച പ്രാരംഭ 7.5 ബില്യൺ ഡോളറിന്റെ ആദ്യ ഭാഗമായി യുക്രെയ്നിന് 1.3 ബില്യൺ ഡോളർ സാമ്പത്തിക സഹായം നൽകുമെന്ന് അമേരിക്ക പ്രഖ്യാപിച്ചു.
സെപ്റ്റംബർ അവസാനത്തോടെ 7.5 ബില്യൺ ഡോളർ പൂർണ്ണമായും വിതരണം ചെയ്യാൻ ലക്ഷ്യമിടുന്ന യുഎസ് ട്രഷറി ഡിപ്പാർട്ട്‌മെന്റാണ് ബുധനാഴ്ച പ്രഖ്യാപനം നടത്തിയത്.
ട്രഷറി ഡിപ്പാർട്ട്‌മെന്റ്, സ്റ്റേറ്റ് ഡിപ്പാർട്ട്‌മെന്റും യുഎസ്എഐഡിയും ചേർന്ന്, കോൺഗ്രസ് അംഗീകരിച്ച പ്രസിഡന്റ് ബൈഡന്റെ പിന്തുണാ പാക്കേജ് ആവശ്യമുള്ളവരിലേക്ക് വേഗത്തിൽ എത്തിച്ചേരുമെന്ന് ഉറപ്പാക്കാൻ അതിവേഗം നീങ്ങുന്നത് തുടരുന്നു എന്ന് ട്രഷറി സെക്രട്ടറി ജാനറ്റ് എൽ. യെല്ലൻ പ്രസ്താവനയില്‍ പറഞ്ഞു.
റഷ്യ ഉക്രെയിനില്‍ ആക്രമണം ആരംഭിച്ച ഫെബ്രുവരി മുതൽ യുഎസ് സൈനികമായും സാമ്പത്തികമായും ഉക്രെയ്‌നെ പിന്തുണയ്ക്കുന്നുണ്ട്. ലോകബാങ്ക് കണക്കുകൾ പ്രകാരം 2022-ൽ ഉക്രെയ്നിന്റെ സമ്പദ്‌വ്യവസ്ഥ 45 ശതമാനം വരെ ചുരുങ്ങാന്‍ സാധ്യതയുണ്ട്.
ട്രഷറി ഡിപ്പാർട്ട്‌മെന്റ് പറയുന്നതനുസരിച്ച്, G7 ഉം യൂറോപ്യൻ യൂണിയനും കിയെവിന് 29.6 ബില്യൺ ഡോളർ കൂടുതൽ തുക നൽകുമെന്ന് പ്രഖ്യാപിച്ചു. അതിൽ 8.5 ബില്യൺ ഡോളർ അമേരിക്കയിൽ നിന്നാണ് നല്‍കുന്നത്.
റഷ്യൻ ഉന്നതരുടെയും ഉദ്യോഗസ്ഥരുടെയും 30 ബില്യൺ ഡോളറിന്റെ ആസ്തി തടഞ്ഞതായും, സെൻട്രൽ ബാങ്കിന്റെ ഉടമസ്ഥതയിലുള്ള 300 ബില്യൺ ഡോളർ നിശ്ചലമാക്കിയതായും ബുധനാഴ്ച ട്രഷറി പ്രസ്താവനയിൽ പറഞ്ഞു.
യു എസും ഉക്രെയ്നിന്റെ മറ്റ് പാശ്ചാത്യ സഖ്യകക്ഷികളും കിയെവിന് ആധുനിക ആയുധങ്ങൾക്കായി ദശലക്ഷക്കണക്കിന് ഡോളർ നൽകുന്നുണ്ട്. വാഷിംഗ്ടൺ മാത്രം യുക്രെയ്നിന് 6 ബില്യൺ ഡോളറിലധികം സൈനിക ഉപകരണങ്ങൾ നൽകിയിട്ടുണ്ട്.
ഉക്രെയ്നിലേക്ക് ആയുധങ്ങൾ പമ്പ് ചെയ്യാനുള്ള പടിഞ്ഞാറൻ പദ്ധതികൾക്കെതിരെ റഷ്യ ആവർത്തിച്ച് മുന്നറിയിപ്പ് നൽകിയിട്ടുണ്ട്. ഉക്രെയിനില്‍ കൂടുതൽ ആയുധങ്ങൾ എത്തുമ്പോൾ യുദ്ധം കൂടുതൽ നീണ്ടുനിൽക്കുമെന്ന് പുടിന്‍ പറഞ്ഞു.
ഈ നീക്കം “സംഘർഷം കൂടുതല്‍ വഷളാക്കുമെന്നും, യുദ്ധം ശക്തമാക്കുകയും പ്രവചനാതീതമായ പ്രത്യാഘാതങ്ങളോടെ കൂടുതൽ രൂക്ഷമാകാനുള്ള ഭീഷണി വർദ്ധിപ്പിക്കുകയും ചെയ്യുമെന്ന് വാഷിംഗ്ടണിലെ റഷ്യൻ അംബാസഡർ അനറ്റോലി അന്റോനോവ് ഈ ആഴ്ച ആദ്യം പറഞ്ഞിരുന്നു.
“സിവിലിയന്മാരെ കൂട്ടക്കൊല ചെയ്യാൻ കിയെവ് ഭരണകൂടത്തെ പ്രേരിപ്പിക്കുന്നു” എന്നും അദ്ദേഹം കൂട്ടിച്ചേര്‍ത്തു.
