കറാച്ചി: വെള്ളപ്പൊക്കത്തിൽ തകർന്ന പ്രദേശങ്ങളില്‍ അണുബാധ, വയറിളക്കം, മലേറിയ എന്നിവ 324 പേരുടെ ജീവൻ അപഹരിച്ചതായി പാക് അധികൃതർ പറയുന്നു. ആവശ്യമായ സഹായം കൃത്യസമയത്ത് എത്തിയില്ലെങ്കിൽ സ്ഥിതിഗതികൾ നിയന്ത്രണാതീതമാകുമെന്ന് അവർ പറഞ്ഞു.
പേമാരിയിലും വെള്ളപ്പൊക്കത്തിലും കുടിയൊഴിപ്പിക്കപ്പെട്ട ലക്ഷക്കണക്കിന് ജനങ്ങൾ തുറസ്സായ സ്ഥലത്തും വെള്ളക്കെട്ടിലും താമസിക്കുന്നത് രാജ്യവ്യാപകമായി ഗുരുതരമായ ആരോഗ്യപ്രശ്നങ്ങളിലേക്ക് നയിക്കുകയാണ്. സഹായ വിതരണം ത്വരിതപ്പെടുത്തണമെന്ന് അധികൃതർ അഭ്യര്‍ത്ഥിച്ചു.
പാക്കിസ്ഥാന്റെ ആരോഗ്യ സംവിധാനം ഇതിനകം തന്നെ നിരവധി പോരായ്മകൾ നേരിടുന്നുണ്ട്. മലിന ജലം കുടിക്കാനും പാചകം ചെയ്യാനും നിർബന്ധിതരാകുന്നതായി കുടിയിറക്കപ്പെട്ട കുടുംബങ്ങൾ പരാതിപ്പെടുന്നുണ്ടെന്ന് വെള്ളത്തിനടിയിലായ നിരവധി പ്രദേശങ്ങൾ സന്ദർശിച്ച ശേഷം മേഴ്‌സി കോർപ്‌സിന്റെ പാക് കൺട്രി ഡയറക്ടർ ഫറാ നൗറീൻ പറഞ്ഞു.
ശുദ്ധമായ കുടിവെള്ളം കൂടാതെ ഭവനരഹിതരുടെ ഏറ്റവും നിർണായകമായ ആവശ്യങ്ങൾ ആരോഗ്യവും പോഷകാഹാരവുമാണ് വേറിട്ടുനിൽക്കുന്നതെന്നും നൗറിൻ പറഞ്ഞു.
വെള്ളപ്പൊക്ക പ്രദേശങ്ങളിലെ താൽക്കാലിക ആരോഗ്യ സൗകര്യങ്ങളും മൊബൈൽ ക്യാമ്പുകളും കഴിഞ്ഞ 24 മണിക്കൂറിനുള്ളിൽ 78,000-ത്തിലധികം രോഗികളെ ചികിത്സിച്ചതായി തെക്കൻ സിന്ധ് പ്രവിശ്യാ സർക്കാർ ബുധനാഴ്ച പ്രഖ്യാപിച്ചു. ജൂലൈയിൽ മൺസൂൺ വെള്ളപ്പൊക്കം ആരംഭിച്ചതിനുശേഷം രണ്ട് ദശലക്ഷത്തിലധികം പേരെ ചികിത്സിച്ചു.
കഴിഞ്ഞ ദിവസം ആറ് പേർക്ക് ജീവൻ നഷ്ടപ്പെട്ടതായി പ്രവിശ്യാ സർക്കാർ അറിയിച്ചു. 555 കുട്ടികളും 320 സ്ത്രീകളും ഉൾപ്പെടെ 1,500-ലധികം പേർ വെള്ളപ്പൊക്കത്തിൽ മരിച്ചതായി രാജ്യത്തെ ദുരന്ത നിവാരണ ഏജൻസി അറിയിച്ചു.
കഴിഞ്ഞ ഏതാനും ആഴ്ചകളായി, വൈദ്യുതി നിലയങ്ങളും വീടുകളും പോലുള്ള പ്രധാന ഘടനകളിൽ വെള്ളപ്പൊക്കം തടയാൻ അധികാരികൾ കിണഞ്ഞു പരിശ്രമിക്കുന്നു. കാലിത്തീറ്റ തീർന്നു തുടങ്ങിയതോടെ കന്നുകാലികളെ രക്ഷിക്കാൻ ശ്രമിക്കുന്ന കർഷകർക്ക് പുതിയ ഭീഷണി നേരിടേണ്ടി വന്നിരിക്കുകയാണ്.
