ന്യൂഡൽഹി: സെപ്തംബർ 6 മുതൽ ഡൽഹിക്കും താഷ്‌കന്റിനുമിടയിൽ ഇൻഡിഗോ എയർലൈൻസിന് നേരിട്ടുള്ള വിമാന സർവീസ് ആരംഭിക്കുന്നതിന് ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (ഡിജിസിഎ) അനുമതി നൽകി.
ഡൽഹിക്കും താഷ്‌കന്റിനുമിടയിൽ ആഴ്ചയിൽ നാല് ദിവസത്തെ ഷെഡ്യൂളിൽ വിമാനങ്ങൾ സർവീസ് നടത്തുന്നതിന് ഇൻഡിഗോയ്ക്ക് പച്ചക്കൊടി ലഭിച്ചതായി ഡിജിസിഎയിലെ ഒരു ഉന്നത ഉദ്യോഗസ്ഥൻ സ്ഥിരീകരിച്ചു.
തിരക്കേറിയ ഈ മെട്രോപോളിസിലേക്കുള്ള യാത്രയുടെ വർദ്ധിച്ചുവരുന്ന ആവശ്യം പരിഗണിച്ച് ഡൽഹിയെയും താഷ്‌കന്റിനെയും ബന്ധിപ്പിച്ച് ആഴ്ചയിൽ നാല് ദിവസം നോൺ-സ്റ്റോപ്പ് ഫ്ലൈറ്റുകൾ നടത്തുമെന്ന് ഇൻഡിഗോ പത്രക്കുറിപ്പില്‍ അറിയിച്ചു. ഈ നേരിട്ടുള്ള വ്യോമബന്ധം വ്യാപാരം വർധിപ്പിക്കുക മാത്രമല്ല, ഇന്ത്യയും ഉസ്ബെക്കിസ്ഥാനും തമ്മിലുള്ള ശക്തമായ സാമ്പത്തിക സാംസ്കാരിക ബന്ധങ്ങൾ വളർത്തിയെടുക്കുമെന്നും പ്രതീക്ഷിക്കുന്നു.
“ഞങ്ങളുടെ 6E അന്താരാഷ്ട്ര ശൃംഖലയുടെ 31-ാമത്തെ കൂട്ടിച്ചേർക്കലായി ഉസ്ബെക്കിസ്ഥാന്റെ തലസ്ഥാനവും ഏറ്റവും വലിയ നഗരവുമായ താഷ്‌കെന്റിനെ ഉൾപ്പെടുത്തുന്നതിൽ ഞങ്ങൾ സന്തുഷ്ടരാണ്. ഗ്രേറ്റ് സിൽക്ക് റോഡിലൂടെയുള്ള ഒരു പ്രധാന സ്റ്റോപ്പ് എന്ന നിലയിൽ ചരിത്രപരമായ പ്രാധാന്യവും, മധ്യേഷ്യയുടെ കേന്ദ്രഭാഗത്ത് സ്ഥിതി ചെയ്യുന്ന കാലാതീതമായ അത്ഭുതങ്ങൾ പര്യവേക്ഷണം ചെയ്യാൻ താഷ്‌കന്റ് യാത്രക്കാരെ ക്ഷണിക്കുന്നു,” ഇൻഡിഗോ ഗ്ലോബൽ സെയിൽസ് മേധാവി വിനയ് മൽഹോത്ര പറഞ്ഞു.
“ഉസ്ബെക്കിസ്ഥാന്റെ വടക്കുകിഴക്കൻ മേഖലയിൽ, കസാക്കിസ്ഥാന്റെ അതിർത്തിയോട് ചേർന്ന് സ്ഥിതി ചെയ്യുന്ന ഈ കവാടം ഇന്ത്യൻ പര്യവേക്ഷകർക്ക് ഉസ്ബെക്കിസ്ഥാന്റെ ആകർഷകമായ ആകർഷണീയതയിൽ മുഴുകാനും നമ്മുടെ ഇരു രാജ്യങ്ങളും തമ്മിലുള്ള പരസ്പര പ്രയോജനകരമായ വ്യാപാര-സാംസ്കാരിക ബന്ധങ്ങൾ പരിപോഷിപ്പിക്കാനും അവസരമൊരുക്കുന്നു.
അക്കാര്യത്തില്‍ ഇൻഡിഗോ ഉറച്ചുനിൽക്കുന്നു. ഞങ്ങളുടെ സമാനതകളില്ലാത്ത നെറ്റ്‌വർക്കിലുടനീളം ബഡ്ജറ്റില്‍ ഒതുങ്ങുന്നതും, സമയകൃത്യതയും, ഉപചാരപൂര്‍‌വ്വമായതും, തടസ്സമില്ലാത്ത യാത്രാ അനുഭവങ്ങളും നൽകാനുള്ള പ്രതിജ്ഞാബദ്ധത ഞങ്ങളില്‍ നിക്ഷിപ്തമാണ്,” അദ്ദേഹം കൂട്ടിച്ചേർത്തു.
വൈവിധ്യമാർന്ന ശേഖരങ്ങളും പ്രദർശനങ്ങളും ഉള്‍ക്കൊള്ളുന്ന ആകർഷകമായ മ്യൂസിയങ്ങളും ഗാലറികളും ഉള്ള, ഉസ്ബെക്കിസ്ഥാന്റെ തലസ്ഥാനമായ താഷ്‌കന്റ് അതിന്റെ ചലനാത്മക സാംസ്കാരിക പനോരമയ്ക്ക് പേരുകേട്ടതാണ്.
ഇന്റർനാഷണൽ ഡെസ്റ്റിനേഷനുകളുടെ വിപുലീകരിക്കുന്ന പട്ടികയിലേക്ക് കസാക്കിസ്ഥാനിലെ അൽമാട്ടിയെ ഉൾപ്പെടുത്തിയതായി ഇൻഡിഗോ മറ്റൊരു പ്രഖ്യാപനത്തിൽ വെളിപ്പെടുത്തി.
