ന്യൂഡൽഹി: വടക്കുകിഴക്കൻ ഡൽഹിയിൽ വെള്ളിയാഴ്ച വീട് തകർന്ന് ഒരു സ്ത്രീയടക്കം ഏഴ് പേർക്ക് പരിക്കേറ്റു. വീട് തകർന്നു വീഴുമ്പോൾ ഒമ്പത് പേർ വീടിനുള്ളിൽ ഉണ്ടായിരുന്നതായി പോലീസ് ഉദ്യോഗസ്ഥർ പറഞ്ഞു. ഇവരിൽ രണ്ടുപേർ കെട്ടിടാവശിഷ്ടങ്ങൾക്കിടയിൽ കുടുങ്ങിക്കിടക്കുന്നതായി സംശയിക്കുന്നു.
തുടർന്ന് പോലീസും എംസിഡിയും ഡൽഹി ഫയർ സർവീസസും സ്ഥലത്തെത്തി. രക്ഷപ്പെടുത്തിയ ഏഴുപേരെയും ജിടിബി ആശുപത്രിയിൽ പ്രവേശിപ്പിച്ചു. തൊഴിലാളികൾ വീട് പുതുക്കിപ്പണിയുന്നതിനിടെയാണ് ഒന്നാം നില തകർന്നതെന്ന് പോലീസ് ഉദ്യോഗസ്ഥർ പറഞ്ഞു.
സംഭവസ്ഥലത്ത് നാല് ഫയർ എഞ്ചിനുകൾ വിന്യസിച്ചിട്ടുണ്ട്. ഇതുവരെ ഏഴ് പേരെ രക്ഷപ്പെടുത്തിയിട്ടുണ്ട്. രണ്ട് പേർ കൂടി അവശിഷ്ടങ്ങൾക്കിടയിൽ കുടുങ്ങിക്കിടക്കുന്നതായി സംശയിക്കുന്നതായി ഡൽഹി ഫയർ സർവീസസ് ഡയറക്ടർ അതുൽ ഗാർഗ് പറഞ്ഞു. ഉച്ചയ്ക്ക് 12 മണിയോടെയാണ് സംഭവത്തെക്കുറിച്ചുള്ള വിവരങ്ങൾ ലഭിച്ചതെന്ന് അദ്ദേഹം പറഞ്ഞു. നിയമനടപടികൾ ആരംഭിച്ചതായും രക്ഷാപ്രവർത്തനം തുടരുകയാണെന്നും ഒരു പോലീസ് ഉദ്യോഗസ്ഥൻ പറഞ്ഞു.
