പട്‌ന: പ്രതിപക്ഷ ഐക്യത്തിനായുള്ള പുതിയ ആഹ്വാനവുമായി ബിഹാർ മുഖ്യമന്ത്രി നിതീഷ് കുമാർ ശനിയാഴ്ച പാർട്ടികളോടും നേതാക്കളോടും അഭിപ്രായവ്യത്യാസങ്ങൾ പരിഹരിച്ച് ബിജെപിക്കെതിരെ ഒന്നിക്കണമെന്ന് ആവശ്യപ്പെട്ടു. നിലവിലെ ഭരണത്തിന് പകരം ഒരു “ബദൽ” സം‌വിധാനം വേണമെങ്കില്‍ ദേശീയ, പ്രാദേശിക പാർട്ടികൾ ഒരുമിച്ച് വരണമെന്ന് ജെഡിയു നേതാവ് അഭ്യർത്ഥിച്ചു.
ബിജെപി നേതൃത്വത്തിലുള്ള എൻഡിഎയ്ക്ക് കീഴിൽ രാജ്യത്ത് അപ്രഖ്യാപിത അടിയന്തരാവസ്ഥയുണ്ടെന്ന് ശനിയാഴ്ച പട്‌നയിൽ ദേശീയ എക്‌സിക്യൂട്ടീവിന്റെ യോഗം ചേർന്ന ജനതാദൾ (യുണൈറ്റഡ്) വിലയിരുത്തി. അന്വേഷണ ഏജൻസികളെ ദുരുപയോഗം ചെയ്ത് പ്രതിപക്ഷ ശബ്ദങ്ങളെ നിശബ്ദമാക്കാനാണ് നിലവിലെ സർക്കാർ ശ്രമിക്കുന്നതെന്ന് പാർട്ടി ആരോപിച്ചു.
2024ൽ നടക്കാനിരിക്കുന്ന ലോക്‌സഭാ തെരഞ്ഞെടുപ്പിൽ പാർട്ടികളെ ഒരുമിച്ച് കൊണ്ടുവരിക എന്നതാണ് തന്റെ ഏക ലക്ഷ്യമെന്ന് പ്രതിപക്ഷ ഐക്യത്തിനായി പ്രവർത്തിക്കാൻ പാർട്ടി അധികാരപ്പെടുത്തിയ അദ്ദേഹം പറഞ്ഞു. ജെഡിയു ദേശീയ എക്‌സിക്യൂട്ടീവ് യോഗം ഇത് സംബന്ധിച്ച പ്രമേയം പാസാക്കി.
വിയോജിപ്പിന്റെ ജനാധിപത്യ അവകാശത്തെ രാജ്യദ്രോഹമായി മുദ്രകുത്തി കേന്ദ്രത്തിലെ ബിജെപി സർക്കാർ ശബ്ദങ്ങളെ മൂടിക്കെട്ടുകയാണെന്ന് ഇന്ന് പാസാക്കിയ പ്രമേയത്തിൽ ജെഡിയു ആരോപിച്ചു.
രാജ്യം ബിജെപിക്ക് ബദലായി നോക്കുകയാണെന്നും എല്ലാ പ്രതിപക്ഷ കക്ഷികളും അഭിപ്രായവ്യത്യാസങ്ങൾ ഉപേക്ഷിച്ച് ഒന്നിക്കണമെന്നും പ്രമേയം ആവശ്യപ്പെട്ടു.
രാജ്യത്ത് വർഗീയ ഉന്മാദമുണ്ടാക്കുകയാണ് ബിജെപിയെന്നും കുറ്റപ്പെടുത്തി. “ന്യൂനപക്ഷങ്ങളെ ലക്ഷ്യമിടുന്നു. സമൂഹത്തിൽ അസഹിഷ്ണുതയും തീവ്രവാദവും വർദ്ധിച്ചു. ദളിതരും ആദിവാസികളും പീഡിപ്പിക്കപ്പെടുന്നു.”
ഭരണകക്ഷിയായ ബിജെപിയെ അതിന്റെ സ്വേച്ഛാധിപത്യ പ്രവണതകളെന്നും ഡൽഹിയിലും ജാർഖണ്ഡിലുമടക്കം നിരവധി സംസ്ഥാനങ്ങളിലെ ബിജെപി ഇതര സർക്കാരുകളെ അസ്ഥിരപ്പെടുത്തുന്നതിന് ഭരണകക്ഷിയെ ആക്ഷേപിക്കുകയും ചെയ്തു. യോഗത്തിൽ രണ്ട് പ്രമേയങ്ങൾ പാസാക്കി.
മണിപ്പൂരിലെ ആറ് എം.എൽ.എമാർ പാർട്ടി വിട്ടതിന് പിന്നിൽ ബാഹ്യശക്തികളുടെ കൈകളുണ്ടെന്ന് ജെ.ഡി.യു മേധാവി കഴിഞ്ഞ ദിവസം ആരോപിച്ചിരുന്നു. മണിപ്പൂരിലെ സഖ്യസർക്കാരിനെ നയിക്കുന്ന ബിജെപിയെക്കുറിച്ചുള്ള വ്യക്തമായ പരാമർശത്തിൽ കുമാർ പറഞ്ഞു, “അവർ പാർട്ടികളിൽ നിന്ന് എംഎൽഎമാരെ വേർപെടുത്തുകയാണ്. അത് ഉചിതമാണോ? അത് ഭരണഘടനാപരമാണോ? ഇത് സ്ഥാപിത മാനദണ്ഡങ്ങൾക്ക് അനുസൃതമാണോ? അവർ എല്ലായിടത്തും അങ്ങനെ ചെയ്യുന്നു. അതിനാൽ എല്ലാ പാർട്ടികളും 2024ൽ ഒരു നല്ല ജനവിധിക്കായി ഒന്നിക്കണം.”
കഴിഞ്ഞ മാസം ബിഹാറിലെ ബി.ജെ.പിയുടെ നേതൃത്വത്തിലുള്ള എൻ.ഡി.എ സഖ്യത്തിൽ നിന്ന് വേർപിരിഞ്ഞ കുമാർ, മണിപ്പൂരിലെ ആറ് ജെ.ഡി.യു എം.എൽ.എമാർ തങ്ങളുടെ പിന്തുണ അന്ന് ഉറപ്പ് നൽകിയിരുന്നതായി പറഞ്ഞു. “ഞങ്ങൾ എൻഡിഎയിൽ നിന്ന് വേർപിരിഞ്ഞപ്പോൾ, ഞങ്ങളുടെ ആറ് മണിപ്പൂർ എം‌എൽ‌എമാരും ഞങ്ങളെ വന്നു കാണുകയും തങ്ങൾ ജെഡിയുവിനൊപ്പം ഉണ്ടെന്ന് ഉറപ്പ് നൽകുകയും ചെയ്തു. എന്താണ് സംഭവിക്കുന്നതെന്ന് നമ്മൾ ചിന്തിക്കണം,” അദ്ദേഹം പറഞ്ഞു.
“ഞങ്ങൾ എൻഡിഎയിലായിരുന്നപ്പോൾ അവർ (ബിജെപി) ഞങ്ങളുടെ എംഎൽഎമാർക്ക് ഒന്നും നൽകിയില്ല. ഇപ്പോൾ അവർ വിജയിച്ചിരിക്കുന്നു, ” കുതിരക്കച്ചവടത്തെ പരാമര്‍ശിച്ച് കുമാർ പറഞ്ഞു.
