മുംബൈ: ഡ്രോണുകളും മറ്റ് റിമോട്ട് കൺട്രോൾ അല്ലെങ്കിൽ “മൈക്രോ-ലൈറ്റ് എയർക്രാഫ്റ്റുകളും” നഗരത്തിൽ തീവ്രവാദ പ്രവർത്തനങ്ങൾക്ക് ഉപയോഗിക്കുന്നത് തടയാൻ 30 ദിവസത്തേക്ക് നിരോധിച്ചുകൊണ്ട് മുംബൈ പോലീസ് പുതിയ ഉത്തരവ് പുറപ്പെടുവിച്ചു. ക്രിമിനൽ നടപടിച്ചട്ടത്തിലെ 144-ാം വകുപ്പ് പ്രകാരം ബുധനാഴ്ചയാണ് മുംബൈ പൊലീസ് ഉത്തരവ് പുറപ്പെടുവിച്ചത്.
നവംബർ 13 മുതൽ ഡിസംബർ 12 വരെ ഈ ഉത്തരവ് പ്രാബല്യത്തിൽ വരുമെന്ന് പോലീസ് അറിയിപ്പിൽ പറയുന്നു.
തീവ്രവാദികളും ദേശവിരുദ്ധരും ഡ്രോണുകൾ, റിമോട്ട് നിയന്ത്രിത മൈക്രോ ലൈറ്റ് എയർക്രാഫ്റ്റുകൾ, ഏരിയൽ മിസൈലുകൾ അല്ലെങ്കിൽ പാരാഗ്ലൈഡറുകൾ എന്നിവ ഉപയോഗിച്ച് വിവിഐപികളെ ലക്ഷ്യമിട്ട് പൊതുജനങ്ങളുടെ ജീവൻ അപകടത്തിലാക്കാനും പൊതുമുതൽ നശിപ്പിക്കാനും ശല്യപ്പെടുത്താനും സാധ്യതയുണ്ട്. ബ്രിഹൻമുംബൈ പോലീസ് കമ്മീഷണറേറ്റ് ഉത്തരവിൽ പറയുന്നു. സാധ്യതയുള്ള അട്ടിമറി തടയാൻ നിയന്ത്രണങ്ങൾ ആവശ്യമാണെന്നും ഉത്തരവില്‍ പറഞ്ഞു.
“സിറ്റി പോലീസിന്റെ തന്നെ നിരീക്ഷണം അല്ലെങ്കിൽ ഡെപ്യൂട്ടി പോലീസ് കമ്മീഷണറുടെ (ഓപ്പറേഷൻസ്) രേഖാമൂലമുള്ള അനുമതിയോടെയല്ലാതെ അടുത്ത 30 ദിവസത്തേക്ക് ബ്രിഹൻ മുംബൈ പോലീസ് കമ്മീഷണറേറ്റിന്റെ അധികാരപരിധിയിൽ ഡ്രോണുകൾ, റിമോട്ട് നിയന്ത്രിത മൈക്രോ-ലൈറ്റ് എയർക്രാഫ്റ്റുകൾ, പാരാഗ്ലൈഡറുകൾ, പാരാ മോട്ടോറുകൾ, ഹോട്ട് എയർ ബലൂണുകൾ, സ്വകാര്യ ഹെലികോപ്റ്ററുകൾ എന്നിവയുടെ പറക്കൽ പ്രവർത്തനങ്ങൾ അനുവദിക്കില്ല,” ഉത്തരവിൽ പറയുന്നു.
ശല്യപ്പെടുത്തുന്നതോ അപകടസാധ്യതയുള്ളതോ ആയ സന്ദർഭങ്ങളിൽ നിരോധന ഉത്തരവുകൾ പുറപ്പെടുവിക്കാൻ സെക്ഷൻ 144 പോലീസിന് അധികാരം നൽകുന്നത് ശ്രദ്ധേയമാണ്.
