ന്യൂഡൽഹി: 2002ലെ ഗുജറാത്ത് കലാപത്തിൽ തന്നെ കൂട്ടബലാത്സംഗം ചെയ്ത കേസിൽ ശിക്ഷിക്കപ്പെട്ട 11 പേരെ വിട്ടയച്ചതിനെതിരെ ബിൽക്കിസ് ബാനോ സുപ്രീം കോടതിയെ സമീപിച്ചു. ചീഫ് ജസ്റ്റിസ് ഡി വൈ ചന്ദ്രചൂഡ് അദ്ധ്യക്ഷനായ ബെഞ്ചിന് മുമ്പാകെയാണ് ബാനോയെ പ്രതിനിധീകരിച്ച് അഭിഭാഷകയായ ശോഭ ഗുപ്ത ഇക്കാര്യം പരാമർശിച്ചത്.
ജസ്റ്റിസ് അജയ് റസ്‌തോഗിയുടെ നേതൃത്വത്തിലുള്ള ബെഞ്ച് ഇപ്പോൾ ഭരണഘടനാ ബെഞ്ചിന്റെ വിചാരണയുടെ ഭാഗമായതിനാൽ വിഷയം കേൾക്കാൻ സാധ്യത കുറവാണെന്ന് ഗുപ്ത വാദിച്ചു. കുറ്റവാളികളെ മോചിപ്പിക്കുന്ന കാര്യത്തിൽ തീരുമാനമെടുക്കാൻ ഗുജറാത്ത് സർക്കാരിനെ അനുവദിച്ച സുപ്രീം കോടതി വിധിക്കെതിരെ പുനഃപരിശോധനാ ഹർജിയും ബാനോ സമർപ്പിച്ചിട്ടുണ്ട്.
റിവ്യൂ ആദ്യം കേൾക്കണമെന്നും അത് ജസ്റ്റിസ് രസ്തോഗിയുടെ മുമ്പാകെ വരട്ടെയെന്നും ചീഫ് ജസ്റ്റിസ് പറഞ്ഞു. തുറന്ന കോടതിയിൽ വാദം കേൾക്കേണ്ടതുണ്ടെന്ന് ഗുപ്ത വാദിച്ചു. കോടതിക്ക് മാത്രമേ അക്കാര്യം തീരുമാനിക്കാൻ കഴിയൂ എന്ന് പറഞ്ഞ ചീഫ് ജസ്റ്റിസ്, വിഷയം വൈകുന്നേരം പരിശോധിച്ച ശേഷം ലിസ്റ്റിംഗ് തീരുമാനിക്കുമെന്നും കൂട്ടിച്ചേർത്തു.
കുറ്റകൃത്യം നടന്നത് ഗുജറാത്തിലായതിനാൽ ഗുജറാത്ത് സർക്കാരിന് റിമിഷൻ അഭ്യർത്ഥന പരിഗണിക്കാമെന്ന് ഈ വർഷം മേയിൽ സുപ്രീം കോടതി വിധിച്ചിരുന്നു. ഈ വിധിയുടെ അടിസ്ഥാനത്തിൽ, 11 പ്രതികളെയും വിട്ടയക്കാൻ ഗുജറാത്ത് സർക്കാർ തീരുമാനിച്ചു. ഗുജറാത്തിൽ നിന്ന് സ്ഥലം മാറ്റിയതിന് ശേഷം കേസിന്റെ വിചാരണ അവിടെ നടത്തിയതിനാൽ മഹാരാഷ്ട്ര സർക്കാർ ഇളവ് പരിഗണിക്കണമെന്ന് ഹൈക്കോടതി വിധിച്ചിരുന്നു.
