ന്യൂഡൽഹി: രാജ്യത്തെ രണ്ടാമത്തെ ചീഫ് ഓഫ് ഡിഫൻസ് സ്റ്റാഫായി (സിഡിഎസ്) ലെഫ്റ്റനന്റ് ജനറൽ അനിൽ ചൗഹാൻ വെള്ളിയാഴ്ച ചുമതലയേറ്റു. ആദ്യത്തെ സിഡിഎസ് ജനറൽ ബിപിൻ റാവത്ത് 2021 ഡിസംബറിൽ അന്തരിച്ചതിനുശേഷം, ഒമ്പത് മാസത്തിലേറെയായി ആ സ്ഥാനം ഒഴിഞ്ഞുകിടക്കുകയായിരുന്നു.
സിഡിഎസ് എന്ന നിലയിലുള്ള തന്റെ ആദ്യ പ്രസംഗത്തിൽ, അദ്ദേഹം സൈനികര്‍ക്ക് നന്ദി പറയുകയും, പ്രതീക്ഷകൾ ഉയർത്തിപ്പിടിക്കുകയും, ഉയർന്നുവരുന്ന ഏത് പ്രശ്നങ്ങളും തരണം ചെയ്യാൻ അവരോടൊപ്പം പ്രവർത്തിക്കുകയും ചെയ്യുമെന്ന് ശപഥം ചെയ്യുകയും ചെയ്തു.
ഔദ്യോഗികമായി ചുമതലയേൽക്കുന്നതിന് മുമ്പ്, സിഡിഎസ് ചൗഹാൻ ദേശീയ യുദ്ധസ്മാരകത്തിൽ പുഷ്പചക്രം അർപ്പിക്കുകയും പിന്നീട് സൗത്ത് ബ്ലോക്ക് പുൽത്തകിടിയിൽ ട്രൈ-സർവീസ് ഗാർഡ് ഓഫ് ഓണർ കാണുകയും ചെയ്തു. പിന്നീട് പ്രതിരോധമന്ത്രി രാജ്‌നാഥ് സിംഗിനെ സൗത്ത് ബ്ലോക്ക് ഓഫീസിൽ സന്ദർശിച്ചു.
“ഇന്ത്യൻ സായുധ സേനയിലെ ഏറ്റവും ഉയർന്ന തലത്തിലുള്ള ചുമതലകൾ ഏറ്റെടുക്കുന്നത് എന്നെ അഭിമാനം കൊള്ളിക്കുന്നു. ചീഫ് ഓഫ് ഡിഫൻസ് സ്റ്റാഫ് എന്ന നിലയിൽ, മൂന്ന് സായുധ സേനകളുടെയും ആവശ്യങ്ങൾക്ക് അനുസരിച്ച് ജീവിക്കാൻ ഞാൻ പരമാവധി ശ്രമിക്കും. ഞങ്ങൾ ഒരുമിച്ച് എല്ലാ പ്രശ്നങ്ങളും നേരിടും. എല്ലാ പ്രതിബന്ധങ്ങളെയും തരണം ചെയ്യും,” അദ്ദേഹം പറഞ്ഞു.
ഇന്ത്യൻ കരസേനാ മേധാവി ജനറൽ മനോജ് പാണ്ഡെ, എയർ ചീഫ് മാർഷൽ വിആർ ചൗധരി, നാവികസേനാ മേധാവി വൈസ് അഡ്മിറൽ എസ്എൻ ഘോർമാഡെ, എയർ മാർഷൽ ബിആർ കൃഷ്ണ എന്നിവരും സന്നിഹിതരായിരുന്നു.
പുതിയ ചീഫ് ഓഫ് ഡിഫൻസ് സ്റ്റാഫായി ചൗഹാനെ തിരഞ്ഞെടുത്തതായി ബുധനാഴ്ച കേന്ദ്രസർക്കാർ പ്രഖ്യാപിച്ചിരുന്നു.
1961 മെയ് 18 ന് ജനിച്ച ജനറൽ ചൗഹാൻ 1981 ൽ ഇന്ത്യൻ ആർമിയുടെ 11 ഗൂർഖ റൈഫിൾസിൽ ചേർന്നു. കഴിഞ്ഞ വർഷം മെയ് 31 ന് ഈസ്റ്റേൺ ആർമി കമാൻഡർ പദവിയിലിരിക്കെ അദ്ദേഹം സൈന്യത്തിൽ നിന്ന് വിരമിച്ചു. വിരമിച്ച ശേഷം, ദേശീയ സുരക്ഷാ കൗൺസിൽ സെക്രട്ടേറിയറ്റിന്റെ (NSCS) ചുമതലയുള്ള എൻഎസ്എ അജിത് ഡോവലിന്റെ സൈനിക ഉപദേഷ്ടാവായി പ്രവർത്തിച്ചു.
